Sápmi |

Sáhkabihtážat Yle Sámis: Sáhkut čikŋajeahkáliid doahpumis ja Dearpmážii háliidit maid govdaoali

Loga dás duorastaga sáhkabihtážiid.

Jietna: Jäkälää.
Jietna
Ruoŧas almmái sáhkohalai suolavuođas go doabui čikŋajeahkáliid leanastivrra lobi haga. Guldal, maid eará muitalat Yle Ođđasiin Sámis. Jietna: Yle Areena. Govva: Paulus Markkula / Yle

Sáhkohalai suolavuođas go doabui čikŋajeahkáliid

Ruoŧas leat addán sáhku albmái, guhte doabui stuorra meriid jeahkáliid lobi haga. Östersund gearretriekti sáhkuhii albmá suolavuođas, go son lei čoaggán 180 gássa čikŋajeahkáliid leanastivrra lobi haga.

Almmái lei gal ožžon lobi váldit jeahkáliid eatnama láigolaččas nappo bivdofitnodaga ovddasteaddjis, muhto sus ii lean čoaggimii leanastivrra lohpi. Dat gáibiduvvo dalle go čoaggá stuorra meriid jeahkáliid. Rihkus dáhpáhuvai Härjedalenis jagis 2017.

Gearretriekti mearridii albmái 30 beaivesáhku, maid sturrodat lea 50 kruvnnu beaivvis. Áššis muitala SVT Jämtland.

Dearpmážii maid háliidit govdaoali

Maiddái Dearpmáža gillái sávvet oažžut govdaoali. Anára gielddaráđđehus mieđihii gieskat Dearpmáža govdaoalleoasusgoddái 5 000 euro loana ášši ovddideapmái ja prošeaktaruhtaohcamuša válmmaštallamii.

Nu gohčoduvvon gilifierpmit sáhttet oažžut Lappi EBI-guovddážis 70 proseantta doarjaga huksengoluide, loahppagoluid nappo 30 proseantta galgá čoaggit priváhtasuorggis.

Avvila guovllus Tolonen gillái huksejuvvui govdaoalli jahki dassái seammalágan doarjjaruđaiguin.

Sápmelaččaid mytologiijas almmustuvvá girji

Sápmelaččaid dološ oskkus ja mytologiijas almmustahtto girji. Oskkoldatdutkit Juha Pentikäinen ja Risto Pulkkinen almmustahttiba “Saamelainen mytologia” -girjji Turku girjemeassuin boahtte lávvardaga.

Girji gieđahallá earet eará sápmelaččaid historjjá, eallinvuogi, máilmmigova ja dološ oskku. Juha Pentikäinen lea máilmmi viidosaččat dovddus álbmotoskku, mytologiija ja folklore dutki. Risto Pulkkinen lea Helssega universitehta oskkoldatdiehtagiid doseanta ja Lappi universitehta davvi etnografiija doseanta ja Suoma evangelalaš-luteralaš girku báhppa.

Guovžabivddus ávžžuhit váldit vuhtii dihtoeari

Suoma fuođđoguovddáš ávžžuha boazodoalloguovllu guovžabivdiid váldit vuhtii dihtomearredili ja goddon guovžžaid almmuheami dakka viđe guovžža báhčima maŋŋá.

Boazodoalloguovllu nuorttabeale 75 guovžža dihtomearis leat vel čieža guovžža gottekeahttá. Eanemus guovžžaid leat goddán dán čavčča bivddus Suomussalmis (32), Guossámis (19) ja Anáris (9).

Suoma fuođđoguovddáš ávžžuha meahccebivdiid váldit vuhtii dihtomearredili guovžabivddus eandalii dál go dihtomearrebivdu lea dievvamin. Jus dihtomearri reahkká loahpa rádjai, guovžabivdu nohká maŋimustá golggotmánu 31. beaivve.

Varrasamosat: Sápmi

Váldoođđasat

Varrasamosat

Muualla Yle.fi:ssä