Sápmi |

Sameblod Suoma vuosttaseahket ollá maiddái Ohcejohkii – Gielddakino joatká doaimmas

Ohcejoga girjerádjo- ja kulturdoaimmahoavda Tuija Guttorm muitala, ahte filbmateáhtera ulbmilin lea buktit ovdan sámefilmmaid. Dan lassin goittotge Ohcejogas besset oaidnit maiddái earet eará Hollywood-filmmaid.

Tuija Guttorm
Ohcejoga girjerádjo- ja kulturdoaimma jođiheaddji Tuija Guttorm illuda filbmateáhteris. Govva: Martta Alajärvi / Yle

Ohcejoga gielddakino beassá fas viđa jagi bottu maŋŋá joatkit doaimmas. Gielddakino gárte heaitit jagis 2012, go filmmat digitaliserejuvvojedje.

Ohcejoga gieldda kulturdoaibma oaččui Suoma ealligovvavuođđudusas doarjaga rusttegiid háhkamii, vai sáhttet álggahit ealligovvadoaimma fas. Dasa lassin Ohcejoga gielda lea dorjon doaimma investerenruhtademiin.

Gieldda girjerádjo- ja kulturdoaimma hoavda Tuija Guttorm muitala, ahte sii áinnas háliidedje fállat olbmuide daid bálvalusaid go dat lei gearddi vejolaš.

– Olbmothan leat dáppe Ohcejogas hirbmat olu vuordán dan, ahte mis doaimmašii ealligovvateáhter ja dán jagi mis lei vejolašvuohta ohcat ruđa dasa. Dál lei áigi viimmat álggahit dan doaimma ođđasit, mii háliideimmet dieđusge fállat olbmuide bálvalusaid ja buoridit daid, muitala Guttorm.

Tuija Guttorm illuda, go besset joatkit doaimma fas. Son jáhkká, ahte teáhtersále lea dievva, go čájehit vuosttas filmma čakčamánu 29. beaivve.

– Mun jáhkán, ahte olbmot illudit muinna ovttas go viimmat dát ealligovvateáhter álggaha doaimmas. Dan áigge maid mun lean leamašan dan virggis nappo guokte jagi, de dát lea ášši maid olbmot leat jearahallan hui dávjá. Dál sii leat dadjan munnje, ahte nu somá go viimmat beassat álggahit dan doaimma.

Sameblod filbma rahpá gielddakino - Háliidit čalmmustahttit sámevuođa

Ohcejoga gielddakino čájeha vuosttas filmma čakčamánu 29. beaivve. Vuosttas filbman lea válljejuvvon  bálkkašuvvon Sameblod (sá. Samevarra).

Guttorm mielde filmma Suoma vuosttaseahket bođii buori muddui. Sameblod čájehuvvo vuosttas geardde Suoma Finnkino-filbmateáhteriin miehtá Suoma seamma beaivve go Ohcejogas.

– Dat Sameblod-filbma bođii buorre muddui go leimmet giđđat mearridan, ahte gielddakino álggaha čakčat ja de suoidnemánus gullen, ahte Sameblod lea boahtimen Suomas vuosttaseahkedii. Dál dat lea ollašuvvamin, nu lea hui buorre dovdu dál.

Lene Cecilia Sparrok (Elle-Marja) ja Mia Sparrok (Njenna)
Sameblod-filmma Suoma vuosttaseahket ollá maiddái Ohcejohkii. Govva: Amanda Kernell/Oskar Östergren

 Sameblod-filmmain háliidit maiddái čalmmustahttit dan, ahte Ohcejoga ealligovvateáhteris buktet  sápmelašvuođa ovdan.

– Mii maiddái dainna filmmain háliidit giddet fuomášumi dasa, ahte mii buktit sápmelašvuođa ovdan min ealligovvateáhteris, ja dálhan mis lea iešalddes buorre vuođđu, go dan ealligovvateáhter fysalaš báiki lea Áilegas-guovddážis ja Áilegas-guovddáža ulbmilin lea ovddidit sámegiela ja -kultuvrra, muitala Tuija Guttorm.

– Kulturdoaimma ja Áilegas-guovddáža ovttasbarggu eaktun leage juo, ahte mii čájehit sámefilmmaid ja dál mii sáhttit dan dahkat.

Sámefilmmaid lassin lea goittotge maiddái ulbmilin čájehit earet eará davviriikalaš filmmaid, muhto maiddái stuorit Hollywood-buvttadusa filmmaid. Guttorm goittotge háliidivčče maid čájehit olbmuide maid eará eamiálbmot-filmmaid.

– Olbmot leat sihkkarit beroštuvvan oaidnit daid Hollywood-lágan filmmaid ja sihkkarit mii čájehit maiddái daid, ja jáhkán, ahte áigeguovdilis davviriikalaš filmmaid.

– Mun háliidivččen álggahit ovttasbarggu ovdamearka dihte Skábmagovat-filbmafestiválain, ja jearrat sis ahte leago vejolaš čájehit maiddái dáppe daid filmmaid, go mis lea dat ođđa ealligovvateáhter. Sávan ahte dat lihkostuvvá, dat lea okta mu niehku čájehit daid filmmaid seamma áigge festiválain maid dáppe Ohcejogas.

Sámekulturfálaldat geasuha

Ohcejoga gieldda girjerádjo- ja kulturdoaimmahoavda Tuija Guttorm lea vissis das, ahte sámi kulturfálaldat geasuha ohcejohkalaččaid.

– Mun goittotge jáhkán, ahte sámefilmmaide lea olbmuin stuorra beroštupmi go dat eai leat fidnemis dákkár streambálvalusain bokte, ja vel nubbin lea go sámefilmmat leat dán áigge go leat eambbo olbmot, bagadallit, geat ráhkadit daid filmmaid.

– Mishan lei juo okta ovdamearka dáppe go čájeheimmet giđđat Arktalaš Odyssea -teáhterčájálmaša ja mánggat ledje boahtan geahččat dan vaikko dat čájehuvvui dušše streama bokte, nu dat juo muitala ahte Ohcejot olbmuin lea beroštupmi beassat geahččat sámi kulturfálaldagaid.

Vel ii goittotge leat sihkkar, ahte man jeavddálaččat gielddakino čájeha filmmaid.

– Dat lea das gitta dál álggus, ahte mo dat ealligovvateáhter álgá doaibmat ja beassat oaidnit ahte mo olbmot váldet dan vuostá. Dan maŋŋá mii beassat árvvoštallat man olu filmmaid gánneha čájehit manotbájis, čilge Guttorm.

Tuija Guttorm ávžžuha čuovvut Ohcejoga ealligovvateáhtera Facebookas. Facebook-siidduin dieđihuvvo dárkiles áigetávvalat ja filmmat.

Ealligovvateáhter lea Áilegas-guovddáža máttabeale dálus.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä