Sápmi |

Sámediggái leat figgamin nu ođđa evttohasat, dálá áirasat go juo ovddežis oahpes olbmot – dá geahčastat jagi 2019 válgalistui

Sámediggeválggain leat dán háve oktiibuot 36 evttohasa.

Sámediggeválggaid 2019 evttohasat
Dá leat sámediggeválgaevttohasat 2019. Dan, geat sii leat, oainnát čuovvovaš govain. Govas váilot Jouni Kalevi Äärelä, Matti Aikio, Raimo Äärelä ja Juha Petteri Alakorva Soađegilis. Govva: Ville Fofonoff / Yle

Dálá sámediggeáirasiin ja várrelahtuin bealli, 12:s leat evttohassan maid dán jagi ja dálá stivrralahtuin guovttis. Sin lassin golmmas dálá evttohasain ledje evttohassan ovddit válggain.

Evttohasain 18:s eai leat ovdal leamaš evttohassan Sámediggái. Guđas leat oahppásat ovddit jagiin go leat leamaš juogo evttohassan dahje lahttun.

Dá muitalat oanehaččat maid mii diehtit evttohasain. Dá oainnát maiddái daid evttohasaid válgalohpádusaid, geat leat daid midjiide muitalan.

Listtus leat 18 áibbas ođđa evttohasa

2 Leo Aikio (Miko Ooli Leo), 43, lea anárlaš boazoalmmái ja Muttošjávrri bálgosa várreboazoisit. Son ii leat ovdal leamaš Sámedikki lahttu iige evttohassan válggaide. Aikio lohpida bealuštit sámiid árbevirolaš ealáhusaid, ovddidit luonddu vuoigatvuođaid ja vuostálastit Jiekŋameara ruovdegeainnu. Suomagiella lea su eatnigiella.

9 Ida-Maria Helander (Elle Biehtár Arvo Ida dahjege Lásse Máret Risten Arvo Ida), 30, lea sámekultuvrra ja davvisámegiela studeanta Oulus. Son lea bajásšaddan Avvilis ja sus leat máttut Roavvesavvonis Deanuleagis. Son lea Suoma Sámi Nuorat -searvvi ovddeš ságadoalli ja dálá stivrra ráđđeaddi, Suoma Sámiid guovddášsearvvi várreságadoalli ja Sámiráđi várrelahttu. Son ii leat ovdal figgan Sámediggái. Helander lohpida bargat sámiid rivttiid ja iešmearrideami ovdii ovdamearkka dihtii sámediggelága ođasmahttimiin ja ILO 169-soahpamuša ratifiseremiin. Son háliida maiddái ovddidit nuoraid áššiid ja doarjut sámeservviid. Ida-Maria Helander hállá davvisámegiela.

12 Niina Siltala (Vile Máárjá Heeihâ Aanti Niina), 29, lea árrabajásgeassima oahpaheaddji ja anárašgiela oahpaheaddji Avvilis. Álgoálggus son lea eret Idjajávrris. Son ii leat ovdal figgan Sámediggái. Siltala lohpida doallat oktavuođa jienasteaddjiide maiddái válggaid maŋŋá ja dieđihit iežas doaimmain ovddasteaddjin. Son lohpida maiddái váldit buot doaimmain vuhtii uhcit joavkkuid sámiid siste dego anáraš- ja nuortalašgielat joavkkuid ja arvedávgesápmelaččaid, ja lohpida bargat erenoamážit sápmelaš árrabajásgeassima ja giellabesiid, mielladearvvasvuođabálvalusaid, gielaealáskahttima ja sámenuoraid ovdii. Niina Siltala hállá anárašgiela.

15 Jouni Kalevi Äärelä, 72, lea ealáhatolmmoš ja hearrásduopmár Soađegilis. Son ii leat ovdal figgan Sámediggái. Su mielas áššiid galgá dikšut ovttasbarggus. Suomagiella lea su eatnigiella.

16 Matti Aikio, 39, lea dálá dáidaga magisttar ja dáiddár. Son lea eret Vuohčus, muhto lea vázzán skuvllaid Roavvenjárggas, Guovdageainnus ja Romssas. Son lea Sámi dáiddačehpiid searvvi dáiddalaš ráđi jođiheaddji ja Sámiráđi kulturlávdegotti várrelahttu. Son ii leat ovdal leamaš evttohassan Sámediggái. Son áigu bealuštit sámiid iešmearridanrievtti ja bargat dan ovdii, ahte sámediggeláhka rievdaduvvo čuovvut riikkaidgaskasaš soahpamušaid. Son háliida maid bargat dan ovdii, ahte sápmelaččain livčče buoret vuoigatvuođat bealuštit iežaset eatnamiid ruvkeindustriija ja eará industriijadoaimmaid vuostá. Matti Aikio hállá davvisámegiela.

17 Inka Kangasniemi, 41, lea dáidaga studeanta ja hábmejeaddji Anáris. Son lea Anára gielddastivrra lahttu (čanasmeahttun olgešbellodat Kokoomusa listtus) ja eallinfápmolávdegotti várreságadoalli. Son ii leat ovdal figgan Sámediggái. Son lohpida ovddidit servoša siskkáldas ráfi, dásseveardásaš politihka ja rievtti identitehtii. Inka Kangasniemi eatnigiella lea suomagiella ja son hállá anárašgiela.

18 Sámmol Ánde Lukkari, 47, lea ohcejohkalaš oahpaheaddjestudeanta. Son lea Ohcejoga gielddastivrra ja gielddaráđđehusa lahttu ja Ruoŧŧelaš álbmotbellodaga (RÁB) bellodatstivrra lahttu. Giđđat son fikkai riikkabeivviide RÁB ovddasteaddjin. Sámmol Ánde Lukkari hállá davvisámegiela.

19 Niko Valkeapää, 50, lea artista ja oahpaheaddji Eanodagas. Dál son stuđere álgoálbmotdiehtagiid Romssa universitehtas. Son lea Norgga Sámedikki lahttu ja Sámiráđi Suoma juhkosa lahttu. Jagi 2004 euroválggain ja jagi 2011 riikkabeaiválggain son lei evttohassan Ruoná lihtu listtus. Son ii leat ovdal leamaš evttohassan Suoma Sámediggái. Niko Valkeapää hállá davvisámegiela.

20 Karen-Anni Hetta (Guhtur Piera Jovnna Tuula-Maijja Karen-Anni dahjege Guhkes-Issáha Jouko Karen-Anni), 26, lea dálkkasdiehtaga lisensiáhta ja doavttir Vuohčus. Son lea bajásšaddan boazodoallobearrašis ja gullá Lappi bálgosii. Hetta lea vuosttas háve figgamin Sámediggái. Son lohpida áŋgiruššat sámeálbmoga ja -áššiid ovdii ja gáhttet Sámi rašes luonddu. Son maid atná árvvus sámeealáhusaid ja su mielas sámi duoji sajádaga galggašii buoridit. Karen-Anni Hetta hállá davvisámegiela.

Sámediggeválggaid 2019 Anára evttohasat
Dá leat Anára evttohasat Sámediggái válggain 2019. Badjin Leo Aikio, Magreta Sara, Veikko Feodoroff, Neeta Jääskö ja Tanja Sanila, gasku Niina Siltala, Inka Kangasniemi, Kari Kyrö, Teija Linnanmäki ja Kirsti Kustula, vuollin Pirita Näkkäläjärvi, Marko Tervaniemi, Tauno Ljetoff, Anu Avaskari ja Aslak Pekkala. Govva: Ville Fofonoff / Yle

22 Kaisa-Mari Jama (Jomppa-Áslat Biret Risten Kaisa), 30, lea valáštallandiehtagiid magisttar ja nákkosgirjedutki Helssegis. Son lea eret Pellos, muhto lea orron maiddái Roavvenjárggas ja Jyväskyläs. Su máttut leat Anára Goškanjávrris. Jama lea vuosttas háve evttohassan sámediggeválggain. Son háliida buoridit sámegiela oahppanvejolašvuođaid sámeguovllu olggobealde, doarjut gávpotsápmelaččaid identitehta ja bargat ealli sámekultuvrra ovdii. Kaisa-Mari Jama eatnigiella lea suomagiella.

23 Teija Linnanmäki, 53, lea filosofiija magisttar, vuovdeekonomiija inšenevra, anárašgiela oahpaheaddji ja turismafitnodatdoalli Njellimis. Son lea vuosttas háve evttohassan. Son lohpida ovddidit buori ovttasbarggu, ealli sámekultuvrra ovddideami ja nuoraide lasi dilálašvuođaid hállat ja gullat sámegiela. Teija Linnanmäki eatnigiella lea anárašgiella.

25 Hanna Guttorm (Báršši-Sámmol Hanna), 47, lea filosofiija doavttir ja eamiálbmotdiehtagiid dutki Helssegis. Su máttut leat Bárššis Deanuleagis. Son lea Dutkansearvvi hálddahusa lahttu ja vuosttas háve evttohassan Sámediggái. Son háliida ovddidit sámegiela, -kultuvrra ja kultuvrralaš dieđu sajádaga ja eamiálbmotrivttiid dego ILO-soahpamuša ratifiserema. Dasa lassin son háliida ovddidit siskkáldas soabadallama ja ráfi sámeservodagas. Son háliida bargat dan ovdii, ahte kolonialismma ja suomaiduhttima historjá dovddastuvvo Suomas ja iešguđet bálgáid johtán sápmelaččat váldojuvvojit servošii mielde. Hanna Guttorm hállá davvisámegiela.

27 Marko Tervaniemi (Terva-Aanti Vääinö Marko), 43, lea inšenevra ja čáhcefuolahanhoavda Anáris. Son muitala iežas muhtumin leat mielde maid boazobargguin vaikko ii bargga dan šat ámmáhin. Tervaniemi figgá dál vuosttas háve Sámediggái. Son lohpida bealuštit árbevirolaš sámi ealáhusaid ja sámi buhtes luonddu ja ovddidit sámemánáid ja -nuoraid rievtti sámegillii ja -kultuvrii. Marko Tervaniemi máhttá anárašgiela.

28 Tauno Ljetoff, 36, lea boazoalmmái ja oahpaheaddji Anáris. Son gullá Muotkeduoddara bálgosii ja lea dál Sámedikki oahppamateriálalávdegotti lahttu ja Oulu bismagotti sámebarggu ráđđádallangotti lahttu. Ljetoff ii leat ovdal leamaš evttohassan Sámediggái. Son háliida doarjut árbevirolaš ealáhusaid, skuvlejumi ja giellabarggu. Son háliida maiddái dárkkálmahttit turismaealáhusa doaibmanjuolggadusaid ja fidnet sámeturismma ehtalaš rávvagiid oahpisin buot turismasuorggi doaibmiide. Tauno Ljetoff hállá nuortalašgiela.

29 Anni Koivisto (Koivu-Jusse Ánne), 27, lea sosiálapolitihkalaš áššedovdi Ohcejogas. Son lea Ohcejoga gielddastivrra ja -ráđđehusa lahttu. Giđa válggain son fikkai riikkabeivviide Sosiálademokráhtalaš bellodaga ovddasteaddjin. Son lea vuosttas háve evttohassan Sámediggái. Anni Koivisto lohpida bealuštit sámiid vuoigatvuođaid, geahččalit gávdnat čovdosiid maiddái váttis čuolmmaide, dikšut sámiid oktasaš áššiid nu bures go vejolaš ja vuodjut áššiide dárkilit. Son lohpida maiddái gulahallat olbmuiguin ja juohkit dieđu áššiin, mat leat Sámedikki gieđahallamis. Anni Koivisto eatnigiella lea davvisámegiella.

32 Janne Hirvasvuopio, 29, lea stáhtadiehtagiid studeanta Espoos. Sus lea gullevašvuohta Vuohččui. Son lea leamaš mielde Suoma ON-nuoraid, Pohjola-Norden Nuoraidlihtu ja Oaivegávpotguovllu Eurohpánuoraid stivrrain. Son lea vuosttas háve evttohassan ja áigu buktit sámeguovllu olggobealde ássi sápmelaččaid ja vehádagaid jiena gullosii, ovddidit ja sihkkarastit sámebálvalusaid ja árbevirolaš ealáhusaid ja nannet áššálaš ja buorre ságastallama buot dásiin. Janne Hirvasvuopio eatnigiella lea suomagiella.

36 Juha Petteri Alakorva, 45, lea biergočuohppi Vuohčus. Son ii leat ovdal leamaš evttohassan. Son lohpida buoremus lági mielde leat báikki alde čoahkkimiin. Juha Petteri Alakorva eatnigiella lea suomagiella.

37 Aslak Pekkala, 46, lea buohccedivššár ja rádjegohcci Avvilis. Son lea Anára gielddastivrra lahttu (olgešbellodat Kokoomus, čanasmeahttun), dárkkistanlávdegotti ságadoalli, sode-lávdegotti lahttu ja maiddái oktasaš searvegottestivrra ja searvegotteráđi lahttu. Son lea vuosttas háve evttohassan Sámediggái. Son lohpida ovddidit gulahallama ja soabalašvuođa iešguđet giellajoavkkuid ja oainnuid gaskkas, geahpedit vuostálasvuođaid ja nannet gielalaš ja kultuvrralaš iešstivrema.

Sámediggeválggaid evttohasat sámeguovllu olggobealde, Ohcejogas, Eanodagas ja Soađegilis
Badjin sámeguovllu olggobeal evttohasat Ida-Maria Helander, Irja Seurujärvi-Kari, Kaisa-Mari Jama, Hanna Guttorm ja Janne Hirvasvuopio. Gasku Ohcejoga gieldda evttohasat Anne Nuorgam, Asko Länsman, Pentti Morottaja, Sammol Antti Lukkari, Anni Koivisto ja Veikko Porsanger. Vuollin Eanodaga evttohasat Ulla-Maarit Magga, Pigga Keskitalo, Niko Valkeapää, Per-Oula Juuso ja Tuomas Aslak Juuso ja maŋimužžan Soađegili gieldda evttohas Karen-Anni Hetta. Soađegili eará evttohasain eat leat ožžon govaid. Govva: Ville Fofonoff / Yle

Golmmas leamašan ovdal Sámedikkis ja golmmas leamašan ovdal evttohassan

13 Pentti Morottaja, 72, Ohcejogas lei bajit rádjefákta ovdal go bázii ealáhahkii. Son lea eret Anára Piilolas ja vázzán skuvllaid Njellimis ja Avvilis. 70-logu álggu rádjai son barggai bohccuiguin. Son lea Sámedikki sosiála- ja dearvvasvuođalávdegotti várrelahttu ja Ohcejoga searvegotteráđi lahttu. Morottaja ii leat ovdal leamaš Sámedikki lahttu, muhto lei evttohassan jagiin 2007 ja 2015. Son lohpida dahkat mearrádusaid vuoiggalaččat, sihkkarastit sámeealáhusaid gánnáhahttivuođa ja ovddidit sápmelaččaid buresbirgejumi. Pentti Morottaja ádde davvisámegiela ja anárašgiela.

14 Irja Seurujärvi-Kari (Sofe-Ánne Irja), 71, lea filosofiija doavttir ja dutki Helssegis. Son lea eret Gáregasnjárggas ja ássá doppe oasi jagis. Son lea bargan Ohcejoga sámelogahaga rektorin ja sámegiela ja - kultuvrra lektorin Helssega universitehtas. Son lea sámegiel ja -kultuvrra dutkansearvvi ságadoalli ja Sámi giellalávdegotti ságadoalli. Seurujärvi-Karis lea guhkes áigge vásáhus Suoma sámepolitihkas. Son leamašan Sámi Parlameantta lahttu jagiid 1980–1996 ja Sámedikki lahttu njeallje baji jagiid 1996–2011, main golbma baji son doaimmai Sámedikki várreságadoallin. Seurujärvi-Kari lohpida vuodjit sámiid kultuvrralaš, sosiálalaš ja vuoigatvuođalaš áššiid, nugo sámegiela, oahpahus- ja dutkanáššiid, sámiid eanavuoigatvuođaid ja ealáhusaid. Son lohpida maiddái ovddidit birasáššiid ja luonddu bistevaš geavaheami ja ovdáneami, sámiid badjel rájáid oktasašbarggu ja davviriikkalaš sámesoahpamuša dohkkeheami. Irja Seurujärvi-Kari eatnigiella lea davvisámegiella.

26 Pirita Näkkäläjärvi (Iskku-Máhte Biret dahje Čiskke-Ánne-Máreha Biret), 41, lea gávpediehtagiid magisttar ja media- ja gulahallandiehtaga magisttar (MSc) ja bargá dál fitnodatgávperáđđeaddin. Son lea maid Suoma PEN-klubba stivrra lahttu sihke giella- ja jorgalankomitea ságadoalli. Son válljejuvvui Jagi sápmelažžan 2017. Pirita Näkkäläjärvi lei Yle Sámi hoavda 2012–2016 ja ovdal dan, 1.1.–30.9.2012, Suoma Sámedikki lahttu, stivrra lahttu ja kulturlávdegotti várreságadoalli. Son lohpida, ahte ii vuollán, vaikke olggobeale fámut geahččalit deaddit, unohastit, delegitimiseret, heađuštit ja cielahit sámiid. Son lohpida maid joatkit Suoma dálá Sámedikki barggu nannen dihte sámiid iešmearrideami ja doarjut buot golbma Suomas hállojuvvon sámegiela ja daid geavaheami, bajásdoallama ja ovddideami. Pirita Näkkäläjärvi eatnigiella lea davvisámegiella.

30 Raimo Äärelä, 63, lea snihkkár ja hearrásduopmár Soađegilis. Son lea Soađegili gielddastivrra lahttu (Gurutlihttu) ja teknihkalaš lávdegotti ságadoalli. Son ii leat ovdal leamaš Sámedikkis, muhto lei evttohassan jagi 2011 válggain. Son háliida loahpahit riidaleame Sámedikkis ja ovddidit sápmelaččaid áššiid. Son deattuha maiddái, ahte ovttasbargu suopmelaččaiguin lea dehálaš. Raimo Äärelä eatnigiella lea suomagiella.

31 Per-Oula Juuso, 39, lea badjealmmái Eanodaga Gárasavvonis. Son lea Giehtaruohttasa bálgosa stivrralahttu ja fikkai Sámediggái maid ovddit válggain. Juuso lohpida ovddidit sámi boazodoalu. Davvisámegiella lea su eatnigiella.

34 Veikko Porsanger, 68, lea ealáhatolmmoš ja turismafitnodatdoalli Ohcejogas. Son lea Ohcejoga gielddastivrra ja -ráđđehusa lahttu (olgešbellodat Kokoomus). Son lea leamaš guokte baji Sámedikkis, jagiid 2008–2015. Son lohpida rehálašvuođa mearrádusaid dahkamii. Son áigu figgat ovddidit guolástansámiid sajádaga ja vejolašvuođaid ovddidit iežaset doaimma. Son háliida buktit ovdan dan, ahte sápmelaččat leat maiddái fitnodatdoallit ja sin doaibma lea maid mearkkašahtti. Veikko Porsanger eatnigiella lea davvisámegiella.

Dálá áirasiin 12 álge evttohassan

3 Anne Nuorgam, 54, lea riektediehtagiid kandidáhta ja jurista Ohcejogas. Son lea maiddái Ovttastuvvan Našuvnnaid álgoálbmogiid bissovaš foruma jođiheaddji ja Veahčaka guolástangotti ságadoalli. Nuorgam leamašan Sámedikki lahttu jagi 2000 rájes. Son lohpida ovddidit sámeealáhusaid, servodatráfi ja sámesoahpamuša fápmuiboahtima ja ollašuhttima. Su eatnigiella lea davvisámegiella.

4 Magreta Sara, 35, lea eret Anára Lismmás. Son lea badjeolmmoš ja allaskuvlla lektor Sámi allaskuvllas. Sara lea dálá Sámedikki stivrralahttu ja Sámedikki giellaráđi várreságadoalli. Dálá válgabadji 2016–2019 leamaš su vuosttas badji sámediggeáirrasin. Davvisámegiella lea su eatnigiella.

5 Veikko Feodoroff, 55, lea badjeolmmoš Čeavetjávrris. Son lea nuortalaččaid ovdaolmmoš ja dán válgabajis vuosttas háve Sámedikki lahttun. Feodoroff lohpida bargat árbevirolaš ealáhusaid suoji ja doaibmavejolašvuođaid ovdii ja oassálastit aktiivvalaččat Sámedikki ja dan doaibmaorgánaid doibmii. Son deattuha, ahte ii háliid sehkket Sámedikki ja Nuortalaččaid giličoahkkima rollaid baicce ovddidit ovttasbarggu daid gaskkas. Veikko Feodoroff eatnigiella lea nuortalašgiella.

6 Neeta Jääskö, 34, lea anárlaš jorgaleaddji ja anárašgiela studeanta. Son lea vuosttas baji sámediggeáirras, Sámedikki giellaráđi ságadoalli dán válgabajis ja maiddái Sámi Duodji -searvvi ságadoalli. Jääskö lohpida bidjat návccaid giellaealáskahttimii, ovddidit anáraččaid ovddastusa Sámedikkis ja nannet sámiid iešmearrideami earret eará ILO 169 -soahpamuša ratifiserema ovddidemiin. Neeta Jääskö hállá sihke anáraš- ja davvisámegiela.

7 Ulla-Maarit Magga, 46, lea buohccedivššár ja oahpaheaddji Eanodagas. Son lea nuppi baji sámediggeáirras. Magga lohpida bargat sámiid áššiid ovdii nu skuvlamáilmmis go ealáhusainge. Su eatnigiella lea davvisámegiella.

8 Tanja Sanila, 40, lea dáidagiid magisttar, fitnodatdoalli ja badjeolmmoš Čeavetjávrris. Son lea Anára gielddastivrra lahttu ja vuosttas baji sámediggeáirras. Giđa riikkabeaiválggain son fikkai riikkabeivviide olgešbellodat Kokoomusa ovddasteaddjin. Jagiid 2015–2017 Tanja Sanila lei nuortalaččaid ovdaolmmoš. Su eatnigiella lea suomagiella iige son sámás almmolašvuođas.

10 Pigga Keskitalo, 47, lea universitehta dutki, doseanta ja bajásgeassindiehtagiid doavttir. Son lea maiddái luohkkáoahpaheaddji ja bargan guhká oahpaheaddjeskuvlejeaddjin. Son lea eret Ohcejoga Njuorggámis ja orru dál Eanodaga Bealdovuomis. Keskitalo lea vuosttas baji sámediggeáirras ja Peräpohjola Guovddášbellodatnissoniid stivrralahttu. Giđđat son fikkai riikkabeivviide Guovddášbellodaga ovddasteaddjin. Keskitalo lohpida doaibmat sámi álbmoga buorrin máŋggabealagit, vuodjit buot sámi oainnuid ja bargat giela ja kultuvrra buorrin. Son háliida maid bargat viiddis ovttasbarggus buohkaiguin Sámis, Suomas ja máilmmis. Pigga Keskitalo eatnigiella lea davvisámegiella.

11 Asko Länsman, 54, lea badjealmmái ja fitnodatdoalli Ohcejoga Njuorggámis. Son leamašan Sámedikkis jagi 2008 rájes, vuos guokte baji fásta lahttun ja dálá baji várrelahttun. Son lea Bálgosiid ovttastumi stivrralahttu ja Sámi bálgosiid searvvi sátnejođiheaddji. Länsman lohpida bargat sámekultuvrra, -gielaid ja -ealáhusaid ovdii ja bissut dan politihkalaš linjas, man lea dánge rádjai doalahan. Asko Länsman eatnigiella lea davvisámegiella.

21 Kari Kyrö, 76, lea anárlaš guolásteaddji ja ealáhatolmmoš, guhte barggai badjel 40 jagi Ohcejoga Geavu álbmotmeahccehoavdan. Son lea Anára guolástanguovllu stivrra ságadoalli ja gullá maiddái Suoma Čuoiganlihtu lihttostivrii, Davvi-Suoma Oktasašvuvddiid stivrii, Inarinmaan lapinkylä -searvvi stivrii ja Anárjávrri čuovvunjovkui. Dasa lassin son lea Inarin Yritys -valáštallansearvvi ekonomiijadikšu ja stivrralahttu. Alimus hálddahusriekti dohkkehii su Sámedikki válgalohkui jagis 2011 ja son válljejuvvui Sámediggái mannan válggain válgabadjái 2016–2019. Son áigu ovddidit sápmelaččaid oktilašvuođa, buot sápmelaččaid dásseveardásašvuođa ja guovllu olbmuid eallima ja lágalaš ealáhusaid oktiiheiveheami. Kari Kyrö eatnigiella lea suomagiella.

24 Kirsti Kustula (Tuuru-Hansa Lea Kirste), 56, lea boazodoalli Anára Tolosis. Son lea Tolonen gilisearvvi ságadoalli. Kustula lea vuosttas baji sámediggeáirras ja sámedikki ealáhus- ja vuoigatvuođalávdegotti várreságadoalli. Son lohpida nannet sámi árbevirolaš ealáhusaid, ovddidit sámegielat bálvalusaid ja nannet sápmelaččaid rivttiid. Kirsti Kustula eatnigiella suomagiella ja son máhttá davvisámegiela.

33 Anu Avaskari,63, lea sosionoma ja gárrenávnnasbargi Anáris. Son lea Anára gielddastivrra ságadoalli (olgešbellodat Kokoomus), Lappi buohccedikšunbire stivrralahttu ja Davvi-Lappi guovloovttasbarggu gielddaovttastumi stivrralahttu. Son lea leamaš sámediggeáirras maŋimuš njeallje baji jagi 2004 rájes. Son háliida ovddidit ovttaveardásašvuođa, demokratiija ja vealakeahtesvuođa ja fidnet sámepolitihka vásttolažžan. Son háliida maid doarjut dakkár bálvalusaid ovddidanbarggu, mat sisttisdollet sámegiela ja kultuvrra ja leat dárkkuhuvvon erenoamážit mánáide, nuoraide ja vuorasolbmuide. Anu Avaskari lea stuđeren anárašgiela.

35 Tuomas Aslak Juuso, 34, lea badjealmmái Giehtaruohttasis Eanodagas. Son lea leamaš Sámedikkis guokte baji, jagiid 2008–2011 ja 2016–2019, ja várrelahttu 2015. Son lea dálá Sámedikki nubbi várreságadoalli. Juuso lei evttohassan riikkabeivviide jagi 2015 válggain Ruoŧŧelaš álbmotbellodaga ovddasteaddjin. Sámedikkis son lohpida ovddidit ja bealuštit sápmelaččaid álgoálbmot-olmmošrivttiid, nannet iešmearridanrievtti ja ovddidit Sámedikki bušeahtta nu ahte dat vástida duođalaš dárbbuid. Son áigu maid ovddidit ja doarjut árbevirolaš ealáhusaid, erenoamážit sápmelaš boazodoalu ja váikkuhit dan doarjjaortnega ođasmahttimii. Son lohpida maid doarjut sámekultuvrra ja -gielaid ja nannet njuolga dialoga ja dieđiheami. Tuomas Aslak Juuso hállá davvisámegiela.

Divvojuvvon 21.8. dii 19:44 Anu Avaskari jagit áirrasin.

Varrasamosat: Sápmi

Váldoođđasat

Varrasamosat

Muualla Yle.fi:ssä