Sápmi |

Sáhkabihtážat Yle Sámis: Solju-joavku lea jagi Etnotekijä ja ministtar Mykkänen boahtá Eanodahkii háleštit bolesdilis

Dá leat duorastaga sáhkabihtážat Yle Sámis.

Jietna: Ijahis Idja 2018
Jietna
Hildá Länsman ja Ulla Pirttijärvi-Länsman almmustahtiiga giđđat Solju-joavkkuineaskka Ođđa áigodat -skearru, mii dál bálkkašuvvui Suoma Musihkkagoasttideaddjiid searvvi bealis. Dá gulat duorastaga Yle Ođđasiid Sámis. Jietna: Yle Areena. Govva: Vesa Toppari / Yle

Solju-joavku lea jagi Etnotekijä

Ulla Pirttijärvi-Länsman ja HIldá Länsman Solju-joavku lea ožžon Suoma Musihkkagoasttideaddjiid "genre friija" -bálkkašumi, mii dán jagi lei jagi Etnotekijä. Ikte gaskavahku ordnejuvvon dilálašvuođas musihkkadahkkit bálkkašuvvojedje viđa sierra kategoriijas, main okta lea genre friija.

Soljju válljejumi meroštalai Radio Helsinki sisdoallojođiheaddji Maria Veitola, guhte iežas sániid mielde ráhkista Solju musihkas modearna urbána jietnaduovdagiid seaguhusa.

– Dat doalvu guldaleaddji seamma áigge guhkás universumii ja boahtá lihkká liikki ala. Imašlaš seaguhus eksistentiála áibbašeami ja olmmošlaš liekkusvuođa.

Suoma Musihkkagoasttideaddjiid searvi juolludii 2 000 euro sturrosaš bálkkašumiid dán jagi viđát geardde.

Ministtar Mykkänen boahtá Eanodahkii háleštit bolesdilis

Sisáššiid ministtar Kai Mykkänen lea ihttin bearjadaga Eanodaga Heahtás. Ministtar hálešta gieldda ovddasteaddjiiguin Eanodaga bolesdilis.

Ministtar Mykkänen lei dat guhte evttohii lasseruđa bolesii ráđđehusa bušeahttaráđđádallamiin. Ráđđehus mieđihii mannan vahkus 3,3 miljon euro doaresbealguovlluid bolesvirggiid lasiheapmái.

Vel ii leat diehtu, oažžugo Eanodat iežas bolespatrulla ruovttoluotta. Eanodagas ii leat leamašan boles njukčamánu rájes, go bolesdoaimma ruđaid leat hálidan seastit.

UArctic-konferánssas čalmmustahttet maid sápmelaččaid guoski áššiid

Helssegis ja Oulus ordnejuvvo dán vahkus viiddis UArctic-konferánsa, mas guorahallet earret eará árktalaš guovllu birrasa ja dálkkádaga boahtteáiggi. Dan oktavuođas lágiduvvojit máŋggat dilálašvuođat, main leat ovdan maiddái sápmelaččaid áššit.

Ovdamearkka dihte otne duorastaga Helssegis ordnejuvvo panelaságastallan jiekŋameara ruovdemáđijas, birasáššiin ja eamiálbmotrivttiin. Panelastan ságastallamis leat sámedikki ságadoalli Tiina Sanila-Aikio, birasláhkaprofessor Kai Kokko, Árktalaš ekonomiija ráđi ságadoalli Tero Vauraste, Johtolatdoaimmahaga áššedovdi Anni Rimpiläinen ja video bokte vel sámi ovttastusaid ovddasteaddjit.

Dát buohkaide rabas dilálašvuohta lágiduvvo Helssega universitehta váldovistti nuppi gearddis diibmu 16.00–17.30.

Oulu universitehtasges lágiduvvo duorastaga dáhpáhus, mas guorahallet seksuála vehádagaid dili árktalaš guovllus. Doppe leat sápmelaččaid ovddasteaddjin eamiálbmotdutkamuša dutkiprofessor Jovnna Jon Ánne Kirste Rávdná, Rauna Kuokkanen, dáidaga magisttar Stina Roos ja Norgga Sámedikki ráđđelahttu Mikkel Eskil Mikkelsen.

Rabas dilálašvuohta lea Oulu universitehtas diibmu 8.30–15.00.

Varrasamosat: Sápmi

Váldoođđasat

Varrasamosat

Muualla Yle.fi:ssä