Sápmi |

Sáhkabihtážat Yle Sámis: Sámediggelága ođasmahttin ii ovdán riikkabeivviide ja Anára skuvlla sisáibmováttisvuođaid dutkagohtet

Loga dás gaskavahku sáhkabihtážiid.

Sámediggelága ođasmahttin ii ovdán riikkabeivviide ja Anára skuvlla sisáibmováttisvuođaid dutkagohtet, earret eará dáid áššiid muitalit gaskavahku Yle Ođđasiin Sámis. Jietna: Yle Areena

Sámediggelága ođasmahttin ii ovdán riikkabeivviide

Vuoigatvuođaministeriija mielde sis eai leat ákkat doalvut sámediggeláhkaevttohusa ovddos guvlui almmá Sámedikki dohkkeheami.

– Sámediggelága ođasmahttin livččii sisttisdoallan guovddáš nuppástusaid sámiid iežaset giela ja kultuvrra guoskevaš iešráđđemii, cealká vuoigatvuođaministeriija dieđáhusastis.

Ministeriija gávnnaha, ahte das eai leat eavttut doalvut láhkaevttohusa ovddasguvlui almmá sámedikki dohkkeheami.

Sámedikki dievasčoahkkin mearridii vuossárgga hilgut láhkaevttohusa nuppástusa. Ráđđehusa evttohus ođđa sámediggeláhkan livččii rievdadan earet eará jietnavuoigatvuođakriteraid sámediggeválggain.

Anára skuvlla sisáibmováttisvuođaid siva dutkagohtet

Anára skuvllas čielggadišgohtet dárkilabbot sisáibmováttisvuođaid sivaid. Skuvllas leamašan sisáibmováttisvuođat giđa rájes. Giđđat skuvllas bieđganii lieggasa molsunrusttet ja álgočavčča skuvllas dáhpáhuvai čáhcevahát.

Inarin koulun neljällä kielellä
Anára skuvlla sisáibmodilli lea šaddan vearrábun. Govva: Yle Sápmi
Gieldda dearvvasvuođadárkkisteaddji Minna Saramo-Nissilä mielde dát earenoamáš dáhpáhusat lea dahkan vearrábun sisáibmováttisvuođaid.

– Dáid sivaid dihte Anára skuvllas áigot čielggadišgoahtit dárkilabbot sisáibmováttisvuođa sivaid ja mihtidandutkamušaid áigot bargat jagi 2019 álggus, dieđiha Anár gieldda dearvvasvuođaossodat.

Skuvllaid sisáibmováttisvuođat leat beaggán miehtá Suoma. Yle čielggadeami mielde Sámeguovllus, Ohcejoga, Anára ja Soađegili gielddain masá 800 vuođđoskuvlla oahppi vázzet skuvlla gaskaboddasaš skuvlavisttiin.

Giellarávvehaga goalmmát njuolggosáddagis sáhka árrabajásgeassimis

Sámi giellarávvehat joatká neahttarávvensáddagiid sáddema. Giellarávvehaga Facebook-njuolggosáddagis gieđahallet sámegielat árrabajásgeassima ja giellabeassedoaimma. Áššedovdin sáddagis leat anáraš-, davvi- ja nuortalašgielat giellabeasi bargit ja giellaáššedovdit.

Mánná lohká sámegielat girjji.
Lape-fidnu ovttas Sámedikkiin lea giđđat álggahan sápmelaš giellarávvehaga, man ulbmilin lea oahpistit ja rávvet sámegielat mánáid vánhemiid. Govva: Yle Sápmi

Laura Arola ja Annika Pasanen kommentereba ságastallama giellaealáskahttima ja gielladutkamuša oainnus, dieđiha Sámi giellarávvehat.

Giellarávvehat lea duorastaga 27.9. diibmu 18-20. Sáddaga áigge ságastalliide sáhttá sáddet gažaldagaid, mat gusket máná máŋggagielat ovdáneami ja sámi árrabajásgeassima. Dan sáhttá čuovvut dáppe.

Skábmagovat-festiválii ohcet buvttadeaddji

Sámedáidaga doarjjasearvi ohcá festiválabuvttadeaddji buvttadit Skábmagovat-filbmafestivála. Barggu áigodat lea 15.10.2018–28.2.2019.

Festivála buvttadeaddji bargu lea dikšut festiválabuvttadeapmái gullevaš áššiid dego filbmakopiijaid skáhppon, deaddiluvvon filbmaprográmmas fuolaheapmi ja siidodáhpáhusaid koordineren.

Ohcamuša čuvvosiiguin galgá sáddet čujuhussii sunna.nousuniemi(a)skabmagovat.fi maŋimustá 7.10.2018.

Varrasamosat: Sápmi

Váldoođđasat

Varrasamosat

Muualla Yle.fi:ssä