Sápmi |

Sáhkabihtážat Yle Sámis: Nákkosdutkamuš sámeduojis, influenssaboahkoheamit leat fas oažžumis ja Skábmagovaid buvttadeaddjin álggaha Taru Arrela

Dá leat gaskavahkku sáhkabihtážat.

Jietna: Duodji, silkkit
Jietna

Nákkosdutkamuš: Servodatlaš rievdadusat váikkuhit sámeduoji geavaheapmái ja njuolggadusaide

Filosofiija magisttar Sigga-Marja Magga nákkáhallá boahtte vahkus das, mo sámeduodji hukse sámeservoša oktiigullevašvuođa. Son lea gávnnahan, ahte dat, mo sápmelaččat vásihit duoji dán áigge lea oktavuođas sápmelaččaid buresbirgejumi lassáneapmái ja maiddái servodatlaš rievdadusaide ja politihkkii. Rievdadusat váikkuhit duoji geavaheapmái, njuolggadusaide ja duodjái gávpegalvun.

Magga lea maid gávnnahan, ahte sámeservoša siskkáldas njuolggadusain figget doallat duoji árbevirolažžan, muhto dainna váikkuhit maiddái sápmelaččaid sosiálalaš oktavuođaide.

Nákkosdutkamuš lea dahkkon Giellagas-instituhta sámekultuvrra oahppoávdnasis. Sigga-Marja Magga nákkosdilálašvuohta lea bearjadaga golggotmánu 19. beaivve Anáris sámekulturiguovddáš Sajosis diibmu 12 rájes.

Beaktilut influeanssaboahkoheamit oažžumis

Dán čavčča influenssaboahkoheami lohpidit leat beaktilut go diimmá boahkohus. Boahkohanávnnas lea njealje sierra virusa vuostá, nu A- go B-virusiid vuostá. Diibmá boahkoheapmi ii addán suoji buot influeansavirusiid vuostá ja danin epidemiaáigi bisttiige guhká.

Boahkoheami sáhtá skáhppot almmolaš dahje priváhta dearvvasvuohtafuolahusa bokte.

Dovddatgo sisteduodjevearbbaid?

Sámedikki skuvlen- ja oahppamateriáladoaimmahat lea almmustahttán filmmaža sisteduodjevearbbain davvisámegillii. Sisteduodje-videoi giehtačállosa lea bargan Rauna Vieltojärvi ja son maid duddjo videos.

Video sáhttá geavahit ovdamearkka dihte sámeduoji oahpahusas ja sihke davvisámegiela eatnigiela ja vierisgiela oahpahusas. Video sáhtát geahččat dáppe.

Taru Arrela Skábmagovaid buvttadeaddjin

Sámedáidaga doarjjasearvi lea válljen Taru Arrela buvttadit Skábmagovat – eamiálbmogiid filbmafestivála.

Buvttadeaddji bargun lea dikšut festiválabuvttadeapmái gullevaš áššiid dego skáhppot filbmakopiijaid, fuolahit deaddiluvvon filbmaprográmmas ja koordineret siidodáhpáhusaid.

Varrasamosat: Sápmi

Váldoođđasat

Varrasamosat