Sápmi |

Sáhkabihtážat Yle Sámis: Otne maŋimuš beaivi cealkit sámediggeláhkaárvalusas ja Eanodaga gielda viggá dorvvastit ministarii seailluhan dihte girdivuoruid

Dá leat bearjadaga sáhkabihtážat.

Saamen lippu.
Govva: Ville-Riiko Fofonoff / Yle

Sámediggeláhkaárvalusa cealkináigi nohkká odne bearjadaga

Sámediggeláhkaárvalusa cealkináigi nohkká bearjadaga 27.7.2018. Láhkaárvalusa válmmaštallan bargojoavku attii evttohusas lágas 19.6 man maŋŋá dat bođii cealkinláhkai.

Beannot vahku dassái sámesearvvit eai lean vel cealkán láhkaárvalusas. Beargadaga iđđes lausuntopalvelu-siiddus oidnojit 18 cealkámuša láhkaárvalusas.

Beargadaga iđida rádjái sámeservviin Oulu sámit -searvi, Suoma Sámi dáiddasearvi, Johtti Sápmelaččat -searvi ja Sámi Árvvut -searvi leat doaimmahan cealkámuša láhkaárvalusas

Buot cealkámušat leat almmolaččat ja galget doaimmahuvvot Lausuntopalvelu–nammasaš neahttasiidui.

Sámediggeláhkaevttohus manná stáhtaráđi gieđahallamii plána mielde vuossárgga 17.9. Dalle stáhtaráđđi mearrida, ovdanbuktágo dat láhkaevttohusa riikkabeivvide.

Evttohus ii ovdán riikkabeivviide, jos sámediggi ii dohkket evttohusa. Sámediggi gieđahallá ášši 14.9.

Eanodaga gielda viggá dorvvastit ministarii seailluhan dihte girdivuoruid

Eanodaga gielda deaivá lávvardaga 28.7.2018 ealáhusministtar Mika Lintilä Roavenjárggas. Eanodaga gielda háliida buktit ministarii ovdan Eanodaga girdivuoruid heaittiheami, muitala gielddahoavda Jari Rantapelkonen.

Gieskat almmuhedje, ahte Girdifitnodat Finnair ii girdde Helssegis Eanodahkii šat boahtte dálvve.

Mannan dálvve Finnair girddii Heahttái njukča- ja cuoŋománu áigge, muhto boahtte dálvve dohko eai girdde. Finnairis muitalit, ahte Helsset-Eanodat gaska ii lean gánnáhahtti

Dutkit: Deanus fuones luossajahki, unnán gorgŋon stuorra luosat

Detnui leat gorgŋon dán geasi unnit luosat maid dutkit ledje vuordán. Dán dieđu dutkit vuođđudit sihke skádjaseasánii ja maiddái salašalmmuhusaide, maid guolásteaddjit leat máhcahan.

Stuorra, badjel 7 kilo guliid leat goddán unnán, eaige badjel 20 kilo luosaidge leat máŋga goddán. Dittit baicce leat gorgŋon eanet go diibmá, muhto eai datge dutkiid mielde olu leat jogas.

Luondduriggodatguovddáža dutki Panu Orell lei vuordán buoret luossageasi muhto ii leat lihkká hirpmástuvvan das man unnán luosat gorgŋo johkii. Loahpalaš dieđuid luossamearis ožžot gárvvisin golggot-skábmamánus.

Varrasamosat: Sápmi

Váldoođđasat

Varrasamosat