Sápmi |

Sáhkabihtážat Yle Sámis: West ja Länsman mielde Helsset gávpoga iehčanasvuođadoaluin ja Garraduodji-girji jorgaluvvo anáraš- ja nuortalašgielaide

Dá beasat lohkat bearjadaga sáhkabihtážiid.

Suvi West
Sápmelaš filbmabagadalli Suvi West ja Suomas beaggán guoimmuheaddji Cristal Snow láidesteaba doaluid. Govva: Yle

Helsset čalmmustahttá sápmelaččaid

Helssega máŋggakultuvrralaš iehčanasvuođabeaivvi ávvudoaluin čalmmustahttet maiddái sápmelašvuođa. Prográmmas leat iešguđet kultuvrraid ja etnalaš duogážiid ovddasteaddji dáiddáriid čájáhusat.

Doaluin loaiddasta earret eará sámeartista Hildá Länsman ja dáhpáhusa láidesteaba sápmelaš filbmabagadalli Suvi West ja Suomas beaggán guoimmuheaddji Cristal Snow.

Máŋggakultuvrralaš iehčanasvuođabeaivvi ávvudoalut lágiduvvojit Suoma iehčanasvuođabeaivve boahtte gaskavahku guđat, juovlamánu Helssegis Finlandia-dálus .

hilda länsman
Hildá Länsman loaiddasta Helsset máŋggakultuvrralaš iehčanasvuođabeaivvi. Govva: Linda Tammela / Yle Sápmi

Garraduodji-girji jorgaluvvo

Garraduodji-girji jorgaluvvo anáraš- ja nuortalašgielaide. Sámi oahpahusguovddáža buvttadan Garraduodji – girji almmustuvai borgemánus 2017.

Sámedikki oahppomateriálalávdegoddi jorgalahttá girjji anáraš- ja nuortalašgillii, ja jorgalusat heivehuvvojit iešguđege giellajoavkku kultuvrii dain osiin, gokko gávnnahuvvo dárbbašlažžan.

Anárašgiela oasil bargu álgá juo álgojagis 2018.

SámiSoster-searvi álggaha Doaibmaviesu Vuohčus

SámiSoster-searvi álggaha boahtte jagi áigge vuorrásut olbmuide dárkkuhuvvon doaimma Vuohčus. Sosiála- ja dearvvasvuođaservviid ruhtadangáldu STEA lea bearjadaga 1.12. evttohan, ahte SámiSosterii juolluduvvošii ruhta Vuohču doaimma várás. Loahpalaš mearrádusa ruhtajuolludemiin dahká sosiála- ja dearvvasvuođaministeriija.

Vuohču doaibma čuovvu Anára doaibmaviesu málle. Anáris ahkeolbmuide dárkkuhuvvon doaibmaviessu lea dál rabas oktii vahkus. SámiSoster-searvvi doaimmajođiheaddji Ristenrauna Magga lea movtta go Vuohču doaibma beassá johtui.

– Mii leat nu máŋga jagi dieinna bargan, dál ozaimet jo goalmmát geardde ruhtadeami Vuohču doaimma várás, muitala Ristenrauna Magga. SámiSoster searvi álgá dakkaviđe plánet doaimma ja dieđiha dárkilabbot plánain maŋŋelaš.

Vuohču doaibmaviesu ollašuhttet ovttas SámiSosteriin Soađegili gielda ja Kemijoki oy.

Maid davvin vuovdebargit bággolupmui

Suoma stáhta eatnamiid hálddašeaddji Meahciráđđehus bidjá vádjit 200 vuovdečuolli baggolupmui, man áigge eai mávsse bálkká. Mearrádusa ulbmil lea seastit sullii miljon euro boahtte jagi.

Puupino
Maid davvin vuovdebargit gártet bálkkáhis bággolupmui. Govva: Maiju Saijets / Yle

– Davimus Sámis leat 11 vuovdečuolli, sis guđas gitta gávcci olbmui gártet bálkkáhis baggolupmui, dadjá Meahciráđđehusa vuovdedikšunhoavda Heikki Savolainen.

Baggoluopmu álgá ođđajagimánus ja nohká njukčamánus.

Lappi girdigittiid fitnan dán jagi miljovnna girdimátkkošteaddji 

Finavia muitala, ahte odne lea dat beaivi, go Lappi girdigittiin leat fitnan miljovnna girdimátkkošteaddji, dán jagi. Finavia Lappi girdigiettit leat Roavvenjárgga, Gihttela, Avvila, Giema-Durdnosa ja Eanodaga girdigiettit.

Miljovnnat girdimátkkošteaddji lei Heli Rauhala, guhte bođii Gihttela girdigieddái Norwegiana girdiin bearjadaga iđitbeaivve. Sutnje skeŋkejedje rásiid ja girdibileahtaid.

Bearjadaga lea davviriikkalaš čáskadanalárbmabeaivi

Suoma gádjunsuorggi guovddášsearvi SPEK muittuha ruovttuid čáskadanalárpmaid dehálašvuođas. Searvvi dieđuid mielde suopmelaš ruovttuin lea menddo unnán čáskadanalárpmat, ja dat mat gáhtuin leat, eai vealttekeahttá doaimma.

Čáskadanalárpma galgá lonuhit ođđa alárbmii viđa dahje logi jagi gaskkaid, ja dasa galgá lonuhit báhtteriid ja dan galgá testet jeavddalaččat.

Ohcejogas mihttiduvvui vuot dálvvi buolašolahus

Ohcejoga Geavus mihttiduvvui bearjadatiđđes gávcci áigge 30,6 buolašceahki. Eahkeda rádjai goit bivalda sullii ovcci ceahkkái.

Dálkeeinnostus bearjadahkii 1.12.2017.
Dálkeeinnostus bearjadahkii 1.12.2017. Govva: Yle

Beaividuvvon 1.12.2017 dii 12:07: Lasihuvvon ođas Vuohču doaibmaviesus.

Beividuvvon 1.12.2017 dii 14:49:  Lasihuvvon ođas Lappi girdigittiid miljovnnat girdimátkkošteaddjis.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä