Sápmi |

Sámeáššiid ráđđádallanbeaivvit ja ministtardeaivvadeapmi: beavddi alde earret eará koronavirus ja sámiid rievttit

Ministtardeaivvadeami olis juhkkojuvvo gaskavahku sámi giellabálkkašupmi Gollegiella.

 Kuvassa on Anna-Maja Henriksson.
Suoma riekteministtar Anna-Maja Henriksson atná dehálažžan ministariid ja sámedikkiid ovttasbarggu. Govva: Silja Viitala / Yle

Dán vahkus leat dehálaš ságastallamat Sámedikki ovddasteaddjiiguin ja sámi áššiid ovddasvástideaddji ministariiguin.

Sámeáššiid jahkásaš ráđđádallanbeaivvit leat jođus. Dán jagi ráđđádallanbeivviid temát leat eamiálbmogiid vuoigatvuođaid ollašuhttin Suomas. Ráđđádallamiin ságastallojuvvo ovdamearkka dihte sápmelaš ealáhusaiguin bargi olbmuid sosiáladorvvu ovddideames. Dasa lassin temán lea maid sámegiela ja -kultuvrra guoski mearreruđaid oppalašdili árvvoštallan.

Vuoigatvuođaministeriija ja Sámediggi leat koordineren ráđđádallanbeivviid ja dat lágiduvvojit dál guđát geardde.

Sámedikki beales ráđđádallanbeivviide oassálastet ságajođiheaddji Tuomas Aslak Juuso, vuosttaš várreságadoalli Anni Koivisto, nubbi várreságadoalli Leo Aikio, hálddahushoavda Pia Ruotsala-Kangasniemi ja Sámedikki sierra sektoriid virgeolbmot. Guovtti beaivve ráđđádallamat nohket odne.

Ministariid ja sámediggenjunnošiid čoahkkimis koronavirus, sámesoahpamuš ja Giellagáldu

Sámi áššiid ovddasvástideaddji ministarat ja sámedikkiid ságadoallit deaivvadit gáiddusoktavuođain ihttin gaskavahku. Suoma riekteministtar Anna-Maja Henriksson doaibmá čoahkkima ságadoallin.

Ministarat ja sámedikkiid ságadoallit Tuomas Aslak Juuso, Aili Keskitalo ja Per-Olof Nutti ságastallet earret eará davviriikkalaš sámi soahpamuša gieđahallamis, Sámi Giellagáldu vuođđudeamis ja koronaepidemiija váikkuhusas sámi álbmogii.

– Anán sámi áššiin ovddasvástideaddji ministariid ja buot golmma riikka sámedikkiid ovttasbarggu duođaid dehálažžan, muitala riekteministtar Anna-Maja Henriksson riekteministeriija dieđáhusas.

Čoahkkima olis juhkkojuvvo sámi giellabálkkašupmi Gollegiella

Gaskavahku čoahkkimis juhkkojuvvo davviriikkalaš sámi giellabálkkašupmi Gollegiella.

Bálkkašumi ulbmilin lea gudnejahttit sámegielaid ovddideami. Bálkkašupmi geigejuvvo priváhtaolbmuide dehe servošiidda Norggas, Ruoŧas, Suomas dehe Ruoššas. Bálkkašumi sturrodat lea 15 000 euro.

Varrasamosat: Sápmi

Váldoođđasat

Varrasamosat

Muualla Yle.fi:ssä