Sápmi |

Sáhkabihtážat Yle Sámis: Ohcejogas bolesa galgá vuordit measta beannot diimmu ja Sámediggi oažžu 130 000 euro lasáhusa riekteministeriijas

Loga dás vahku vuosttas ođasbihtážiid.

Vuorkágovas Bolesbiila Ohcejogas / Arkistokuvassa poliisiauto Utsjoella
Govva: Eljas Niskanen / Yle

Ohcejogas šaddá vuordit guhkimusat bolesa Davvi-Suomas

Davvi-Suomas bolesis oažžu veahki gaskamearalaččat 12 minuhtas. Bolesa statistihkaid mielde Ohcejogas lea dán jagi leamašan guhkimus vuordináigi, measta beannot diimmu (85,7 min), ovdal go leat ožžon bolesis veahki. Nubbin guhkimus vuordináigi, gaskamearalaččat badjel diimmu, leamašan Eanodagas. Davvi-Suoma gielddain ovccis lea bistán badjel diibmobealli ovdal go boles lea boahtán báikki ala. Davvi-Suoma gávpogiin Roavvenjárggas, Giemas ja Durdnosis boles boahtá báikki ala vuollel logi minuhtas.

Sámediggái 130 000 euro lasáhus stáhtadoarjagii

Suoma riekteministeriija lea mieđihan Suoma sámedikki stáhtadoarjagii 130 000 euro lasáhusa boahtte jahkái. Ráđđehusa bušeahttaevttohusas lea riekteministeriijas čujuhuvvon badjelaš 3 300 000 euro sámedikki kulturiešstivrejumi goluide. Olles Sámedikki bušeahtta lea ain badjel 6,5 miljon euro.

Sámedikki dievasčoahkkin 19.6.2017
Govva: Susanna Guttorm / Yle

Sámi allaskuvlla goahtejođiheaddjit virgáduvvon

Sámi allaskuvlla stivra lea virgádan Marit Meløy Giela, duoji, boazodoalu ja servvodatdiehtagiid goahtejođiheaddji jahkemearrevirgái jagi 2018 álggu rájes gitta 31.12.2021 rádjái. Marit Meløy bargá dal seniorráđđeaddin boazodoalloáššiin Norgga Sámedikkis. Sámi allaskuvllas son lea ovdal bargan dutkankonsuleantan, oahpporáđđeaddin ja oahppohoavdan. Sus lea mastergráda servodatplánemis Romssa Universitehtas.

Giela, duoji, boazodoalu ja servodatdiehtagiid goađi jođiheaddjis lea bajitdási ovddasvástádus buot goađi oahppo-, dutkan- ja ovdánahttindoaimmain sihke fuolahit, ahte goahti ovdána strategiijaid, mihtuid ja mearrádusaid mielde. Dán ovddasvástádussii gullet earret eará, ahte goađi oahppofálaldagat ja dutkan- ja ovdánahttindoaimmat devdet gustovaš kvalitehtagáibádusaid.

Marit Meløy
Marit Meløy álggaha Giela, duoji, boazodoalu ja servvodatdiehtagiid goahtejođiheaddji jahkemearrevirggis jagi 2018 álggus. Govva: Jonne Sikku

Ođđajagimánu rájes Sámi allaskuvllas leat guokte goađi, Giela, duoji, boazodoalu ja servodatdiehtagiid goahti man Marit Meløy jođiha ja Sámi oahpaheaddjeoahpuid ja álgoálbmotjournalistihka goahti man Seija Risten Somby jođiha.

Váruhit muohtauđđasiin

Gádjunlágádus ja Meahcciráđđehus ávžžuhet olbmuid čuovvut Dálkedieđalágádusa dieđuid muohtauđđasiin, muitala Lapin Kansa -áviisa.

Muohtauđđasat leat vejolačččat Suoločielggis, Gilbbesjávrris, Ylläs-Levis, Rukas, Luosto-Pyhäs, ja Ounas-Pallasa.

Beaiváduvvon 18.12.2017 dii 11.45: Ođas Sámiráđi kulturdoarjagiin váldon eret, danin go dat muitaluvvui bearjadaga sáhkabihtážiin.

Ođas muohtauđđasiin lasihuvvon.

Varrasamosat: Sápmi

Váldoođđasat

Varrasamosat

Muualla Yle.fi:ssä