Sápmi |

Sámediggelága ođasmahttinbargu maŋŋonan

Sámediggelága ođadanbargu joatkašuvvá aŋkke miessemánu 18. beaivvi rádjái.

Tiina Sanila-Aikio
Tiina Sanila-Aikio Govva: Jyrki Ojala / Yle

Skábmamánus 2017 ásahii Suoma vuoigatvuođaministeriija doaibmagotti, man bargun leamaš válmmaštallat sámediggelága ođadeami. Lága ođadanbarggu mihttomearrin leamašan dat, ahte ođastusat livčče anus čuovvovaš sámedikki válggain, mat ordnejuvvojit čakčat 2019.

Doaibmagottis leat čohkkán sámedikki ovddasteddjiid lassin áirasat Suoma ráđđehusbellodagain ja vuoigatvuođaministeriijas ja dan bargoáigodahkan lea ásahanmearrádusas namuhuvvon 8.11.2017 – 30.4.2018.

Doaibmagotti lahttu, sámedikki ságadoalli Tiina Sanila-Aikio dadjá, ahte sii eai velge geargan bargguin vaikko vuoigatvuođaministeriija ásahanmearrádusas ledjege bidjan ođadanbarggu áigemearrin cuoŋománu loahpa.

– Mii eat leat geargan dan beaivemearrái ja otne (gaskavahkko) leamašan doaibmagottis čoahkkin, mas mii leat mearridan, ahte čuovvovaš háve mii dieđihit dán dilis miessemánu 18. beaivve, dadjá Sanila-Aikio.

Evttohus galggašii boahtit ráđđehusa evttohusa hámis

Vuoigatvuođaministeriija ásahanmearrádussii lea čállojuvvon, ahte bargojoavku galgá válmmaštallat sámediggeláhkii dárbbašlaš nuppástusaid ja addit ovttamielalaš evttohusas ráđđehusa evttohusa hámis.

Lága válmmaštallanbarggus doaibmagoddi lea sáhttán geavahit mannán ráđđehusbajis válmmaštallojuvvon evttohusa sámediggelága ođadeamis.

Doaibmagotti barggu vuođđun leamaš maiddái vuođđovuoigatvuođat ja eará vuođđolága geatnegasvuođat, riikkaidgaskasaš olmmošvuoigatvuođasoahpamušat ja ON:aid álgoálbmotjulggáštus. Barggus leat galgan váldit vuhtii maiddái paraferejuvvon Davviriikalaš sámesoahpamuša ja ILO 169-soahpamuša.

Sámedikki ságadoalli Tiina Sanila-Aikio stelle sániidis várrugasat, iige kommentere nagodago doaibmagoddi addit ovttamielalaš ráđđehusa evttohusa hápmái čállojuvvon láhkaevttohusa miessemánu 18. beaivve.

– Jus doppe boahtá, de dalle lea cealkináigi ja dat proseassa vuolgá ovddos guvlui, leat sámediggelága 9. paragráfa ráđđádallamat ja sámedikki čoahkkima gieđahallan ja nie ovddos guvlui. Muhto jus dat ii ovdán, de dalle dat bisána dasa, dadjá Sanila-Aikio.

Boahtágo doppe evttohus dalle 18. beaivve?

– Mun in sáhte dan kommenteret dán muttus, loahpaha Sanila-Aikio.

Doaibmagoddi lea barggustis gullan sierra doibmiid jagi 2018 áigge. Vuoigatvuođaministeriija lea čohkken internehttii sierra doibmiid cealkámušaid, mat gusket sámediggelága ođadeami.

Dán artihkkalis sáhttá lohkat, makkár oaiviliid sierra sámesearvvit leat buktán ovdan lága ođadeamis ja dán artihkkalis fas gielddaid oainnuid.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä