Kaikki talviolympialaisista!
Sápmi |

Sáhkabihtážat Yle Sámis: Sakatti ruvkefidnu birasváikkuhusaid árvvoštallan álgán ja riikkaidgaskasaš TV-ráiddu govvemat jođus Sámis

Dá leat duorastaga sáhkabihtážat Yle Sámis.

Raate kukkii, Viiankiaapa
Viiankiaapa Soađegilis. Govva: Jukka Brusila

Sakatti ruvkefidnu birasváikkuhusaid árvvoštallanmeannudeapmi álgán

Lappi EJB-guovddáš lea álggahan suodjaluvvon Viiankiaapa -guvlui plánejuvvon Sakatti ruvkefidnu birasváikkuhusaid árvvoštallanmeannudeami Soađegilis. BVÁ-meannudeami oktavuođas áigot gullat eiseválddiid ja daid, geaidda fidnu sáhttá váikkuhit. Dasa lassin gullet dakkár servodagaid ja vuođđudusaid, maid doaibmasuorgái fidnu váikkuhusat sáhttet čuohcat.

Maiddái álbmogis lea vejolašvuohta čálalaččat buktit ovdan oaiviliid árvvoštallanprográmmas. BVÁ-prográmmas dollojuvvo maiddái álbmotdilálašvuohta guovvamánu 22. beaivve Soađegili gielddaviesus.

Riikkaidgaskasaš TV-ráiddu govvemat jođus Sámis

Riikkaidgaskasaš TV-ráiddu leat govvegoahtán davimus Suomas. Rihkusprográmmaráidu, man namma lea Ivalo dahje Arctic Circle, govvejuvvo Anáris ja Ohcejogas dán giđa áigge, guovvamánus gitta cuoŋománnui. Dat buvttaduvvo suopmelaš-duiskalaš ovttasbargun.

Davviriikkaid stuorámus indie -filmmaid buvttadanfitnodat Yellow Film & TV ja okta Eurohpá stuorámus buvttadanfitnodagain, Bavaria Fiction, buvttadit ráiddu ovttas. TV-ráiddu máilmmi vuosttašeahket lea dán jagi loahpas Elisa Viihde TV-bálvalusas, ja dan maŋŋá dan čájeha maiddái Yle.

Ráiddu bagadalli lea Hannu Salonen ja váldorollaid nektet beakkán suopmelaš neavttárat: Iina Kuustonen, Pihla Viitala ja Jari Virman. Govvenjoavku lea bivdán maid báikki olbmuin veahki govvemiidda.

ivalo arctic circle
Ivalo- Arctic Circle TV-ráiddus lea mielde earret eará Iina Kuustonen. Govva: Yellow Film & TV

Lobihis beanagárddi eaiggát vuolgán Anáris

Rivdola lobihis beanagárddi oamasteaddji lea vuolgán eret Anáris. Duiskalaš fitnodatdoalli, guhte lei ceggen Rivdolii beanagárddi lobiheamet gieldda eatnama ala, lei jávkan guovllus juo ovdal mihcamáraid, muitala Anár gieldda teknihkalaš hoavda Arto Leppälä.

Badjelaš jahki dassái báikkálaččat almmuhedje beatnagiin, mat ruhtte luovus gilis ja hehttejedje boazoealáhusa ja turismafitnodagaid. Dasto čielggai, ahte beanagárddi fitnodatdoallis ii lean lohpi hukset gárddi dan guvlui. Fitnodatdoalli ledje dáhtton vuolgit eret geassemánu rádjai, ja son leige vuolgán ovdal mihcamáraid ja čorgen iežas maŋis.

Bártedutkanguovddážis rávvagat golmma sámegillii

Bártedutkanguovddáš (OTKES, sg. Onnettomuustutkintakeskus) lea almmustahttán gullanvuloža vuoigatvuođaid ja geatnegasvuođaid golmma sámegillii. Dorvvolašvuođa dutkanlága mielde lihkohisvuođaid dutkamis sáhttet gullat bártti dehe várálaš dáhpáhusa oasálaččaid, áššedovdiid ja earáid, geain navdet oažžut dárbbašlaš dieđuid lihkohisvuođaid dutkamii.

Gullanvuloža vuoigatvuođain ja geatnegasvuođain sáhttá dál lohkat davvi- anáraš ja nuortalašgillii Bártedutkanguovddáža neahttasiiddus.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä