Sápmi |

Sáhkabihtážat Yle Sámis: Lohpevuovdin Ohcejoga jogaide lea álgán ja sámediggelága nuppástusa válmmaštalli doaibmagoddi čoahkkana maŋimuš háve

Dá leat gaskavahku Sáhkabihtážat.

Jietna: Laki Saamelaiskäräjistä
Jietna
Yle Sámi gaskavahku rádioođđasiid gulat dás. Jietna: Yle Areena. Govva: Finlex

Sámediggelága nuppástusa válmmaštalli doaibmagoddi čoahkkana maŋimuš háve

Sámediggelága nuppástusa válmmaštalli doaibmagoddi čoahkkana otne Helssegis. Doaibmagotti bargun ja mihttomearrin lea oažžut áigái ovttamielat evttohusa das, mo sámediggelága sáhttá nuppástuhttit. Doaibmagoddi lea bargan skábmamánu rájes lahkanuppástusáššiin. Doaibmagotti evttohus galggai leat gárvvis cuoŋománu loahpas, muhto dat doallá goit maŋimuš čoahkkimis otne.

Lohpevuovdin Ohcejoga jogaide lea álgán – Veahčajoga ja Goahppelašjoga lobit leat juo vuvdon

Guolástanlobiid vuodvin Ohcejoga jogaide lea álgán. Lobiid vuvdet Veahčajohkii, Ohcejohkii ja Goahppelašjohkii.

Lohpevuovdin guoská luosa ja dápmoha goargŋunčáziid. Jogaide leat meroštallan sálašdihtomeriid, man dihtii juohke guolásteaddjái eai vealttakeahttá reahkká lobit justa daid beivviide maidda háliida. Ovdamearkka dihte Veahčajoga lobit leat juo buot vuvdojuvvon.

Lohpevuovdin dáhpáhuvvá Meahciráđđehusa Eräluvat -neahttagávppis, bálvalannummiris ja guovllu luondduguovddážiin.

Gevvui lohpevuovdin álgá 14.6.2018, ja lobiid sáhttá oastit dušše Ohcejoga bálvalanbáikkis Áilegasguovddážis.

Divvojuvvon 9.5.2018 dii 10:34: Lohpevuovdin ii leat vel otne álgán Gevvui, nu mo álggus muitaleimmet.

Siidda ođđa čájáhus ovdanbuktá sápmelaččaid njealji riikkas

Sámemusea Siiddas rahpasa otne ođđa čájáhus, 11 Sámi áigegova. Čájáhus muitala sámekultuvrra girjáivuođas govaid, videoid ja olbmuid iežaset muitalusaid bokte.

Sosiálaantropologa ja kulturbuvttadeaddji Jorunn Eikjok lea jearahallan čájáhusa várás 27 sápmelačča njealji riikkas. Govvejeaddji Ola Røe lea govven jearahallon olbmuid ja čájáhusa govvamateriála. Jearahallamiin leat mielde julevsámit, nuortalaččat, davvisámit, máttasámit ja gielddasámit, ja sii ovddastit čájáhusas dálá áiggi eamiálbmoga.

11 Sámi áigegova -čájáhus rahpasa Sámemusea Siiddas gaskavahku 9.5. ja dat lea ovdan 11.11.2018 rádjái. Čájáhusa lea buvttadan Várjjat Sámi musea.

Maŋimuš beaivi ohcat sámedikki válgalávdegotti čállin

Otne lea maŋimuš beaivi ohcat sámedikki válgalávdegotti čálli mearreáigásaš barggu. Čálli bargun lea válgalávdegotti vuollásažžan válmmaštallat ja ollašuhttit válggaid. Son lea maiddái válgalávdegotti áššemeannudeaddji ja čálli čoahkkimiin.

Válgalávdegotti čálli bargu álgá geassemánu álggus ja nohká jagi 2019 loahpas. Ohcamušaid galgá doaimmahit sámedikki čállingoddái otne gaskavahku diibmu golmma rádjái. Lassedieđut gávdnojit sámedikki neahttasiiddus.

Anára gielda lágida gieldda olbmuide gulahallaneahkeda

Anára gielda hálida gullat gieldda olbmuid jurdagiid ja oainnuid, ja vástidit gieldda doaimmaid ektui dakkár gažaldagaide, mat beroštahttet gieldda olbmuid. Danin gielda ordne Anár gieldda gulahallaneahkeda otne Avvilis gielddaviesu váldostivrra sáles eahket diibmu 17.30 rájes.

Dilálašvuođa jođiha Anára gielddahoavda Toni K. Laine, guhte áigu maiddái muitalit gieldda áigeguovdilis áššiin. Dearvvuođaid gieldda olbmuide áiguba buktit Inergia beaivválaš hoavda Timo Jokinen ja Lapeco beaivválaš hoavda Osmo Aikio. Čuvgehushoavda Ilkka Korhonen fas muitala dilálašvuođas, makkár máhcahaga gieldda olbmot leat addán skuvlakámpusa plánenbargui.

Dan maŋŋá gieldda virgeolbmot vástidit gažaldagaide, maid gieldda olbmot leat sádden sidjiide ovddal gihtii. Gažaldagaid sáhttá jearrat maid ieš dilálašvuođas, ja doppe lea dárkkuhus muđuige ságastallat áššiin, dego gieldda gulahallanvugiin.

Beaiváduvvon 9.5.2018 dii 10:12: Lasihuvvon ođas Ohcejoga jogaid lohpevuovdimis.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä