Sápmi |

Sáhkabihtážat Yle Sámis: Lappis leamaš váttisvuođat ÁEL-táksse diŋgomis, sámegielddat gitta suoidnemánus

Dá leat bearjadaga sáhkabihtážat.

Ohcejoga gielda
Sámegielddat dieđihit, ahte suoidnemánus gielddadálut leat gitta. Govva: Yle / Vesa Toppari

Lappis leamašan váttisvuođat ÁEL-táksesáhtuid diŋgomis

Álbmotealáhatlágádus lea gilvalahttán ođđa ÁEL-táksesáhtuid ordnejeaddjiid, geat álggahedje barggus dán mánu álggus, go ođđa tákseláhka bođii fápmui. Dan maŋŋá Lappis ja muhtin eará guovlluin Suomas leamašan váttisvuođat, go sáhtuid diŋgodettiin telefonbálvalusas leamašan ráiddut ja biillat eai leat leamaš doarvái. Dasa lassin leamašan teknihkalaš váttisvuođat.

ÁEL dieđiha, ahte measta buot álgovahkus diŋgojuvvon ÁEL-sáhtut goittotge vuddjojuvvojedje. ÁEL čuovvu dál dili ja geatnegahttá táksesáhtuid ordnejeaddjiid bidjat bálvalusa ortnegii. ÁEL:s jáhkket, ahte bálvalusaid ožžot ortnegii olles riikkas vahku loahpa rádjai. Ođđa tákseláhka dagahii rievdadusaid maiddái earret eará táksemávssuide.

Áššehaččaid ovdduid gohcci eiseváldi Kilpailu- ja kuluttajavirasto ávžžuha almmuhit táksesáhtuin šaddan váttisvuođain vuosttažettiin tákseguovddážii dahje táksefitnodahkii, ja muittuha bivdit kuitte táksemátkkis.

Yle bálggisviehkan-kampánja olle Leammái ihttin

Yle jođiha dán geasi Suoma 40 álbmotmeahcis kampánja, mas dat hástá olbmuid viehkat dahje vázzit álbmotmehciid bálgáid mielde ja oahpásnuvvat lundui ovttas. Ulbmilin lea olahit kampánja áigge oktiibuot 40 000 kilomehtera viega dahje vázzi. Seammás Yle dahká ovttas Meahciráđđehusain digitála viehkanbálggiskártá.

Ihttin 7.7. viehkankampánja olle Leammái, ja doppe vihket dahje vázzet ovttas earáiguin. Dáppe gávnnat viehkankártá ja áigetávvala.

Sámegielddat gitta suoidnemánus

Sámegielddat dieđihit, ahte suoidnemánus gielddadálut leat gitta.

Eanodaga gielddadállu lea gitta 9.7.2018 – 3.8.2018. Sosiálabargi lea goittotge barggus maid suoidnemánus.

Ohcejoga gielddadállu lea gitta 9.7. – 29.7.2018. Sosiáladoaimmahagas lea bargi.

Anára gielddadállu lea gitta 9. – 29.7.

Sámi allaskuvllas leat vihtta rabas virggi

Sámi allaskuvla ohcá sámegiela ja sámi girjjálašvuođa doavttirgrádastipendiáhta njealji jahkái. Stipendiáhta dutkanfáddá ferte leat Sámi njálmmálaš dahje čállon girjjálašvuođa, eará eamiálbmogiid njálmmálaš dahje čállon girjjálašvuođa ja sámegiela gielladiehtaga surggiid siskkobealde. Ohcanáigi nohká borgemánu 15. beaivve.

Dasa lassin Sámi allaskuvllas Guovdageainnus leat njealje eará rabas virggi. Sámi allaskuvla ohcá luonddufága doavttirgrádastipendiáhta golbma jagi jahkemearrevirgái, pedagogihka vuosttaslektora sadjásačča jagi 2020 suoidnemánu loahpa rádjai, matematihka vuosttaslektora fásta bargogaskavuhtii ja arkiivakonsuleantta fásta bargogaskavuhtii.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä