Sápmi |

Sáhkabihtážat Yle Sámis: Nákkosdutkamuš sámi oskkueallimis, Pieski ovddasteaddjin Venetsia biennálas ja studeanttat čogget ruskkaid Muotkkeduoddaris

Dá leat bearjadaga sáhkabihtážat.

Jietna: Lovisa Mienna Sjöberg
Jietna
Lovisa Mienna Sjöberg nákkáhallá sámi oskkueallimis. Guldal Yle Ođđasiid Sámis dás. Jietna: Yle Areena, Govva: Inga-Marja Steinfjell / SR Sápmi

Nákkáhallan sámi oskkueallimis

Allaskuvlalektor Lovisa Mienna Sjöberg nákkáhallá otne bearjadaga sámi oskkueallimis Sámi allaskuvllas Guovdageainnus. Su nákkosdutkamuš gieđahallá sivdnideami oassin stuorát oktavuođas dálá oskkueallimis Sámis.

Sjöberg lea guhká bargan oahpaheaddjin Sámi allaskuvllas oahppofálaldagain, man fáddán leat osku, etihkka ja eallinoaidnu. Nákkosdilálašvuohta álgá diibmu 12.00 Diehtosiiddas Guovdageainnus.

Outi Pieski ovddasta Suoma boahtte jagi Venetsia biennálas

Dáiddáriid ja aktivisttaid Miracle Workers Collective -joavku ovddasta boahtte jagi Suoma nu gohčoduvvon Venetsia biennálas. Venetsia biennála lea mearkkašahtti riikkaidgaskasaš dáládáiddačájáhus, mii ordnejuvvo juohke nuppi jagi Venetsias Itálias.

Miracle Workers Collective -joavkku vuođđudanlahtuide gullet sámedáiddár Outi Pieski, kuráhtor Bonaventure Soh Bejeng Ndikung, veahkkekuráhtorat Giovanna Esposito Yussif ja Christopher Wessels ja birasplánejeaddji Lorenzo Sandoval.

Joavku ollašuhttá biennálas Suoma Alvar Aalto -paviljoŋŋa čájáhusa. Čájáhusa lassin joavku buvttada Venetsias dáhpáhusráiddu, mas dan doaibma ovdanbuktojuvvo performatiivalaš, diskursiivalaš, ealligovalaš ja jienalaš vugiiguin. Daid ollašuhttimis lea mielde earret eará sápmelaš filbmabagadalli Suvi West.

Venetsia biennála lea rabas 11.5.–24.11.2019. Biennála lea vuođđuduvvon jagis 1895 ja dat lea máilmmi boarrásamos dáládáidaga čájáhus.

Riikkaidgaskaš čorgenbeaivi – Studeanttat čogget ruskkaid Muotkkeduoddaris

Ihttin lávvordaga čakčamánu 15. beaivve lea riikkaidgaskasaš čorgenbeaivi. Reppuretki.fi-siidu ja Máttanuorta-Suoma ámmátallaskuvlla vánddardeaddjit hástet beaivvi gudnin olbmuid čoaggit luonddus ruskkaid.

Sii doibmet ieža ovdamearkan vánddardanmátkkisteaset Muotkkeduoddaris Anáris. 40 studeantta Suomas, Duiskkas ja Nuortariikkas leat vánddardan dán vahku Muotkkeduoddara meahcceguovllus. Meahccedáidduid oahpahallama lassin studeanttat leat čoaggán vánddardeddjiid, guolásteaddjiid ja meahcásteddjiid guođđin ruskkaid. Dolastallanbáikkiin gávdnojit ovdamearkka dihte ruston borramušdoasat, foliot ja plastihkat. Studeanttat buktet iežaset čoaggin ruskkaid geaidnogurrii, gos Meahciráđđehusa Luontopalvelut viežžá daid ruskafuolahussii.

– Mii leat studeanttaiguin vánddardan Muotkkeduoddara áidalas meahcis logiid jagiid áigge, ja háliidat boahttevuođasge beassat návddašit buhtes luonddus. Danin movttiidahttitge earáge vánddardeaddjiid oassálastit oktasaš čorgemiidda vánddardanguovlluin ja álbmotmehciin, muitala lektor Tommi Pantzar Máttanuorta-Suoma ámmátallaskuvllas.

Máilmmeviidosaš čorgenbeaivi, World Cleanup Day, čohkke olbmuid miehtá máilmmi doaibmat buhtes birrasa beales. Birrasa čorgejit seammá áigge 150 riikkas.

Varrasamosat: Sápmi

Váldoođđasat

Varrasamosat

Muualla Yle.fi:ssä