Sápmi |

Sáhkabihtážat Yle Sámis: Olmmošjohtolat geahpanan nuortaráji alde, Ánnámárehis girkokonsearta Ruoŧa beal Badje-Durdnosis

Dá leat maŋŋebárgga sáhkabihtážat.

Raja-Joosepin rajanylityspaikka Inarissa
Govva: Yle Sápmi

Olmmošjohtolat geahpanan Salla ja Rádje-Jovsseha rádjestašuvnnain

Lappi rádjegozáhusa Salla ja Rádje-Jovsseha rádjestašuvnnain riikkaráji rasttildedje cuoŋománu álggu ja geassemánu loahpa gaskasaš áigge oktiibuot 48 296 olbmo, mii lea sullii čieža proseantta unnit go diibmá seammá jagiáigge.

Ruošša rubela kursa lea jáhkkimis váikkuhan dasa, ahte olbmot eai boađe Ruoššas gávppašit Suoma beallái nu olu go diibmá.Rádje-Jovssehis 80 proseantta olmmošjohtolagas šaddá ruoššaid johtimis, suopmelaččat leat 18 %. Sallas ruošša johtit leat 54 proseantta ja suopmelaččat 44 proseantta. Olles álgojagi johtolat nuortaráji rádjestašuvnnain lea geahpanan guokte proseantta diimmážis.

Ánnámáret ja Ilkka Heinonen duorastaga girkokonsearttas Ruoŧa beal Badje-Durdnosis

Ánnámáret ja Ilkka Heinonen duo loaiddasta duorastaga 12.7. Hedenäset/Hietaniemi girkus Ruoŧa beale Badje-Durdnosis.

Prográmmas leat sámegielat sálmmat ja Ánnámáret lávlagat ja luođit. Duo lea hápmen konseartta prográmma dainna jurdagiin, ahte dutkat árbevirolaš sámi sálmmaid veaisideami ja luođi oktavuođaid, Ánnámáret Facebook-siiddus muitalit. Konseartta birra sáhtát lohkat eanet dáppe.

Suoma ja Norgga ráji Háldis "vuolidit" ovttasbargoprošeavttain

Suoma ja Norgga rádji lea rabas, nu ahte vánddardeaddjit sáhttet rasttildit rájá friija. Dás fuolakeahttá rádji hábme oaidnemeahttun eastaga virgeoapmahaččaid ja eará doibmiid ovttasbargui. Luondu ii almmatge dovdda rájiid, ja riikkaidgaskasaš eastta unnimustá vuoliduvvo. Ovttasbargui oassálastiba Norga ja Suopma ja dan ruhtada EU. Seammasullasaš, Suoma, Norgga ja Ruošša rájáid rasttildeaddji ovttasbargu lea lihkostuvvan bures Anár-Pasvik-guovllus ja maiddái Oulanka ja Paanajávrri álbmotmehciid guovllus Suoma ja Ruošša rádjeguovllus. Boahtteáigge ovttasbargui bovdejuvvojit maiddái Ruoŧa luonddusuodjalanguovlluid dikšut ja eará doaibmit.

Pirkanmaa guovllus beassá lohkat davvisámegiela čakčat

Tamperes ordnejuvvo vahkuloahpa áigge 8.-9.9. logi diimmu Dearvva! Terve! -nammasaš álgokurssa. Aino Valovirta oahpaha. Almmuhanáigi kursii álgá 1.8.

Nokias ordnejuvvo davvisámegial joatkakursa, doppe leamaš jo moadde jagi vejolaš lohkat davvisámegiela ja dál ordnejuvvo Davvisámegiella 3 -kursa. Nokias sáhttá lohkat maiddái olles lohkanbaji bisti davvisámegiela álgokursa. Dáid kurssain oahpaha maiddái Aino Valovirta. Almmuhanáigi álgá 16.8.

Sámi oahpahusguovddáža bokte lea lassin vejolaš lohkat davvisámegiela, anárašgiela ja nuortalašgiela gáiddusoahpahusa bokte Virtuálaskuvllas.

Biilalihkuhisvuohta Muonios

Gilbbešjávrri ja Roavenjárgga luoddaearus dáhpáhuvai ikte vuossárga eahketbeaivve personbiilla ja pakeahttabiilla lihkohisvuohta. Lihkohisvuođas golmmaš roasmohuvve vehá ja sin sáddejedje Muonio dearvvašvuođaguovddážii dárkkistussii.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä