Sápmi |

Sáhkabihtážat Yle Sámis: Njellimis jávkan albmá eai leat vel gávdnan ja Meahciráđđehus ja eana- ja meahccedoalloministeriija bivdán lassiáiggi cealkit sámediggeláhkaevttohusas

Loga dás maŋŋebárgga sáhkabihtážiid.

Nellimin venesatama
Jávkan albmá jáhkket gahččan fatnasis, go su geavahan fanas gávdnui guorusin sulaid kilomehtera geažes Njellima hámmanis.

Njellimis jávkan albmá eai leat vel gávdnan

Njellimis, Anárjávrris jávkan albmá eai leat mánnodateahkeda rádjái gávdnan. Boles navdá albmá heavvanan. Boles, Lappi rádjegozáhus ovttas beatnagiiguin sihke Avvila buokčaleddjiiguin leat ohcan jávkan fanasjohtti. Ohcamat leat leamašan čázádagas ja gáttiin. Ávkin leat geavahan maiddái drone nappo girdikámera.

Almmuhus jávkan albmás bođii bolesii lávvardaga maŋŋit eahkes. Su jáhkket gahččan fatnasis, go su geavahan fanas gávdnui guorusin sulaid kilomehtera geažes Njellima hámmanis. Ohcamiid joatkit gaskavahku earet eará bolesbeatnaga vehkiin.

Meahciráđđehus ja eana- ja meahccedoalloministeriija bivdán lassiáiggi cealkit sámediggeláhkaevttohusas

Meahciráđđehus ja eanan- ja meahccedoalloministeriija eai leat velá geargan cealkit sámediggeláhkaevttohusas.

Vuoigatvuođaministeriija ráđđádalli virgeolmmoš Johanna Hautakorpi dadjá, ahte Meahciráđđehus ja eanan- ja meahccedoalloministeriija leat ohcan lasseáiggi cealkimii. Lasseáigi mieđihuvvo borgemánu 8. beavvi rádjái, dadjá Hautakorpi.

Sámediggeláhkaevttohusas leat cealkán birrasii 50 sierra doaibmi: eiseválddit, searvvit ja ovttaskas olbmot. Cealkináigi nogai mannán bearjadaga.

Luomekilos mákset 13€, muhto luomeoasti vuorkkát eai dieva fuones jagi dihte

Ná fuones jahki ii leat leamašan su áigge, šuohkiha Lapin Marjat -fitnodaga njunuš Asko Autio Soađegilis. Diibmá son osttii meastta beaivvis dan maid lei váili. Ikte eai fitnan go moattis vuovdimen sutnje luopmániid, dadjá Autio.

Dál eai leat valjis vuovdit go dákkár báhkain olmmoš ii nagot beaivit lubmet. Son máksá 13-14 euro luomekilos, muhto buohkain ii sáhte oastit.

– Fuones, čurrui dahje goikan luopmániid mii eat fuola. Muorjjit dárbbašit čázi ja beaivváža ja dál eat leat ožžon eará go beare beaivváža, govvida muorjeoasti Asko Autio dili.

Kuukkeli-gávpi oastá maid luopmániid, muhto jaskat dat lea sisge. Avvilis eai leat go moattis fitnan vuovdimen sidjiide luopmániid.

– Garra barggu duohken dat luopmánat orrot leamen, muhto gal dat gávdnojit go beare viššá vázzit. Sii mákset čoggiide 13 euro kilos, muitala Jouko Pasma Kuukkeli-gávppi bealis.

Varrasamosat: Sápmi

Váldoođđasat

Varrasamosat

Muualla Yle.fi:ssä