Sápmi |

Sáhkabihtážat Yle Sámis: Jovsset Ánte Sara vuoittáhalai Norgga stáhtii ja Sámemuseafoanda oažžu doarjaga nuortalaččaid ásaiduvvama dutkamii

Dá leat vahku maŋimuš sáhkabihtážat.

Video: Jovsset Ánte Sara
Video
Ođđasiin 21.12.2017 muitaluvvui Norgga alimus rievtti duomus Jovsset Ánte Sara boazolohkuáššis. Govva: Liv Inger Somby/ NRK Sápmi

Jovsset Ánte Sara vuoittáhalai Norgga stáhtii

Norgga stáhta lea vuoitán badjeolmmoš Jovsset Ánte Sara alimus rievttis áššis, mii guoská boazologu unnideami. Jovsset Ánte Sara galgá dál geahpedit boazologus dahje doalvut ášši riikkaidgaskasaš duopmostullui. Áššis muitala NRK Sápmi.

Buot álggii njukčamánus 2014, go Norgga eanadoallo- ja biebmodepartemeanta mearridii, ahte Jovsset Ánte Sara galgá geahpedit boazologus 75 bohccui. Sara áššáskuhtii Norgga stáhta ja vuittii ášši Sis-Finnmárkku diggegottis, mii gávnnahii, ahte Norgga stáhta mearrádus geahpedit Sara boazologu 75 bohccui rihkku olmmošvuoigatvuođaid ja Sara vuoigatvuođa iežas gillii ja kultuvrii. Stáhta goit doalvvui ášši alimus riektái.

Sámemuseafoanda oažžu doarjaga nuortalaččaid ásaiduvvama dutkamii

Sámemuseafoanda fidne Suoma museadoaimmahagas 25 000 euro fidnui, mainna áigot dutkat nuortalaččaid ásaiduvvama Suoma bealde jagiin 1939–1949. Suoma museadoaimmahat lea juohkán oktiibuot 279 000 euro servošiid, álbmotorganisašuvnnaid ja museaid fitnuide, main fáddán lea kulturárbi. Doarjjaohcamušat ledje 71, dain doarjaga ožžo 17.

Sámedikki ságadoalli: "Ságastallan Nuoraidráđi evttohasaid duogážiin vuođđuduvvá bargoortnegii"

Sámedikki ságadoalli Tiina Sanila-Aikio oaivvilda, ahte vuossárgga 18.12. dievasčoahkkimis šaddan ságastallan Nuoraidráđi evttohasaid duogážiin vuođđuduvvá bargoortnegii, muitala Lapin Kansa -aviisa. Bargoortnega mielde Nuoraidráđđi galgá ovttastit Suoma sápmelaččaid guovlulaš ja gielalaš joavkkuid nu bures go vejolaš.

Sanila-Aikio goit árvala, ahte ságastallamis lei muhtin dáfus sáhka iešguđege nuora árvvus.

– Eandaliige dan dáfus lei, ahte buktojuvvui ovdan dat, ahte Sámedikki lahtut atnet dehálažžan dan, ahte ovttastus sápmelaččaid ruovttoguovllus lea ortnegis. Go dilli lea dat, ahte duđai máŋggat nuorat gártet fárret oahpuid maŋis eret, dán gažaldagas soaitá šaddat ilgadis dovdu, dadjá Sanila-Aikio.

Nuoraidráđi ságadoalli Laura Pieski ballá, mot ságastallan boahtá boahttevuođas váikkuhit dasa, háliiditgo nuorat álgit nuoraidráđi lahttun.

Áidi, mii eastada bohccuid vuojahallamis Roavvenjárgga ja Tervola gaskkas, soaitá šaddat duohtan

Johtolatdoaimmahat doarju Palojávrri bálgosa bivdaga oažžut áiddi, mainna sáhttet eastadit bohccuid vuojahallamis togaid ja biillaid vuollái Roavvenjárgga ja Tervola gaskkas 70 kilomehtera mátkkis. Bálggus lea gáibidan dákkár áiddi juo máŋggaid jagiid, danin go sin bálgosis leat moatti jagi siste vuojahallan 900 bohcco toga vuollái.

Áiddi dárbbu čielggadišgohtet jahkemolsuma maŋŋá varas statistihkaid vuođul. Jos gávnnahit, ahte áiddi huksemii lea dárbu, soitet Johtolatdoaimmahat ja Lappi EJB-guovddáš huksegoahtit áiddi juo boahtte gease, muitala Johtolatdoaimmahaga ruovdegeainnu buoridanossodaga hoavda Magnus Nygård. Bálggus árvala, ahte áiddi haddin šaddá 400 000–500 000 euro.

Áššis muitala Lapin Kansa -aviisa.

Suomas leat dán jagi šaddan priváhtta suodjalanguovllut badjel 500 hektára ovddas

Priváhtta eanaoamasteaddjit leat dán jagi Suoma 100-jagi ávvujagi gudnin vuođđudan ođđa suodjalanguovlluid oktiibuot 540 hektára ovddas.

Suomas leamašan dán jagi jođus kampánja, mainna leat hálidan movttiidahttit priváhtta eanaoamasteddjiid vuođđudit iežaset eatnamiin suodjalanguovlluid. Stáhta lea lohpidan suodjalit seamma olu stáhta oamastan eatnamiid, go maid dát eaktodáhtolaš eatnama oamasteaddjit ásahit suodjalanguovlluid iežaset eatnamiin.

Sámeguovllus okta eanaoamasteaddji ásahii 20,4 hektára sturrosaš suodjalanguovllu Kuusimukkai Anára gielddas.

Varrasamosat: Sápmi

Váldoođđasat

Varrasamosat

Muualla Yle.fi:ssä