Koe uusi yle.fi
Sápmi |

Sáhkabihtážat Yle Sámis: Ohcejoga gielddahoavda gáibida stáhta dorvvastit álbmoga dorvvolašvuođa ja soabadallanskuvlejupmi álgá guovvamánus

Loga dás gaskavahku sáhkabihtážiid.

Vuokko Tieva-Niittyvuopio
Ohcejoga gielddahoavda Vuokko Tieva-Niittyvuopio gieđahallá ođđajagiságastis earret eará gieldda vássán jagi ja gieldda ealáskahttima. Govva: Anneli Lappalainen / Yle

Ohcejoga gielddahoavda gáibida stáhta dorvvastit álbmoga dorvvolašvuođa

Ohcejoga gielddahoavda Vuokko Tieva-Niittyvuopio guorahallá ođđajagiságastis gieldda vássán jagi ja boahttevuođa. Son buktá ovdan earret eará Deanu soahpamuša dohkkeheami váikkuhusaid ealáhusaide ja gieldda imagoi, muhto maiddái servvolašvuođa badjáneami soahpamuša garra vuosttildeami bokte. Gielddahoavda giitá buohkaid, geat leat nagodan váikkuhit ja bargat sámekultuvrra ja ealáhusaid beales, oktasaš boahttevuođa buorrin, ja maiddái gieldda áššiid válmmaštallamii ja mearrádusdahkamii.

Tieva-Niittyvuopio máinnaša ságastis maiddái gielddastrategiija, man vuođđun leat gieldaekonomiija, gilvonávcca ja eallinfámu nannen ja ássiid buorit sáme- ja suomagielat bálvalusat. Son oaivvilda, ahte gielddas plánejuvvon fidnut nannejit dáid áššiid. Gielddahoavda muittuha maiddái stáhtaválddi das, go bolesa váilun dagaha Ohcejogas váilevuođa dorvvolašvuhtii.

– Stáhta berre dikšut geatnegasvuođas ja dorvvastit buot riikkalahtuid vuođđolágalaš vuoigatvuođa dorvvolaš árgabeaivái, Vuokko Tieva-Niittyvuopio loahpaha ođđajagiságastis.

Soabadallanskuvlejupmái sáhttá ohcat vel moadde vahku

Lappi universitehtas álget guovvamánus soabadallanoahput. Ohcanáigi oahpuide nohká 22.1.2018. Oahpuide gullet golbma kurssa. Ovtta kurssa viidodat lea 5 oahppočuoggá. Vuosttaš kursa gieđahallá teoriija, nubbi davviguovllu erenoamášgažaldagaid ja goalmmát kurssas oahput heivehuvvojit geavadii.

Soabadallanoahpuid ulbmilin lea fállat bargoneavvuid čoavdit báikkálaš riidduid ja hárjehit oassálastiid rievdadit konflivttaid ráfálaš vugiiguin. Vuolggasadjin lea, ahte oassálastit eai leat konflivttas olggobeale olbmot, muhto sáhttet baicce ieža oasálažžan bargat maiddái soabadallin. Oahpuin čalmmustahttojuvvojit erenoamážit konflivttat, mat láktasit kultuvrii, identitehtii, eanageavaheapmái ja ealáhusaide davviguovllus, ja ruossalasvuođat, maid sápmelaččaid sajádahkii váikkuhan láhkamearrádusat leat dagahan.

Kursii sáhttet oassálastit buot universitehtastudeanttat, joatkkastudeanttat ja sáme- ja báikkálašservošiid doaibmit. Oahput álget 9.2.2018 ja nohket borgemánus 2018 ja dat ordnejuvvojit sihke lagaš- ja gáiddusoahpahussan. Lagašoahpahus lea Roavvenjárggas ja Anáris. Skuvlejumi ordnejit Lappi universitehta juridihka dieđagoddi, Oulu universitehta Giellagas-instituhtta, Sámi oahpahusguovddáš ja Oskkolaš ja árbevirolaš doibmiid ráfifierpmádat. Oahput nohket borgemánus 2018.

Lassedieđuid gávnnat Lappi universitehta neahttasiiddus.

Saami Ski Race -čuoigangilvu Heahtás Guovdageidnui dollojuvvo cuoŋománus

Riikkaidgaskasaš maratončuoigangilvu, Saami Ski Race, lágiduvvo Eanodagas ja Guovdageainnus cuoŋománus, dál gávccát háve. Gilvaleaddjit čuiget boares boastabálgá mielde Heahtás Guovdageidnui.

Gilvvus lea vejolaš čuoigat jogo 30, 60 dahje 90 kilomehtera. Váldomátki, 90 kilomehtera čuoigan vuolgá Heahtás, 60 kilomehtera čuoigan Neakkela gilis ja 30 kilomehtera čuoigan Norgga bealde Sihččajávrri luoddaearus .

Čuoigangilvu dollojuvvo sotnabeaivve 8.4.2018.

Saami Ski Race
Govva: Timo Leppänen

Ávvir: Jovsset Ánte Sara lea jienastuvvon jagi 2017 sápmelažžan

Ávvir-aviissa lohkkit leat jienastan Jovsset Ánte Sara jagi 2017 sápmelažžan, muitala Ávvir-aviisa. Jienasteamis ledje 16 evttohasa, geaid Ávvira lohkkit ledje evttohan. Sara oaččui 39 proseantta buot jienain. Dát lei goalmmát geardi go Ávvir bivddii lohkkiid jienastit jagi sápmelačča.

Sara bekkii 2017:s, go lei vuosttaš ja áidna badjeolmmožin stevdnen Norgga stáhta boazologu unnidangáibádusa dihtii Finnmárkkus. Son vuittii stáhta Sis-Finnmárkku diggegottis njukčamánus 2016, muhto loahpas goit vuoittáhalai alimus rievttis juovlamánus 2017.

Jovsset Ánte Sara
Ávvir-aviissa lohkkit leat jienastan Jovsset Ánte Sara jagi 2017 sápmelažžan. Govva: Liv Inger Somby/ NRK Sápmi

Soađegili gielddadálu rávvenbálvalusat gáržžiduvvojit moadde mánnui

Soađegili gielddadálu rávvenčuoggá rabasáiggit gáržžiduvvojit ođđajagi- ja guovvamánus. Gáržžideami sivvan lea dat, go ođđajagimánus álggahuvvo bálvalančálli ohcanproseassa.

Rávven lea rabas árgabeivviid vuossárggas gitta duorastahkii diibmu 9-11. Gieldda telefonguovddáš doaibmá árgabeivviid diibmu 9-11 ja 12-15, earret bearjadagaid diibmu 14 rádjai. Muđui gielddadállu lea rabas dego dábálaččatge.

Beaiváduvvon 3.1.2018 dii 12:30: Lasihuvvon ođas Jovsset Ánte Saras.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä