Sápmi |

Sáhkabihtážat Yle Sámis: Sámenuoraid vásihan seksuálalaš heađušteamis ságastallet Anáris ja báikkálaččaid guolástusrivttiide evttohit nuppástusaid

Loga dás vahku maŋimuš sáhkabihtážiid.

Jietna: Sámenuorat
Jietna
Sámenuoraid vásihan seksuálalaš heađušteapmi sáhkan otne Anáris. Jietna: Yle Areena. Govva: Sámediggi

Sámenuoraid vásihan seksuálalaš heađušteapmi sáhkan otne Anáris

Anáris ságastallet bearjadaga sámenuoraid vásihan seksuálalaš heađušteamis ja -veahkaválddis. Fáttá birra lágiduvvo seminára ja bargobájit.

– Lea dehálaš bajidit fáttá oidnosii, daningo fáttábirra dávjá jávohuvvo, dieđiha Sámedikki nuoraidráđđi.

Seminára geahččala addit bargoneavvuid seksuálalašveahkaválddi vásihan nuorain deaivvadeapmái ja su doarjumii sihke iežas vásáhusaid gieđahallamii. Bargobájiid ulbmilin lea, ahte sámenuorat besset juogadit iežaset vásáhusaid ja jurdagiid seksuálalaš heađušteamis ja veahkaválddis.

Seminára ordne Sámedikki nuoraidráđđi ja bargobájiid ordnejit Suoma sámedikki nuoraidráđđi oktasašbarggus kanádalaš áššedovdijoavkkuin, sosiála- ja dearvvasvuođaministeriijain ja árktalaš ráđiin. Seminára lea 5.10.2018 dii. 9.00–15.30.

Veskonjárgga guollehámmana rusttegiidda ruhta

Anára Veskonjárgga (ašg. Viäskoonjargâ) guollehámmana lásten - ja burginkája huksemii leat mieđihan lagabui 0,3 miljovnna euro EU ruhtadeami.

Ruhtadeapmi boahtá Eurohpá mearra- ja guolledoalu ruhtarájus Lappi EBI-guovddáža bokte. Ođđa lásten- ja burginkádja buorida guolásteddjiid bargodorvvolašvuođa ja dili. Dat maid ovddida guollebuktagiid kvalitehta.

Veskonjárgga bokte johtá stuorra oassi Anárjávrri gávppálaš guollebivddus bivdojuvvon sálašiš, sullii 50000 kilo jagis.

Lappi EBI-guovddáš mieđihii ruhtadoarjaga maiddái Gárasavvon guovllu govdaoalleprošektii. Ruhtadeapmi boahtá Eurohpá eanangodderuhtarájus ja ruhtadeapmi lea mieđihuvvon doaresbeale guovlluid interneahttabálvalusaid buorideapmái. Seamma ruhtajuolludeami gilifirpmiid ovddideapmái mieđihuvvui ruhta maiddái Vaattojärvii, Sieppijärvii ja Ruohokarii.

Sámedikki stivrra ságastallandilálašvuođat joatkašuvvet fas – dán vuoro dilálašvuohta Gárasavvonis

Sámedikki stivra lágidan ságastallandilálašvuođat joatkašuvvet fas vuossárgga 8.10.2018. Dán vuoro stivra deaivá sápmelaččaid Gárasavvonis. Dilálašvuohta lea Gárasavvon kapeallas vuossárgga dii. 18–20. Dilálašvuođa ulbmil lea deaivvadit guovllu sápmelaččaiguin ja ságastallat singuin áigeguovdilis áššiin.

– Ságastallandilálašvuođaid ulbmilin lea nannet sámeservoša ovttasbarggu ja Sámedikki gaskasaš dialoga oktasaš áššiid ovddideami dihte. Helssega ja Vuohču dilálašvuođat leat čájehan dan, ahte dákkár eahpevirggálaš ságastallandilálašvuođaide lea dárbu, dadjá Sámedikki ságadoalli Tiina Sanila-Aikio.

Sámedikki stivra áigu vel dán čakčabajis ordnet ságastallandilálašvuođaid Ohcejogas ja Anáris.

Sámediggi mearridii jagi 2018 doaibmaplánastis , ahte stivrra čoahkkimat ordnejuvvojit vejolašvuođaid mielde Ohcejogas, Vuohčus, Helssegis,Eanodaga Gárasavvonis ja Anáris. Seamma oktavuođas stivra ordne maiddái ságastallandilálašvuođaid guovllu olbmuide.

Báikkálaččaid guolástusrivttiide evttohit nuppástusaid

Eana- ja meahccedoalloministeriija evttoha guolástusláhkii nuppástusaid, mat buoridivčče davimus gielddaid ássiid guolástusrivttiid.

Jus evttohus manná čađa, Eanodaga, Anára ja Ohcejoga ássit sáhtašedje skáhppot luosa ja dápmoha gođđujogaide nu gohčoduvvon bivdobadjelobi. Bivdobadjelohpi guoskkašii Deanu, Njávdán- , Duollán-, Durdnos- ja Ovnnesjogaid ja Báhčaveai oalgejogaide ja ja dainna báikkálaččat sáhtašedje guolástit iežaset gielddas.

Bivdolobi hatti leat lohpidan leat govttolaš. Ministeriijas eai goit vel muital, man ollu Davvi-Lappi lohpi šattašii máksit, dasgo dan birra mearriduvvo maŋŋelils. Vuolleahkásaččaide lohpi livčče nuvttá.

Dál Davvi-Lappi gielddaid báikkálaš olbmot leat gártan skáhppot turisttaid láhkai jándorlobiid Deanu, Njávdán- ja Duollánjogaid ja Báhčaveaičázádagaid oalgejogaide. Seamma dilli leamaš maiddái Durdnos- ja Ovnnesjogaid oalgejogain. Máŋggat báikkálaš olbmot leat báhcán guollebivdolobiid haga go turisttat ja báikkálaččat leat oastán seamma lobi ja lobit leamašan dušše ráddjejuvvon mearri vuovdimassii. Loga áššis eanet suomagillii dáppe.

5.10.2018 dii. 12.25 Lasihuvvon vel Báhčaveai čázádat guolástusriekteođđasii.

Varrasamosat: Sápmi

Váldoođđasat

Varrasamosat