Sápmi |

Sameblod-filbma vuittii jagi 2017 LUX-bálkkašumi

Sámifilbma Sameblod (sá. Sámevarra) lea vuoitán Eurohpa parlameantta LUX-ealligovvabálkkašumi.

Lene Cecilia Sparrok (Elle-Marja) ja Mia Sparrok (Njenna)
Lene Cecilia Sparrok (Elle-Marja) ja Mia Sparrok (Njenna) Govva: Amanda Kernell/Oskar Östergren

Sameblod-filbma (sá. Sámevarra) lea vuoitán 11. geardde geigejuvvon LUX-filbmabálkkašumi. Bálkkaušumi vuoiti nama muitalii Eurohpa parlameantta sáhkaolmmái Antonio Tajani parlameantta dievasčoahkkimis maŋŋebárgga 14.11.

Tajani sávai lihkku buot finalistaevttohasaid filbmadahkkiid ja celkkii, ahte LUX-filbmabálkkašupmi lea Eurohpas dahkkon filmmaid ovddideami, eurohpalaš dáiddaindustriija ja kultuvrralaš ja gielalaš máŋggabealátvuođa várás.

Sameblod filmma lea bagadallan Amanda Kernell ja dat muitala sápmelaččaid soardimis 1930-logus. Nuorra sámenieida mearrida luohpat iežas sápmelaš identitehtas, go son fárre Ruoŧa Uppsalai, gos dahke nállebiologalaš dutkamušaid

Finalistafilmmaid čájehit nuvttá skábma- ja juovlamánus

Dán jagi LUX-filbmabálkkašumis gilvaledje Amanda Kernell Sameblod-filmma lassin Robin Campillon BPM (Beats per minute) -filbma ja Valeska Grisebachin Western-filbma.

LUX-bálkkašumi finalistafilmmaid lea vejolaš oaidnit nuvttá Helssegis 18.-19.11., Turkus 14.-28.11. ja Oulus 4.-7.12. Filmmat leat tekstejuvvon suoma- ja ruoŧagillii.

Sameblod-filbma lei gieskat maid evttohassan Davviriikalaš ráđi filbmabálkkašupmái. Filbma lea johtán festiválain miehtá máilmmi, ovdamearkka dihte Italias, Amerihkás, Tokios, Kanadas ja Berliinnas. Filbma vuittii guovvamánus árvvusadnojuvvon Dragon Award Best Nordic Film -bálkkašumi Göteborga filbmafestiválain Ruoŧas.

Varrasamosat: Sápmi

Váldoođđasat

Varrasamosat

Muualla Yle.fi:ssä