Koe uusi yle.fi
Sápmi |

Sáhkabihtážat Yle Sámis: Ministeriijaide rávvagat mo ollašuhttit ráđđádallangeatnegasvuođa ja Vuohču skuvla deavdá 70-jagi

Loga dás sáhkabihtážiid.

Saamelaiskäräjien kokous 19.12.2016
Govva: Susanna Guttorm / Yle

Ráđđádallangeatnegasvuođa várás rávvagat

Suoma vuoigatvuođaministeriija lea dál válmmaštallan sámedikkiin muittuhančállaga, masa leat čohkken buriid vugiid das mo ollašuhttit ráđđádallangeatnegasvuođa. Ráđđádallanvuogádaga mihttomearrin lea eakti ja rivttesáigásaš ságastallan. Figgamuš galgá leat ovttamielalašvuhtii. Dábálaš cealkámuša bivdin Sámedikkis ii ollašuhte ráđđádallangeatnegasvuođa dakkár áššiin mat váikkuhit sápmelaččaid sajádahkii eamiálbmogin. Vuoigatvuođaministeriija lea juohkán sierra ministeriijaide muittuhančállaga. Das leat ovdamearkkat ráđđádallangeatnegasvuođa ollašuhttimis.

Sáná čuvgen dagaha johtolatnuppástusaid

Sána-duoddara čuvgen dagaha odne ja ihttin johtolatnuppástusaid Gilbbesjávrri gilis. Johtolat giddejuvvo odne vuossargga 4.12 dbm. 16:00-16:10 ja 16:20-16:30 Kilpishalli bokte álbmotdáhpáhusa geažil. Leaktoráddjehus lea Gilbbesjávrris maid vuoliduvvon guovtti beaivái 30km/diibmui. Maiddái biillaid parkerema stivrejit gilis sierra. Gilbbesjávrris leat daid beivvid olu olbmot jođus vácci ja danne galgetge biilavuoddjit leat earenomaš várrugasat.

Maiddái válgogeainnus Muonás Gilbbesjávrái lea daid beaivviid olu johtolat ja danne gánnihage várret veháš eanet áiggi mátkošteapmái.

Vuohču skuvla deavdá 70-jagi

Vuohču skuvllas Soađegili suohkanis lea odne ávvubeaivi. Skuvla 70-jagi ávvudemiide odne juovlamánu njealját beaivve vurdet maiddái skuvlla ovddeš oahppiid. Skuvlaáiggiid lea oaivil muittašit nu ságastallamiin go maiddái govaid ja skuvladujiid bokte.  Vuohču skuvlla ávvudoalut álget eahkedis viđa áigge.

Vuotson koulu Sodankylässä
Vuohču skuvla ávvuda. Govva: YLE / Sauli Antikainen

Avvila dearvvašvuođaguovddážii Virtu-čuokkis

Avvila dearvvašvuođaguovddážii rahpojuvvo ihttin 5.12. Virtu-čuokkis. Virtu-čuoggás lea vejolaš dikšut áššiiddis govvatelefovnna bokte, geavahit dihtora ja kopieret, skánnet ja printet áššegirjjiid. Virtu-čuoggá sáhttá várret iežas atnui Anára gieldda neahttasiidduid bokte. Virtu geavaheapmi lea nuvttá.

Virtu-čuoggá bokte lea vejolaš soahpat deaivvadeami  omd. bárgofápmodoaimmahagain dahje sosála- ja dearvvašvuođasuorggi áššedovdiin. Máiddái ÁEL-áššehasbálvalussii sáhttá leat oktavuođas govvatelefovnnain.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä