Sápmi |

Sáhkabihtážat Yle Sámis: Sámi nieida válljejuvvui Norgga čábbámussan ja vel geargá searvat servodataktivismma skuvlejupmái

Loga dás vuossárgga sáhkabihtážiid.

MISS NORWAY 2018: Susanne Næss Guttorm ovddasta Norgga Miss Universe -gilvvuin.
MISS NORWAY 2018: Susanne Næss Guttorm ovddasta Norgga Miss Universe -gilvvuin. Govva: Anne Biret Holmestrand / NRK

Sámi nieida válljejuvvui Norgga čábbámussan

Kárášjohkalaš Susanne Næss Guttorm lea vuoitán Miss Norway -gilvvu. 21-jahkásaš sámi nieida kruvnniduvvui lávvardaga Norgga čábbámussan. Son lea vuosttas sápmelaš, guhte lea vuoitán Miss Norway -gilvvu. Næss Guttorm lei maiddái gehččiid mielas buot čábbámus.

– Lean lihkolaš. Giittán buohkaid, geat leat dorjon mu, dajai Næss Guttorm gilvvu maŋŋá.

Dál sus lea vejolašvuohta ovddastit Norgga Miss Universum -gilvvuin maŋŋelaš dán jagi.

– Das šaddá somá. Lean niegadan dan birra. Dat mearkkaša munnje hui olu, dadjá Norgga čábbámus nisson.

Áššis muitalii NRK Sápmi.

LK: Almmái lea jávkán Anáris, boles navdá albmá heavvanan

Boles ohcá albmá Anárjávrris lahka Njellima fanashámmana. Su jáhkket gahččan fatnasis. Bolesa dáhtto veahkkin ohcat albmá lávvardaga maŋŋit eahkes. Boles navdá albmá heavvanan.

Albmá leat ohcan fanaspatrullain ja ávkin leat maiddái geavahan drone nappo girdikámera. Ođđa bolespatrulla lea vuossárgga iđđes vuolgán ohcat albmá. Áššis muitala Lapin Kansa -aviisa.

Eanodaga gielda ohcá sosiálabargi-skuvlakuráhtora

Eanodaga gielda lea bidjan rábas sosiálabargi-skuvlakuráhtora mearreáigásaš virggi. Sosiálabargi-skuvlakuráhtor doaibmá oasi bargoáiggistis, álggos 50 %, oahpahusdoaimma vuloš skuvlakuráhtorin. Sosiáladoaimma barggut leat rávesolbmuid sosiálabarggu ja lápmásiid bálvalusa barggut.

Virgi lea mearreáigásaš 31.12.2020 rádjai. Virgi devdojuvvo 1.9.2018 rájes dahje soahpamuša mielde. Sámegiela máhttu gehččojuvvo ovdun. Bargoaddi doarju bargoveaga sámegiela máhtu ovddideami, ja máhttoskáhppoma.

Ohcamuša galgá doaimmahit Eanodaga gieldda sosiáladoaimmahahkii 13.8.2018 diibmu 15.00 rádjai,

Lassedieđuid addiba vuođđodorvohoavda Annikki Kallioniemi ja sámegielat ovddideaddji-sosiálabargi Anne-Maria Näkkäläjärvi.

Skuvlejit servodataktivismii – almmuhanáigi skuvlejupmái nohká

Ihttin maŋŋebárgga lea maŋimuš beaivi ohcat NVDA-skuvlejupmái, man ordnejit Greenpeace, Suoma Sámi Nuorat ja Suohpanterror.

Skuvlejumis oahpásmuvvet veahkaválddehis riikavulošdoaimma vuođđojurdagiidda ja vugiide, teoriija ja geavatlaš hárjehusaid bokte. Skuvlejumis maiddái ságastallet daid áššiid mearkkašumis sápmelaččaid vuoigatvuođaid bealušteamis, ovddideamis ja birasgáhttemis.

Iežas sáhttá almmuhit skuvlejupmái dán neahttaliŋkka bokte. Skuvlejupmi ordnejuvvo 31.8.-2.9.2018 Anáris.

Skuvlejupmi lea váldoáššis dárkkuhuvvon sámenuoraide, geat leat 13–29-jahkásaččat. Dát lea SSN:a lahtuid ahkerádji. Skuvlejupmái goit sáhttet ohcat earátge.

Sámi gielddat máhccet geasseluomus

Sámi gielddat máhccet geasseluomuin. Anára, Soađegili ja Ohcejoga gielddadálut leat rabas otnáža rájes.

Eanodaga gielda joatká luopmoáiggi vel dán vahkku ja rahpá uvssaidis easkka boahtte vuossárgga. Maiddái Sámedikki čállingoddi lea rabas boahtte vahku rájes.

Beaiváduvvon 30.7.2018 dii 10:55: Lasihuvvon ođas jávkán albmás.

Varrasamosat: Sápmi

Váldoođđasat

Varrasamosat

Muualla Yle.fi:ssä