Sápmi |

Sámebálgosis navdet badjeolbmuid buktán 21 čearpmaha lobi haga bálgosii – duopmu áššis celkojuvvo vel dán mánus

Sivaheaddji navdá golbma badjeolbmo behttosa geahččaleamis ja nuppisadjásaččat boazodoallorihkkumušas. 

Poroerotus
Muhtin sámebálgosis navdet, ahte goit 21 čearpmaha leat buktojuvvon bálgosii lobi haga. Govva ii laktás áššái. Govva: Vesa Toppari / Yle

Ovtta sámebálgosis leat skábmamánus gearregastán bohccuid lobihis buktimis bálgosii.

Sivaheaddji navdá, ahte seamma siidda golbma badjeolbmo leat okto dahje ovttas buktán lobi haga goit 21 čearpmaha vierrobálgosis iežaset bálgosii, nu ahte dat čearpmahat eai leat lohkkojuvvon bálgosa boazolohkui.

Ná badjeolbmot leat sivaheaddji mielas viggan stuoridit iežaset boazologu ja dagahit ruđalaš vahágiid dahje vahága vára bálgosa eará badjeolbmuide, dainna ahte lobihis čearpmahiid buktima dihte bálgosa njuovvangeatnegasvuohta lea stuorát go livčče čearpmahiid buktima haga, vai nagodit dásset bohccuid sturron meari bálgosis.

Boazoisit lea dahkugovvadusa mielde fuomášan ártegis čearpmahiid

Dahkugovvádusa mielde bálgosa boazoisit lea fuomášan erenoamaš čearpmahiid meahcis. Son lea gidden fuomášumi čearpmahiid guolgamearkkaide, aiddo merkejuvvon čearpmahiidda, čearpmahiid guolgga ivnniide, boraduvvon julggiide, guolggahisvuhtii ja skierbmumii.

Go bálgosis lea šaddan eahpádus bohccuid lobihis buktimis, sii leat dahkugovvádusa mielde lohkan bohccuid meahcis ja fuomášan, ahte ovtta siidda boazolohku lea badjánan 21 čearpmahiin. Lohkama vuođul bálgosa aitosaš giđđačoahkkimis jagi 2018 leat mearridan lasihit daid badjeolbmuid boazolohkui oktiibuot 21 miesi. Danin sivaheaddji navdá áššis behttosa geahččaleami.

Sivaheaddji navdá golbma badjeolbmo behttosa geahččaleamis ja nuppisadjásaččat boazodoallorihkkumušas. Bálggus lea seammá mielas sivaheaddjiin dahkugovvádusas, muhto sin mielas áššis lea dáhpáhuvvan beahttus dahje roavvá beahttus. Bálggus gáibida áššáskuhtton badjealbmáin 27 650 euro sturrosaš vahátbuhtadusaid.

Buot áššáskuhtton badjeolbmot leat šiitán sivahusaid ja bálgosa gáibádusaid. Ášši leat gieđahallan Lappi gearretrievttis skábmamánu álggus. Duopmu áššis celkojuvvo mánu loahpas.

Varrasamosat: Sápmi

Váldoođđasat

Varrasamosat

Muualla Yle.fi:ssä