Koe uusi yle.fi
Sápmi |

Sáhkabihtážat Yle Sámis: Tráiler vujii vuot badjel luotta Giehtaruohttasis, lobihemiid bivdojuvvon guliin šaddá máksit ja juoiganbargobádji Ohcejogas

Dá beasat lohkat gaskavahku sáhkabihtážiid.

Tráiler gopmánan
Tráiler vujii gilggalassii Báljohtnjálmmi ja Heahtá gaskas 29.11.2017. Govva: Yle / Anni-Saara Paltto

Lobiheamet bivdojuvvon guliide haddi

Suomas áigot boahttevuođas meroštallat hatti lobiheamet bivdojuvvon guliide. Dáinnalágiin áigot iskkat geahpedit lobihis bivddu.

Suoma eana- ja vuovdedoalloministeriija lea čielggadišgoahtán, makkár rievdadusaid guolástanláhka gáibida vai dát ođastus ollašuvvá. Jurdda lea, ahte boahtte jagi lobiheamet bivdojuvvon guliid hattiid meroštalašii Suoma Luondduriggodatguovddáš.

Suoma eana- ja vuovdedoallominister Jari Leppä sávvá, ahte ođastus eastádivččii lobihis bivddu. Seammás dat čájehivččii, ahte eandalitge áitatvuloš guollenáliid lobihis bivdu ii leat dohkkalaš ja dagaha ruđalaš massima daidda geat geahččalit dorvvastit guollenáliid.

Lohi.
Govva: Minna Aula / Yle

Tráilerat eai biso geainnu alde Giehtaruohttasis

Giehtaruohttasa guovllus Davvi-Suomas olbmot leat dolkan tráileriidda ja guorbmebiillaide, mat eai biso geainnu alde muhto baicce dagahit boatkkaid johtolahkii. Ovdamearkka dihte maŋŋebárgga biillavuoddjit gárte vuot vuordit váldogeainnu 21:žis Muoná ja Gilbbesjávrri gaskas go olgoriikkalaš trailera gesse ruovttoluotta geainnu ala. Dat lei juo goalmmát beaivi maŋŋálágaid go ná geavai. Maiddái otne gaskavahku olgoriikkalaš trailer vujii badjel luotta ja gopmánii.

Olbmot leat áican, ahte dáid fievrruid rieggát eai leat heivvolaččat dálvesiivvuide. Lappi ealáhus-, johtolat- ja birasguovddáža bajit hoavda Jaakko Ylinampa muitala, ahte tráilerat vudjet maiddái oalle garra leávttuin fuonitge siivvuin ja muhtumin guovdu geainnu dahje joba boasttu bealde luotta. Johtolaga bearráigeahčču geahpedivččii rihkkumušaid ja lasihivččii motivašuvnna vuodjit njuolggádusaid mielde, muhto dálá dilis dasa ii leat ruhta, dadjá Jaakko Ylinampa EJB-guovddážis.

Tráilera rieggát
Gaskavahku gopmánan tráilera rieggát eai leat dárkkuhuvvon dálvesiivui. Govva: Yle / Anni-Saara Paltto

Juoiganbargobádji Ohcejogas

Hildá Länsman ja Nicholas Francett doallaba Ohcejoga skuvllas dán vahku lávvardaga 2.12. juoiganbargobáji dmu 12 rájes. Dat lea oaivvilduvvon nuoraide. Juoiganbargobádjái lea ain vejolašvuohta almmuhit iežas mielde. Almmuheamit kaisa.tapiola-lansman@samediggi.fi, 050 382 5179 dahje facebook bokte.

Maŋimuš beaivi ohcat Gáregasnjárgii Veahkke-Ásllagin

Ohcejoga gielda ohcá Gáregasnjárgii boarrásiid veahki nappo Veahkke-Ásllaga áigodahkii 1.3.- 31.12.2018. Otne gaskvahkko lea maŋimuš beaivi ohcat dán bargui. Veahkke-Ásllaga bargguide gullá earret eará boarrásiid ja mielladearvvasvuođaveajuiduvviid ruovttus ássama doarjun, dego boaldinmuoraid čuollan, šilljobarggut, smávva divvunbarggut ja eará doarjja. Ohcanáigi nohká diibmu 15.

Beaividuvvon 29.11. diibmu 12.26: Bájilčállaga ja ođđasiid ortnet rievdaduvvon.

Beaividuvvon 29.11. diibmu 14.12: Lasihuvvon maŋimuš diehtu ja ođđa govat Giehttaruohttasa tráileriin, ja bajilčálus "Sáhkabihtážat Yle Sámis: Lobihemiid bivdojuvvon guliin šaddá máksit, juoiganbargobádji Ohcejogas ja tráilerat eai biso geainnu alde Giehtaruohttasis" rievdaduvvon hábmái "Sáhkabihtážat Yle Sámis: Tráiler vujii vuot badjel luotta Giehtaruohttasis, Lobihemiid bivdojuvvon guliin šaddá máksit ja juoiganbargobádji Ohcejogas".

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä