Sápmi |

Sáhkabihtážat Yle Sámis: Näkkäläjärvi lea dutkan sámiid sátnefriddjavuođa Suomas ja Siiddas čájehit sámenissoniid gahpiriid

Dá leat duorastaga sáhkabihtážat.

Pirita Näkkäläjärvi
Pirita Näkkäläjärvi muitala iežas magisttarbarggu birra ođđajagimánu loahpas Anáris. Govva: Helga West / Yle

Magisttarbargu: Sámiid sátnefriddjavuohta Suomas

Yle Sámi ovddeš hoavda, dála PwC Strategy& -fitnodaga strategiijakonsulta ja City Sámit -searvvi nammadan Jagi sápmelaš 2017 Pirita Näkkäläjärvi lea iežas magisttarbarggus guorahallan, mo sámiid sátnefriddjavuohta Suomas lea áitojuvvon. Son barggai magisttarbarggu London School of Economicsa media- ja gulahallandieđagoddái čakčat 2017. Barggu várás Näkkäläjärvi jearahalai 15 sámi artistta, aktivistta ja politihkkára.

Näkkäläjärvi muitala sámegillii magisttarbarggu birra sotnabeaivve 28.1. diibmu 14.30 rabas dilálašvuođas Sámemusea Siidda restauráŋŋa Sarridis, Anáris.

Siiddas čájehit sámenissoniid gahpiriid

Sámemusea Siida čájeha ođđa miničájáhusastis jagi 2018 áigge guhtta iešguđetlágan nissona gahpira čoakkáldagastis. Vuosttas gahpir čájáhusas lea nuortalaš nissona dálvegahpir, man Heini Wesslin lea duddjon 2012. Čájáhus lea álgán 02.01.2018 ja dat nohká jagi 2018 loahpas.

Avvila girdigiettis buorre jahki

Avvila girdigiettis fitne jagi 2017 áigge badjel 210 000 olbmo, mii leige girdigietti ođđa galledeaddjiolahus. Girdigieddái bohte nu olu olbmot, ahte boahtinlatnjii eai váldán vuostá go ovtta girdi mátkkošteddjiid hávil. Girdigietti viiddidedje guokte jagi dassái, muhto dál juo livččii dárbu viiddidit boahtinlanja guovttegeardásažžan. Viiddideami lea juo plánegoahtán, muhto ollašuhttimis ii leat diehtu. Áššis muitala Lapin Kansa -aviisa.

Ruošša mátkkošteaddjit leat lassánan Davvi-Suomas ja Davvi-Norggas

Rájijovsseha ja Salla rádjerasttildanbáikkiin ruošša luopmo- ja gávpemátkkošteaddjit leat vehá lassánan, muitala Lapin Kansa -aviisa. Rájijovssehis ruoššat rasttildedje rájá diibmá 61 433 háve ja Salla rájá fas 74 660 háve. Rájijovssehis ruoššaid mearri lassánii 25 proseantta ja Sallas vádjit 23 proseantta. Logut lea goit ain unnit go jagis 2013. Oktiibuot ráji rasttildeddjiid mearri lassánii 13,8 proseantta.

Maiddái Norgga ja Ruošša rájá rasttildedje diibmá 20 proseantta eanet ruoššat go ovddit jagi, ja muđui ráji rasttildeapmi lassánii 12,6 proseantta, go ráji rasttildedje oktiibuot 265 177. Lohku lei goit 17 proseantta unnit go jagis 2013, gos rehkenaste 320 000 rájá rasttildeami. Áššis muitala Independent Barets Observer.

Báŋkostreaika álgá fas

Ruhtasuorggi bargoeavttuin eai lihkostuvvan dahkat soahpamuša gaskavahku, ja danin otne lea álgán nubbi báŋkostreaika, mii bistá bearjadaga 5.1. rádjai. Vuosttaš streaika lei juovlamánu loahpas, 28.-29.12.

Streaikka dihte stuorát oassi Suoma báŋkokantuvrrain leat gitta ja báŋkobálvalusat sáhttet doaibmat njozet. Ruđa goit sáhttá loktet báŋkoautomáhtain ja gávppiin, mat fállet ruđa loktenbálvalusa, báŋkokoarttat doibmet dábálaččat ja rehkegiid maid sáhttá máksit dábálaččat neahttabáŋkkuin. Báŋkkut dieđihit neahttasiidduin ja sosiála medias, mo streaika váikkuha sin bálvalusaide.

Sivvan ruhtasuorggi streikii lea dat go oassebeliiguin leat iešguđetlágan oainnut vahkuloahpaid áigge dahkkojuvvon bargguin.

Beaiváduvvon 4.1.2018 diibmu 12:59: Lasihuvvon diehtu, ahte Pirita Näkkäläjärvi lea Jagi sápmelaš 2017.

Beaiváduvvon 4.1.2018 diibmu 13:06: Pirita Näkkäläjärvi lea strategiijakonsulta, ii konsuleanta nu mo ođđasis vuos namuhuvvui.

Varrasamosat: Sápmi

Váldoođđasat

Varrasamosat

Muualla Yle.fi:ssä