Sápmi |

Sáhkabihtážat Yle Sámis: Sámmol Ánde Lukkari Sámi Siida -searvvi ságadoallin ja stáhtadoarjagat giellalávgundoaimmaide leat ohcanláhkái

Dá leat maŋŋebárgga Sáhkabihtážat.

Jietna: Sammol Antti Lukkari
Jietna
Sámmol Ánde Lukkari lea Sámi Siida -searvvi stivrra ođđa ságadoalli. Guldal dás maŋŋebárgga rádioođđasiid. Jietna: Yle Areena. Govva: Linnea Rasmus / Yle

Sámmol Ánde Lukkari jođihišgoahtá Sámi Siida -searvvi

Ohcejoga sámesearvi Sámi Siida válljii ikte jahkečoahkkimisttis searvái ođđa stivrra. Ságadoallin válljejuvvui Sámmol Ánde Lukkari, várreságadoallin Elle Kaaren Aikio ja stivrralahttun Elle Ravna, Aslak Holmberg ja Åsa Márgget Anti. Stivrra várrelahtut leat Beaska Niillas, Máret Ingá Länsman, Aura Mari Pieski, Eila Laiti ja Aslak Pieski.

Stáhtadoarjagat giellalávgundoaimmaide leat ohcanláhkái

Jagi 2018 stáhtadoarjagat giellalávgundoaimmaid ovddideapmái leat dál ohcan láhkái (Oahpahusráđđehus). Juohkinláhkái lea 842 000 euro.

Suoma giellaskuvlenpolitihka mielde stáhtadoarjagiid ulbmilin lea lasihit ja viiddidit suopmelaččaid giellamáhtu giellalávgun- ja eará guovttegielat oahpahusa ovddidemiin. Stáhtadoarjagat leat oaivvilduvvon árrabajásgeassima, ovdaoahpahusa ja vuođđooahpahusa ordnejeaddjiide. Ohcanáigi nohká geassemánu 6. beaivve diibmu 16.15.

– Ovddit jagiin dát stáhta earenoamášdoarjagat leat mieđihuvvon maiddái sámi giellalávgundoaimmaid ovddideapmái. Veahkkeruđaid leat ožžon earret eará Ohcejoga, Soađegili, Enodaga, Gihttela ja Roavvenjárgga gielddat, muitala Sámedikki skuvlenčálli Ulla Aikio-Puoskari.

UK-álbmotmeahci rájá áigot nuppástuhttit

Birasministeriija lea plánemin nuppástuhttit Urho Kekkonen álbmotmeahci rájá. Álbmotmeahci davvenuortti oassái áigot laktit measta 200 hektára meahcceguovllu, maid áigot suodjalit. Tankavári luondduguovddáža birrasis fas váldojuvvošii vuolil 10 hektára sturrosaš guovlu eret álbmotmeahcis, vai luondduguovddáža sáhtášedje geavahit ja ovddidit buorebut. Birasministeriija bivdáge dál cealkámušaid rájá nuppástuhttimis geassemánu njealját beaivvi rádjai.

Anárjávrri luossaguliid sálašmearri niejai ja čuovžasálaš stuorui diibmá

Anárjávrris godde diibmá sullii 165 tonna guoli, dieđiha Luondduriggodatguovddáš Luke. Luossaguliid sálašmearri niejai measta gávcci tonna ja čuovžasálaš stuorui sullii logi tonna. Sivvan čuovžasállaša meari stuorrumii lei ámmátguolásteaddjiid ja sin fierpmebivddu lassáneapmi. Ámmátguolásteaddjit godde olles sálašmearis 36 proseantta, ruovttudárboguolásteaddjit 43 proseantta ja guolásteaddjit Anár gieldda olggobealde 21 proseantta.

Luke lea álggahan Anárjávrri guollegilvima dán jahkái

Luondduriggodatguovddáš Luke dieđiha maiddái, ahte dat lea álggahan dán jagáš guollegilvima Anárjávrái. Dán jagi áigot gilvit sullii 340 000 bátneguolleveajeha ja 234 000 bodnečuovžaveajeha. Anárjávrái leat gilvináigodaga 2016-2020 áigge gilvigoahtán dušše Juvdujoga dápmoha, vai eará dápmotnáli guolit eai gorkŋoše gođđat Juvdujohkii. Maiddái Avvil- ja Čivttajoga čázádagaide gilvet dušše joga iežas dápmotnáli veajehiid.

Varrasamosat: Sápmi

Váldoođđasat

Varrasamosat