Sápmi |

Sáhkabihtážat Yle Sámis: Ohcejoga girkovearru njiedjá, Sámediggi ohcá bargi ja Helssegis álgá čakčat sámegielat vuođđooahpahus

Loga dán artihkkalis gaskavahku ođasbihtážiid.

Ohcejoga girku
Govva: Susanna Guttorm / Yle

Ohcejoga searvegotti girkovearru njiedjá vehá jagi álggus

Ohcejoga searvegotti olbmot šaddet máksit vehá unnit girkovearu go ovdal, go Ohcejoga ja Anára searvegottiin šaddá Davvi-Sámi searvegoddeovttastupmi. Ođđa girkovearroproseanta lea dalle 1,75 proseantta, go ovdal dat leamašan 1,80 proseantta.

Boahtte jagi álggus 20 gielddas mákset 0,05–0,25 proseantta eanet girkovearu go ovdal. Davvi-Suoma gielddain vearru loktana Pelkosenniemis, Suoivvaguoikkas ja Roavvenjárggas 0,05 proseantta.

Sámediggi ohcá giellabeassejođiheaddji

Sámedikkis lea rabas mearreáigásaš giellabeassejođiheaddji doaibma. Giellabeassejođiheaddji bargui gullet earet eará sámiid giellabeassedoaimma jođiheapmi, koordineren ja ovddideapmi, sihke giellabesiid stáhtadoarjaga hálddašeapmái gullevaš barggut.

Doaibmabáiki lea sámekulturguovddáš Sajosis Anáris. Ohcamušaid čuvvosiiguin galgá doaimmahit sámedikki čállingoddái maŋimustá 12.1.2018. Bargu álgá soahpamuša mielde ja bistá jagi 2018 loahpa rádjai.

Helssegis álgá sámegielat vuođđooahpahus

Sámegiela ja sámegielat oahpahusa ordnegohtet Helssega Pasila-gávpotoasi vuođđoskuvllas. Helssega bajásgeassin- ja skuvlenlávdegoddi dohkkehii maŋŋebárgga 19.12. guovttegielat suoma-sámeoahpahusa gávpoga vuođđoskuvllaid giellaprográmmii. Oahpahus álgá čakčat 2018.

Pasila vuođđoskuvlii vuođđuduvvo joavku, mas sámegiela diimmuid lassin sámegiela geavahit earáge oahpahusas. Unnimustá njealját oassi oahpahusas lea sámegillii. Jovkui čáhket unnimustá vihtta ja eanemustá 24 oahppi. Ohppiid sáhttet váldit oahpahussii maiddái ránnjágielddain, juos lea sadji. Skuvla oažžu sierraresurssaid oahpahusa ordnema várás.

Pasilas álggii dán jagi bealde juo sámegielat ovdaoahpahus ja doppe doaibmá maiddái sámegielat beaivedikšu Máttabiegga.

Eanodagas plánejit sihkkarastit gieldda dorvvolašvuođa 100 000 mearreruđain

Eanodaga bolesdilli lea otne gaskavahku liigeáššin váldostivrra čoahkkimis, mii álgá viđa áigge. Gielddaráđđehus evttohii ikte váldostivrii, ahte boahtte jagi bušehttii váldojuvvo 100 000 euro mearreruhta Eanodaga gieldda ja gieldalaččaid dorvvolašvuođa sihkkarastima várás. Ruđa geavaheamis galgá ráhkaduvvot vel sierra plána, mo buoridit dorvvolašvuođa.

Eanodat lea báhcimin bolesa hága boahtte jagi álggus. Lappi boleslágádus áigu dikšut Eanodaga áššiid Gihttela, Kolari ja Muoná bolesfámuiguin.

Lappi eanagoddi lea gearggus sode-ođastussii, jos oažžu guokte gohcci buohcceviesu

Davvi-Suoma gielddat leat soahpan oktasaš oainnu olles eanangotti guoski sosiála- ja dearvvašvuođabálvalusaid ordnemis. Davvi-Suoma gielddat gáibidit stáhtaráđi mearridit jođánit láhkarievdadusas, mii attášii vejolašvuođa dasa, ahte Davvi-Suomas leat guokte buohcceviesu, main lea gohccin.

Davvi-Suoma gielddat čoahkkanedje ášši olis ikte. Čoahkkimis ledje ovddasteaddjit visot Davvi-Suoma gielddain, earet Eanodagas. Áššis muitala Lapin Kansa -aviisa. Suoma sosiála- ja dearvvašvuođasuorggi eanangoddeođastus galggašii boahtit fápmui jagis 2020.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä