Sápmi

Sámebáhppa Mari Valjakka rahpá farga iežas árgabeaivvi buohkaide ođđa tv-ráiddus – sutnje lea dehálaš, ahte sámeáššit begget

Mari Valjakka
Sámebáhppa Mari Valjakka mielas lei váttis govvet iežas eallima kámerai. Seammás dat lei goittotge su mielas hui miellagiddevaš. Son jáhkká, ahte prográmma bokte váldoálbmot beassá oahpásmuvvat sámiid áššiide. Govva: Ilmari Fabritius / Yle

Papisto-ráiddu bokte geahččit besset oahpásmuvvat njealje báhpa árgaeallimii ja bargui. Okta báhpain lea sámebáhppa Mari Valjakka.

Guldal maid sámebáhppa Mari Valjakka jurddaša das ahte lea mielde Papisto-ráiddus. Jietna: Sáárá Seipiharju / Yle

Sámebáhppa Mari Valjakka Avvilis lea mielde Yle buvttadan Papisto-prográmmas. Juovlamánu 20. beaivvi rájes televisios soaitáge oaidnit oahpes olbmuid ja báikkiid.

Prográmma ulbmilin lea nuppástuhttit olbmuid miellagovaid das, makkár lea báhpa eallin. Prográmma geahččit besset čuovvut njealje báhpa priváhta eallima ja daid beliid sin barggus, maid eat dábálaččat oainne.

Valjakka vulggii fárrui prográmmii vai Sápmi ja sámeáššit beasašedje oidnosii.

– Munnje lea dehálaš, ahte maiddái min olbmot livčče TV-prográmmain mielde ja maiddái min áigeguovdilis áššit ja čáppa luondu boađášedje oidnosii.

Sámi áššit eai vealttakeahttá leat oahppásat buohkaide ja dat dagahii hástalusaid govvemii.

– Galggašii seammás oba áigge čilget sámeáššiid, go eaihan Mátta-Suomas olbmot várra ipmir visot min áigeguovdilis áššiin dahje hástalusain.

Papisto
Prográmmas leat mielde báhpat Elina Koivisto, Harri Henttinen, Mari Valjakka ja Tarvo Laakso. Valjakka vuordá beassat oaidnit, maid earát leat govven. Govva: Ilmari Fabritius / Yle

Koronadili geažil Valjakka gárttai govvet ieš ollu

Sámebáhppa Mari Valjakka bivde fárrui Papisto-prográmmii diibmá giđđat. Ovdal go govvemat álge, Suopma sirdásii spiehkastatdillái ja dat rievdadii visot.

Dábálaš dilis Valjakka livčče johtán miehtá máilmmi čoahkkimiin, daningo son lea girkuid máilmmiráđi álgoálbmogiid referánsajoavkku ságadoalli. Spiehkastatdili geažil su kaleandar guorranii ja son bargagođii dihtoriin ruovttus.

– Dallehan mii bijaimet uvssaid gitta girkuin. Dat lei áibba earenoamáš áigi midjiide girkus, muittaša Valjakka.

Koronadili geažil govvematge eai mannan nu go ledje plánen. Álggus govvenjoavku ii sáhttán girdit davás ja Valjakka fertii ieš govvet olu materiála giehtakámerain. Son guttiige giehtakámera fárus oppa áigge juohke sajis.

Valjakka mielas lei hui váttis govvet iežas eallima kámerai. Buot áššiid ii sáhttán muitalit, muhto goittotge son háliidii addit realisttalaš gova iežas barggus ja árgaeallimis.

– Mu mielas váddáseamos ášši lei, ahte mun galgen juohke sajis jearrat, ahte oaččungo mun govvet, son muittaša.

Mari Valjakka
Koronadilli rievdadii olu sámebáhppa Mari Valjakka barggu. Govva: Ilmari Fabritius / Yle

Prográmma oidnogoahtá ovdal juovllaid

Mari Valjakka vuordá juovlamánu 20. beaivve, vaikko vehá balláge oaidnit iežas televisios.

– Dieđusge lean Yle Ođđasiin leamašan mielde televisios, muhto muđui in leat. Dat lea vehá amas dovdu, ahte mun lean doppe televisios, son čaibmá.

Son vuordá, ahte beassá čuovvut prográmma ja oaidná maid su kollegat leat govven. Son maid illuda, ahte prográmma oidnogoahtá aiddo ovdal juovllaid, mii lea muđuige máŋgasiidda vuoiŋŋalaš áigodat.

Papisto oidnogoahtá Yle TV1:s 20.12. rájes vudu diibmu 18.30 ja seamma beaivve buot oasit ihtet maiddái Yle Areenai.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat

Muualla Yle.fi:ssä