Sápmi |

Sáhkabihtážat Yle Sámis: Sámisoster ávvuda 20-jagi doaimma, gielkávuoddji heavvanii Soađegilis ja gielladikšunseminára Anáris

Dá beasat lohkat duorastaga sáhkabihtážiid.

SámiSoster ry
Govva: www.samisoster.fi

Sámisoster ávvuda 20-jagi doaimma

Suoma riikkaviidosaš sápmelaččaid sosiála- ja dearvvasvuođasuorggi searvi SámiSoster lea dál doaibman 20 jagi. Dan gudnin searvi ordne iežas lahtuide ja ovttasbargoguimmiide ávvuseminára, man temán lea sápmelaččaid buresbirgejumi ovddideapmi. Seminára ordnejuvvo otne duorastaga Anáris Lásse-goađis ja dat álgá diibmu 11.

Gielkávuoddji heavvanii Unarijávrái

Mohtorgielkávuoddji heavvanii Soađegili Unarijávrái maŋŋebárgga, go vujii suddái. Su ohcagohte maŋŋebárgga eahkes, go son ii dihtton ijastallanbáikkis. Unarijávrris gávdnui suddi, masa mohtorgielkká luodda nogai. Buokči gávnnai albmá suttis maŋŋebárgga eahkes. Boles háliida muittuhit, ahte jieŋat leat rašit.

Gielladikšunseminára Anáris

Sámi Giellagáldu ordne odne davvisámegiela gielladikšunseminára Anáris Sámekulturguovddáš Sajosis. Beaivvi fáddan lea davvisámegiela dilli ja gielladikšun. Seminára álgá logi áigge ja bistá njealji rádjái. Dan sáhttá čuovvut neahtastreama bokte.

Sátnegirjjit.
Govva: Yle Sápmi

Olbmot eai almmut johtolatlihkohisvuođain beare dávjá

Suoma Heahteguovddášlágádusas oaivvildit, ahte olbmot eai láve almmuhit johtolatlihkohisvuođain eiseválddiide doarvái aktiivvalaččat. Davvi-Suomas šaddet dávjá lihkohisvuođat, main olbmot eai almmuhit eiseválddiide, ja main eai dasto sáhte váruhit eará johttiid. Ovdamearkka dihte eiseválddit eai goassige oaččo dieđu máŋggaid olgoriikkalaš traileriid dagahan johtolatboatkkain váldogeaidnu 21:žis Gilbbesjávrris máttás.

Heahteguovddášlágádus muittuha, ahte lihkohisvuođain galgá riŋget heahtenummirii 112 álo, jos lihkohisvuohta dagaha váralaš dili eará johtolatgeavaheddjiide.

Maŋimuš beaivi almmuhit iežas Gáregasnjárgga dánsunleirii

Gáregasnjárggas ordnejuvvo vahkuloahpas suoma- ja davvisámegielat dánsunleaira, mii lea oaivvilduvvon badjel 10-jahkásaš mánáide. Oahpaheaddjin leaba breakdánsu Jimi Kettunen ja baleahttadánsu Auri Ahola. Ordnejeaddjit geahččalit maid ordnet oktasaš sáhtuid eiseválddiide geat bohtet Ohcejoga, Anára ja Eanodaga guovllus.

Leaira álgá lávvardaga diibmu 11 ja nohká sotnabeaivvi. Otne lea maŋimuš beaivi almmuhit iežas dohko. Almmuhemiid váldá vuostá Merja Pieski.

Varrasamosat: Sápmi

Váldoođđasat

Varrasamosat

Muualla Yle.fi:ssä