Sápmi |

Sáhkabihtážat Yle Sámis: Sámi bálgosiid searvi lea registrerenvuollái ja Ohcejoga sámelogahat lea Suoma nubbin buoremus logahat

Loga dán artihkkalis maŋŋebárgga ođasbihtážiid.

Asko Länsman
Asko Länsman lea merkejuvvon ságadoallin Sámi bálgosat -searvái, man registererenalmmuhus lea dál Pateanta- ja registerhálddahusa gieđahallamis. Govva: Yle Sápmi

Sámi bálgosiid oktasašsearvvis guđđojuvvon registrerenalmmuhus

Sámi bálgosat leat guođđán registrerenalmmuhusa iežaset searvvis. Pateanta- ja registerhálddahussii lea guđđojuvvon skábmamánu 1. beaivve registeralmmuhus searvvis, man namma lea Sámi bálgosat rs ja suomagillii Saamelaispaliskunnat ry.

Pateanta- ja registerhálddahusa dieđuid mielde searvvi ruovttubáikin lea merkejuvvon Eanodat ja ságadoallin Gálddoaivve badjeolmmoš Asko Länsman. Länsman lea maiddái Bálgosiid ovttastusa stivralahttu jagi 2017 loahpa rádjái. Pateanta- ja registerhálddahusa mielde searvvi registreren lea ain gieđahallamis.

Ohcejoga sámelogahat lea Suoma nubbin buoremus logahat

Ohcejoga sámelogahat lea Suoma diehtodoaimmahat STT ollašuhttán riikkaviidosaš logahatveardádallamis Suoma nubbin buoremus logahat, ja Lappi eanagotti buoremus. Suoma buoremus logahat lea ruoŧagielat Kristinestads gymnasium Kristiinankaupunkis. Ohcejoga logahaga lassin 30 buoremusa joavkkus leat maiddái Muoná ja Soađegili logahagat. Muoná logahat lei veardádallamis 19. ja Soađegili logahat 25.

STT veardádalai daid ohppiid gaskaárvvuid, geat ledje váldán skuvlensaji vuostá čakčat 2014 ja olles dán jagi studeanttačállosiid bohtosiid. Giđđat Ohcejoga sámelogahat lei seamma veardádallamis riikkaviidosaččat goalmmát.

Áššis muitala Lapin Kansa -aviisa.

Boaldámuštrailer lea gopmánan Soađegili gieldda máttaoasis

Váralaš ávdnasiid fievrridan boaldámuštrailer vujii badjel luotta ja gopmánii Soađegili gieldda máttaoasis Raudanjoki ja Käyrämö gaskkas maŋŋebárgga iđitbeaivve. Boaldámušávdnasat eai leat beassan golgat eatnamii.

Sámegielddaid Jagi fitnodatdoallit leat válljejuvvon

Ohcejogas Tenonlaakson yrittäjät -searvi lea válljen njuorggánlaš Antti Johansen Jagi fitnodatdoallin 2017. Son oamasta Johansen Oy ruovdegávppi. Áššis muitalii vuosttamužžan Lapin Kansa -aviisa.

Anára Jagi 2017 fitnodatdoalli lea rássegávpejas Mimmi Turunen Avvilis. Son nammaduvvui dán jagi maiddái Jagi rássegávpejassan. Anára Jagi 2017 nuorra fitnodatdoallin nammaduvvui ruvvejeaddji Juho Jumisko.

Eanodaga Jagi 2017 fitnodatdoallin leaba válljejuvvon J Ad Rantakokko Oy:s Erkki ja Jane Rantakokko. Soai doallaba Heahtás K-gávppi, man oktavuođas lea maiddái ruovdegávpi. Fitnodat devddii dán jagi 90-jagi. 30 jagi dassái Erkki Rantakokko váhnemat oaččuiga Jagi fitnodatdoalli -bálkkašumi seamma fitnodagas.

Soađegili Jagi 2017 fitnodahkan válljejuvvui Joiku-Kotsamo Safaris.

Trump áigu unnidit eamiálbmogiidda dehálaš luonddusuodjalanguovllu

USA presideanta Donald Trump lea almmuhan, ahte son áigu unnidit guovtti suodjalanguovllu Utah oassestáhtas USA oarjeoasis. Trump hálida unnidit 85 proseantta Bears Ears -luonddusuodjalanguovllu, mii lea beaggán rukses kanjovnnain. Sullii 5000 njealjehasmehtera luonddusuodjalanguovllus leat aŋkke logit duháhat eamiálbmogiid báktesárgosat ja olbmobiejut.

Eamiálbmogiid ja birasorganisašuvnnaid ovddasteaddjit leat álggahan riekteproseassaid mearrádusa vuostá. Mearrádus rahpá bálgá energiijafitnodagaide ja eará gávppálaš fitnodagaide luonddumeahci guvlui.

Ovddit presideanta Barack Obama vuođđudii Bears Ears -luonddumeahci álbmotlaš muitomearkan juovlamánus 2016.

Trump mearridii maiddái unnidit beliin Grand Staircase-Escalante luonddumeahci.

kartta jossa Utah ja luonnonpuistot
Govva: Yle Uutisgrafiikka

Varrasamosat: Sápmi

Váldoođđasat

Varrasamosat

Muualla Yle.fi:ssä