Sápmi |

Sáhkabihtážat Yle Sámis: Yle Kääntäjäkarhu-diktabálkkašupmi mieđihuvvui sámediktačoakkáldahkii

Dá leat duorastaga sáhkabihtážat.

Kaisa Ahvenjärvi.
Kaisa Ahvenjärvi lea ožžon Yleisradio Kääntäjäkarhu-diktabálkkašumi. Govva: Anneli Lappalainen / Yle

Yle Kääntäjäkarhu-diktabálkkašupmi mieđihuvvui sámediktačoakkáldahkii

Sámi girjjálašvuođa ja dáidaga dutki Kaisa Ahvenjärvii lea mieđihuvvon Yleisradio Tanssiva karhu -jorgaleaddjibálkkašupmi, Kääntäjäkarhu. Kaisa Ahvenjärvi oažžu 1 500 euro bálkkašumi Tuulisolmut-nammasaš čoakkáldagas, mii čalmmustahttá sápmelaš dálá lyrihka. Ahvenjärvi lea jorgalan čoakkáldahkii njeallje norgga sápmelaš diktačálli divttaid, sii leat Hege Siri, Rawdna Carita Eira, Irene Larsen ja Sigbjørn Skåden.

4 000 euro sturrosaš váldobálkkašumi oaččui Lassi Hyvärinen diktačoakkáldat Tuuli ja kissa. Yleisradio lea juohkán Tanssiva karhu -diktabálkkašumiid jagi 1994 rájes.

Sámi allaskuvllas leat ain rabas oahpposajit boahtte čakčii

Sámi allaskuvllas Guovdageainnus leat ain rabas oahpposajit oahpuide, mat álget čakčat. Sámi allaskuvlii sáhttá ain ohcat studeret sámegiela ja sámi girjjálašvuođa masterprográmmii ja doavttirgrádaoahpuide, sámi journalistihka bacheloroahpuide ja Sámi vuođđoskuvlaoahpaheaddjioahpuide. Dasa lassin leat olu ovttaskas oahppoollisvuođat, maidda sáhttá ain ohcat earret eará boazodoalus, duojis, sámegielas, servodatdiehtagis, journalistihkas ja oahpaheaddjioahpuin.

Lasi dieđu gávnnat Sámi allaskuvlla neahttasiiddus.

Luossariemuid ordnemii váillahit eaktodáhtolaš bargiid

Árbevirolaš Luossariemut-oaggungilvu lágiduvvo boahtte lávvardaga Ohcejogas jagi bottu maŋŋá. Luossariemuid ordnejeaddji Ohcejoga eränkävijät searvi váillahage dál eaktodáhtolaš bargiid dáhpáhusa ordnemiidda. Eaktodáhtolaš bargguide sáhttá searvat otne duorastaga diibmu viđa rájes ja bearjadaga diibmu njealji rájes Ohcejohnjálmmi Busteldearpmis.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä