Sápmi |

Sáhkabihtážat Yle Sámis: Vuosttaš digitála oahppomateriála almmustahttojuvvon, Sámi Giellagáldu doaibma joatkašuvvá gáržžiduvvon hámis

Vahku maŋimus sáhkabihtážat.

Jietna: Govva Gea 1 Gollemeahcci neahtasiiddus.
Jietna
Jietna: Yle Areena

Sámedikki skuvlen- ja oahppomateriáladoaimmahat lea almmustahttán vuosttaš digitála oahppomateriála

Oahppomateriála namma lea Gea 1 Gollemeahcci ja dat lea dárkkuhuvvon vuolleskuvlla vuosttaš luohká ohppiide, geat lohket davvisámegiela vierisgiellan. Digimateriála ja dan hárjehusat fállet Gea 1 -lohkangirjji sisdoalu digitála hámis, nu ahte materiála lea sihke jietnagirji ja digitála oahppamateriála. Dás beasat Gea 1 Gollemeahcci -digitála oahppomateriálii.

Skuvlen- ja oahppamateriáladoaimmahat ráhkada digitála oahppamateriálaid buot sámegielaide, mat hubmojuvvojit Suomas. Davvisámegillii lea boahtime ovdaskuvlla birasdieđu oahppamateriála. Anárašgillii ráhkadit dán geasi mielde digimateriála viđát ja guđát luohká servodatoahpa ja historjjá oahppoávdnasiidda. Dáid lassin plánan lea ráhkadit oahpahusfilmmažiid guđege giela bustávain.

Sámi Giellagáldu doaimmat joatkašuvvet gáržžiduvvon hámis jagi 2018 lohppii

Giellagáldu-joatkkaprošeakta nogai miessemánu loahpas, muhto sámegielaid normerenbargu joatkašuvvá. Ovdal Sámi Giellagáldu doaimmat leat ruhtaduvvon Interreg-prošeaktaruhtademiin, muhto dál Sámedikkit leat gávdnan gaskaboddosaš čovdosa davviriikalaš giellaovttasbarggu ruhtadeapmái.

Sámi Giellagáldu doaimmat joatkašuvvet uhcit resurssaiguin dán jagi lohppii.

Ohcejogas dárbu visttiide, mat heivejit bearrašiidda

Ohcejoga gieldda giddodatfitnodat Ringinvatro áigu hukset Ohcejoga gildii guokte ođđa ráidodálu, nuppi Gáregasnjárgii ja nuppi Ohcejoga girkosiidii. Gielddas lea čielga dárbu maiddái visttiide, mat heivejit bearrašiidda.

Ohcejoga gielda evttoha, ahte giddodatfitnodat Ringinvatro, man gielda oamasta, ordne fálaldatgilvvu bearašvisttiid, dego párradálu huksenfidnu várás. Go huksengolut ja ruhtadeami dárbu leat dieđus, gielddaráđđehus evttoha gieldda váldostivrii, ahte dat dáhkida Giddodatfitnodat Ringinvatro loana. Dasa lassin gielddaráđđehus evttoha gielddastivrii, ahte gielda čatnasa láigohit visttiid dihto áigái dahje muđui dorvvastit fidnu ollašuvvama.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä