Sápmi

Sállevári bálggus doalai diibmá bottu mearkumiin goavvejagi dihte muhto dál orru miessái – Geahča video Sarvvesčoalmmis

Video: Elli-Saara Äärelä
Miessemearkun čohkke olles bálgosa oktii. Doaimmaheaddji Sara Wesslin galledii Sállevári miessemearkumiid Sarvvesčoalmmis gaskavahko. Video: Ylen Aamu

Boazodoalli Elli-Saara Äärelä mielas miessemearkun lea okta geasi dehálamos dáhpáhusain ja son leage ilus, go beassá deaivvadit fas fulkkiidis ja siidaguimmiidis. Äärelä lei mielde Suoma váldegottálaš iđit tv-sáddagis.

Sállevári bálgosis Anáris leat geargan dál miessemearkumiin. Heijá Ánne Elle-Sárá nappo Elli-Saara Äärelä lea duđavaš, go beasai dál merket misiidis Sarvvesčoalmmis go Sállevári bálggus ii čohkken ealu miessemearkumii diibmá goavvejagi dihte.

Äärelä mielde miesitge ledje eambo go diibmá.

– Mis lei diibmá nu jalla heittot dálvi ja jápme olu bohccot, iige dálge leat nu stuoris dat eallu. Hui somáhan dat lea boahtit deike, oaidnit iežas bohccuid ja olbmuid, go diibmá eat beassan deaivvadit, muitala Äärelä.

Miessemearkun lea maid dehálaš árbevierru, masa láktasit olu muittut. Su mánnávuođas mearkumat soite bistit vahkkuid, ja dalle ii lean geasge hoahpu.

– Go mii leimmet Bealdoduoddaris, ja galggaimet orrut doppe lávuin vahkoviisáid. Dathan lei diennalágiin, ahte mii leimmet birra jándora ovttas, dáppehan juohke okta lea iežas hyttas ja manná ruoktot.

– Dat lei dalle hui earálágan máilbmi, go gulláimet de manaimet daid lávuid mielde ja mis lei hui olu oktasaš áigi, iihan dál ovttasge leat nu olu áigi mannat guossis ja ná, dieđusge dáppe beassá oaidnit ja hupmat, joatká Äärelä.

Vasanmerkkuuta Sallivaaran paliskunnassa kesällä 2021.
Äärelä mielde goavvejahki vuhtto ain, muhto dát jahki orru goittot miessái. Govva: Sara Wesslin / Yle

Olbmuid oaidnin ja singuin háleštallan leage Elli-Saara Äärelä mielas okta dehálamos oassi miessemearkumis.

– Lea issoras somá, go olbmot leat buorre mielas ja buohkat leat čoahkkanan deike. Dakkár ovttasbargu ja gullevašvuođadovdu lea badjeolbmuin dáppe. Ja dieđusge dat, go merket misiid ja oaidnit daid bohccuid, dat lea doppe váimmus, lohká Äärelä.

Guldal Elli-Saara Äärelä jearahallama dás.

Varrasamosat

Muualla Yle.fi:ssä