Sápmi |

Sameblod Eurohpá parlameantta LUX-ealligovvabálkkašumi evttohassan – Filbma čájehuvvo Sámi filbmateáhteriin dán čavčča

Lene Cecilia Sparrok (Elle-Marja) ja Mia Sparrok (Njenna)
Amanda Kernell Sameblod-filbma lea evttohassan maid Eurohpá parlamentta ealligovvabálkkašumis. Govva: Amanda Kernell/Oskar Östergren

Sameblod-filbma (sá. Samevarra) lea evttohassan dán čavčča máŋgga filbmabálkkašupmái. Filbma lea válljejuvvon earet eará Eurohpá parlameantta LUX-ealligovvabálkkašumi evttohassan.

Eurohpá parlameantta LUX-ealligovvabálkkašumi evttohassan leat válljejuvvon golbma filmma Eurohpás. Sameblod (buvttadanriikkat Ruoŧŧa, Dánmárku ja Norga) lassin evttohasat  leat BPM, Beats per minute (Frankriika) ja Western (Duiska, Bulgaria ja Nuortariika).

LUX-ealligovvabálkkašumi evttohasfilmmat tekstejuvvon visot EU 24 gillii ja filmmat čájehuvvojit dán čavčča áigge LUX-ealligovvabeivviin buot EU-riikkain. Suomas nuvttá filbmačájáhusat leat skábmamánus Helssegis, Turkus ja Oulus.

– Ealligovvaturnea lágiduvvon ovttasráđiid Našunála audiovisuála instituhtain, muitala Eurohpá ráđđi dieđáhusastis.

Jagi 2017 LUX-bálkkašumi vuoiti válljejuvvo skábmamánus. Bálkkašanseremoniija lágiduvvo Strasbourgas Eurohpá parlameantta dievasčoahkkima oktavuođas skábmamánu 15. beaivve.

Davviriikkaid ráđđi válljii filmma oktan evttohassan Davviriikkaid ráđi filbmabálkkašupmái. Filbmabálkkašumi našunála bálkkašanlávdegottit leat nammadan evttohassan vihtta ealligova: Amanda Kernella bagadan Sameblod (Ruoŧŧa) lassin evttohassan leat Iezar Aliu Fluefangeren (Norga), Guðmundur Arnar Guðmundsson Hjartasteinn (Islánda), Selma Vilhunen Tyttö nimeltä Varpu (Suopma) ja Christian Tafdrup Forældre (Dánmárku).

Davviriikkaid ráđi filbmabálkkašupmi juhkkojuvvo bálkkašangalas Eurohpá parlamentta dievasčoahkkima oktavuođas skábmamánu 1. beaivve Finlandia-dálus Helssegis.

Sameblod oaidnin láhkai Sámi filbmateáhteriin lagamuš vahkuid

Bálkkašuvvon Sameblod-filmma vuosttaseahkedat ollá Ohcejohkii ja Anárii. Ohcejoga gielddakino álggaha filbmačavččas čájehemiin bálkkašuvvon Sameblod-filmma (sá. Samevarra) guktii. Čakčamánu 29. beaivve Sameblod čájáhuvvo diibmu 17.00 ja 20.00 Ohcejogas Áilegas-guovddáža máttábeale dálus. Sameblod čájehuvvo Ohcejogas vel goalmmát geardde golggotmánu 1. beaivve diibmu 18.00.

Sameblod-filmma Suoma vuosttaseahketbeaivve maid Anár guovllu olbmot besset oaidnit filmma.

– Sameblod čájehuvvo Aslak filbmagovvateáhteris Avvilis diibmu 19.00 ja nuppes golggotmánu 1. beaivve dii 19.00, dadjá Anára kulturčálli Mirja Karjalainen.

Maiddái Eanodagas beassá oaidnit Sameblod-filbma dán čavčča. Kino Hetta jođiheaddji Mihku Näkkäläjärvi dadjá, ahte filmma čájehanbeaivvit leat vel jurddašuvvon golggotmánnui.

– Vuosttas čájehanbeaivi livččii golggotmánu 6. beaivve diibmu 18.00. Nuppádassii leat jurddašan filmma čájehit  golggotmánu 8. beaivve dii 14.00 ja goalmmát geardde 11.10. dii 14.00, muitala Mihku Näkkäläjärvi Kino Hettas.  

Filbma muitala sápmelaččaid soardimis

Sameblod muitala sápmelaččaid soardimis 1930-logus. Nuorra sámenieida mearrida luohpat iežas sápmelaš identitehtas, go son fárre Ruoŧa Uppsalai, gos dahke nállebiologalaš dutkamušaid.

Sameblod lea johtán festiválain miehtá máilmmi, ovdamearkka dihte Italias, Amerihkás, Tokios, Kanadas ja Berliinnas. Filbma vuittii guovvamánus árvvusadnojuvvon Dragon Award Best Nordic Film -bálkkašumi Göteborga filbmafestiválain Ruoŧas.

Beaiváduvvon 13.9.2017 dii 14.08: Lasihuvvon govva vuosttaseahkedis Troanddimis.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä