Sápmi |

Sáhkabihtážat Yle Sámis: Soađegili Jagi Fitnodat lea Joiku-Kotsamo Safaris ja Sámedikki delegašuvdna galleda Estteeatnama

Dá sáhkabihtážat otná beaivái.

Joiku-Kotsamo Safaris
Timo ja Armi Palonoja leaba jođihan iežaska fitnodaga fargga 27 jagi. Govva: Joiku-Kotsamo Safaris

Joiku-Kotsamo Safaris lea Soađegili Jagi Fitnodat 2017

Soađegili fitnodatdolliid searvi lea válljen Armi ja Timo Palonoja fitnodaga, Joiku-Kotsamo Safaris, Jagi Fitnodahkan. Bálkkašumi mieđihedje lávvardaga 25.10. searvvi jahkedoaluin.

– Munnuide dát bođii áibbas vuorddekeahttá. Mii goit doaibmat guovtti gielddas ja leat vásihan, ahte Anáris min jietna ii gullo, go mii leat Soađegili gielddas, ja Soađegilis fas jurddašit, ahte mii doaibmat Anára bealde. Dát bođii positiivvalaččat vuorddekeahttá, illuda Armi Palonoja.

Boahtte jagi álggus Joiku-Kotsamo Safaris -bearašfitnodat lea doaibman 27-jagi Suoločielggis. Sin váldobargun lea fállat boazotuvrraid. Fitnodagas barget logi olbmo.

– Giitosat gullet min bargiide, sin haga mii eat leat mihkkige, rábmo Armi Palonoja.

Sámerivttiid čalmmustahttet Estteeatnamis

Sámedikki delegašuvdna galleda Estteeatnama álbmotmusea Tartto gávpogis otne 28.11. ja ordne logaldallama sámi politihkas ja servvodagas.

Sáhkavuoruid doppe dollet Sámedikki lahtut Pentti Pieski ja Áslat Holmberg ja Suoma Sámi Nuoraid ságadoalli Petra Laiti. Eaŋgalasgielat ságastallama jođiha Oliver Loode eamiálbmogiid ovddidanguovddážis (Indigenous Peoples’ Development Centre NGO).

Dilálašvuohta ordnejuvvo diibmu 17.30-19.00.

Viron kansallismuseo ulkoa
Eesti Rahva Muuseum nappo Estteeatnama álbmotmusea lea Tartto gávpogis. Govva: Sanna Vilkman/Yle

Suomas eai leat dánge jagi áican mearkkaid njála čivggain

Meahciráđđehus lea dahkan geasset ja dál dálvet njálaid bessendárkkistemiid vádjit 230 sierra beassái Davvi-Sámis. Eanodagas gávdne ovtta aktiivvalaš njállabeasi, mas eai goittotge riegádan čivggat.

Suomas maŋimuš sihkkaris njálačivgabeassi lea leamašan jagis 1996. Sullii čuohte jagi dassái njálla lei dábálaš Suomas. Njallanáli gahččamii eai leat sihkkaris sivat. Dál njála stuorámus áitta lea dálkkádatrievdan ja rieban.

Riistakamerakuva naalista
Suomas maŋimuš diehtu njálačivgabeasis leamašan badjelaš 20 jagi dassái. Govva: Metsähallitus

Eanodagas ohcet ain giellabeassebargi

Eanodaga gielda ohcá sámegielat bearašbeaivedivššára Heahtá giellabeassedoaimma várás. Eanodaga gielda lea geahččalan oččodit giellabeassedoaimma johtui dán čavčča, muhto ii leat vel dán rádjái lihkostuvvan gávdnat dasa bargiid.

Bearašbeaivedivššára bargu lea mearreáigásaš ja álgá jagi 2018 álggus ja bistá jahkebeali. Gelbbolašvuođagáibádussan lea bearašbeaivedivššára ámmátdutkkus dahje eará vástideaddji skuvlejupmi. Ohcamušat galget leat siste juovlamánu 8. beaivve.

Divvojuvvon 28.11.2017 diibmu 12:14: Ođđasis čuoččui, ahte njálla lei Suomas dábálaš moaddelot jagi dassái. Das lea goit juo sullii čuohte jagi.

Varrasamosat: Sápmi

Váldoođđasat

Varrasamosat

Muualla Yle.fi:ssä