Sápmi |

Sameblod, Mumeniid diidadálvi ja Sámi oktasaš liveprográmma – Yles álbmotbeaivve fállun máŋggalágan filmmat

Yle lea álbmotbeaivái earret eará vuosttas háve teksten ealligova sámegillii.

Saamelaisveri, Sameblod
Sameblod-filmmas nuorra sámenieida Elle Márjá mearrida luohpat iežas sápmelaš identitehtas. Govas son lea boarisin. Govva: Sophia Olsson

Yle čájeha Sámi álbmotbeaivvi 6.2. gudnin sámegielat filmmaid sihke tv:s ja neahtas.

Davvisámegielat mánáidfilbma "Mumeniid diidadálvi" oidno Yle TV2:žis gaskavahku diibmu 15.40. Dan sáhttá geahččat maiddái Yle Areenas 30 jándora.

Filmmas Mumistállu ii hálit mannat dálvenahkáriidda, muhto baicce mearrida dutkat galbma ja sevdnjes dálvvi. Ealligovva vuođđuduvvá Tove Jansson girjái. Jietnarollain nektet earret eará Ásllat Holmberg, Niko Valkeapää, Johnny Mathis Sara, Anne Marie Guttorm Graven, Gunn Karin Skoglund, Ánte Siri, Jon Iver Tellefsen Eira, Elle Sara Oskal, Emma Elliane O. Valkeapää ja Sara Margrethe Oskal.

Mumi imaš muohtamáilmmis
Govva: © Filmkompaniet / Animoon

Yle čájeha álbmotbeaivve maiddái Amanda Kernell bagadan "Sameblod"-ealligova (sá. Sámevarra), mii almmustuvai 2016. Ealligovva čájehuvvo Yle Teemas gaskavahku diibmu 22.00. Filmmas nuorra sámenieida Elle Márjá (Lene Cecilia Sparrok) mearrida luohpat iežas sápmelaš identitehtas. Sámevarra muitala 1930-logu sápmelaččaid váigadis eallindilis.

Ealligovas lea gaskavahkkoeahkes vejolaš válljet juogo ruoŧa-, suoma- dahje sámegielat tekstema. Dát lea vuosttas geardi, go Yle lea teksten ealligova sámegillii.

Lene Cecilia Sparrok (Elle-Marja) ja Mia Sparrok (Njenna)
Lene Cecilia Sparrok (Elle-Marja) ja Mia Sparrok (Njenna) Govva: Amanda Kernell/Oskar Östergren
Yles sávvet, ahte Sámevarra ii báze maŋimuš sámegielat tekstemin.

– Mun anán dehálažžan, ahte min vehádatgielat oidnojit ja gullojit Yle kanálain. Árat teknihkka ii leat sodjan buot sámegielat bustávaid geavaheapmái tekstemis. Sávan, ahte oainnášeimmet sámegielat teavsttaid boahtteáiggis eanetge Yle kanálain, muitala jorgaleami ja veršunerema hoavda Christoffer Forssell.

Álbmotbeaieahkedis Yle Areenas sáddejuvvo velá 90 minuhta guhkkosaš livesátta, man Yle Sápmi buvttada ovttas NRK:in, SVT:in ja SR:in. Areenas almmustuvvá gaskavahku maiddái vuosttas oassi ođđa sámegielat Gearddit-oanehisdokumeantaráiddus, mii muitala golmma sáme- ja ovtta inuihtanuora eallimis.

Varrasamosat: Sápmi

Váldoođđasat

Varrasamosat

Muualla Yle.fi:ssä