Sápmi |

Sáhkabihtážat Yle Sámis: Ovttaveardásašvuođaáittardeaddji boahtá Sápmái ságastallat sámegielat árrabajásgeassima dilis ja EJB-guovddáš divvugoahtá šaldiid Deanuleagis

Dá leat vahku maŋimuš Sáhkabihtážat.

Jietna: Kirsi Pimiä.
Jietna
Ovttaveardásašvuođaáittardeaddji Kirsi Pimiä lea mielde ságastallandilálašvuođain, main áigot háleštit sámegielat árrabajásgeassima dilis. Guldal dás bearjadaga rádioođđasiid Sámis. Jietna: Yle Areena. Govva: Ritva Torikka / Yle

Ovttaveardásašvuođaáittardeaddji boahtá Sápmái ságastallat sámegielat árrabajásgeassima dilis

Sámediggi ságastallá sámegielat árrabajásgeassima dilis ovttaveardásašvuođaáittardeaddji Kirsi Pimiäin ja sámeguovllu gielddain. Sámediggi lea fuolas sámegielat árrabajásgeassima dilis, go gelbbolaš bargiid ja sadjásaččaid, geat máhttet sámegiela, lea váttis gávdnat.

Sámediggi ságastallá dilis ovttaveardásašvuođaáittardeaddjin ja Eanodaga, Anára ja Ohcejoga gielddain ságastallandilálašvuođain, mat ordnejuvvojit boahtte vahkus. Ulbmilin lea gávnnahit vugiid dili buorideapmái ja sámegielat árrabajásgeassinbargiid noađi geahpedeapmái.

Nákkosdutkamuš: Eurohpá olmmošvuoigatvuođaduopmostuolus buorit vejolašvuođat dorvvastit sámi vuoigatvuođaid

Sámeváidagat sáhttet dán áigge birget buorebut Eurohpá olmmošvuoigatvuođaduopmostuolus go ovdal. Dát boahtá ovdán nákkosdutkamušas, mii otne bearjadaga dárkkistuvvo Tampere universitehtas.

Nákkáhalli Heta Heiskanen buktá ovdan doavttirgrádadutkamušastis (TamPub, Tampere universihtehta), ahte Eurohpá olmmošvuoigatvuođaduopmostuolus ii leat ovdánan dakkár vuoigatvuođageavadat, mii livčče dorvvastan beaktilit eamiálbmotvuoigatvuođaid. Nákkosdutkamuš čájeha, ahte duopmostuolus livčče goittotge buorit vejolašvuođat sápmelaš vuoigatvuođaid dorvvasteapmái.

Heiskanen čállá, ahte Eurohpá olmmošvuoigatvuođaduopmostuollu lea dorvvastan soahpamušartihkal 8 vehkiin rašis joavkkuid earenoamáš eallinvuogi. Seammalágan argumeanttašuvnna lea vejolaš geavahit sámekultuvrra suodjaleapmái. Dálá vuoigatvuođaortnegis lea eaktun sierralágan prošeavttaid oktavuođas árvvoštallat prošeavttaid kultuvrralašváikkuhusaid. Heiskanen mielde gullangeatnegasvuohta lea dakkár, masa sáhttá čujuhit go guoddala sámekultuvrra áitagiin. Dála riikkaidgaskasaš álgoálbmotvuoigatvuođaid ovdánupmi dorjjošii su dulkoma, gávnnaha Heiskanen nákkosgirjjistis.

EJB-guovddáš divvugoahtá šaldiid Deanuleagis

Lappi EJB-guovddáš divvu dán geasi Ohcejoga ja Njuorggáma gaskkas geainnu Viđgaveaji šaldi buohta. Divvunbarggut álget miessemánu 15. beaivve ja bistet suoidnemánu beallemuttu rádjai.

Miessemánu 15. beaivvi rájes maiddái Gáregasnjárgga ja Ohcejoga gaskkas Dálvadasas divvugohtet Njiljoga šaldi ja Nuvvos ja Bađoš gaskkas fas Hánnojoga šaldi.

Buot dáid sajiin divvunbarggut hehttejit johtolaga. Šaldiin lea geavahusas dušše nubbi bealli geainnus ja leaktoráddjehus lea 30 kilomehtera diimmus.

Árktalaš Álgoálbmot Filbmafoandda stivra lea ásahuvvon

Árktalaš Álgoálbmot Filbmafoandda stivra lea ásahuvvon ja dan jođihišgoahtá Kuupik V. Kleis Ruonáeatnamis. Kleist lea politihkkár ja árabut doaibmán earret eará Ruonáeatnama stáhtaministtarin.

Eará stivralahtut leat irlándalaš filbmabuvttadeaddji ja European Film Academy várreságajođiheaddji Mike Downey, Norgga Festspillene I Nord-Norge direktevra Maria Utsi, sámi filbmabagadalli ja neavttár Nils Gaup, filbmabuvttadeaddji Sardana Savvina Ruoššas ja Nunavut Film Development Corporation direktevra Huw Eirug Kanadas.

Internašunála Sámi Filbmainstituhtta almmuhii njukčamánus, ahte dat ásaha ovttasbarggus eará árktalaš guovlluid institašuvnnaiguin Árktalaš Álgoálbmot Filbmafoandda. Ovttasbargoguoimmit leat Canada Media Fund, Nunavut Film Development Corporation, Greenland Film makers - FILM. GL ja Archy Ruoššas.

Foandda ulbmilin lea ovddidit alla dását árktalaš álgoálbmotfilbmaprošeavttaid ja oktasašbuvttademiid, mat ovddidit álgoálbmogiid kultuvrraid, gielaid ja servodagaid.

SSN čoahkkana Ohcejohkii jahkečoahkkimii

Suoma Sámi Nuorat čoahkkaánit vahku geahčen Ohcejohkii jahkečoahkkimii. Čoahkkimis válljejit ođđa hálddahusa, rievdadit njuolggadusaid ja mannet čađa ruhtadoalloloahpaheami. Dasa lassin sii ordnejit bargobáji Gáregasnjárgii plánejuvvon Moratoria várás. Searvi bivdá almmuhit iežas čoahkkimii maŋimustá boahtte sotnabeaivve miessemánu 13. beaivve.

Varrasamosat: Sápmi

Váldoođđasat

Varrasamosat

Muualla Yle.fi:ssä