Sápmi |

Sámediggepresideanttat galledit Singapores – Muittuhastán álgoálbmogiid rivttiin árktalaš guovllus

Sámediggepresideanttat leat dán vahkus leamaš Singapores oahppomátkkis. Suoma Sámedikki ságadoalli Tiina Sanila-Aikio muitala, ahte prográmmas leat earret eará leamaš iešguđetlágan ságastallamat. Singapore lea dárkkodeaddjilahttun árktalaš ráđis.

Jietna: sámediggi, ságadoalli, president, presideanta, saamelaiskäräjäy
Jietna
Suoma Sámedikki ságadoalli Tiina Sanila-Aikio muitala Dearvva! -sáddagis sin mátkkis Singaporei.

Sámedikki presideanttat leat dán vahkus leamaš Singapores oahppomátkkis.

Troandima álbmotbeaidoaluin ja 100-jagi rájiid rasttildeaddji ovttasbarggu ávvudoaluin galledii Sam Tan Singapore stáhtaministtára kansliijas. Tan oassálastii Troandima doaluid earenoamážit dan sivas, ahte Singapore lea dárkkodeaddjilahttun Árktalaš ráđis.

Troandimis Sámediggenjunnožat deive ministtára, gii bovdii sin Singaporei. Oktasaš áigi deaivvadeapmái gávdnui dál suoidnemánu álggus.

Suoma, Ruoŧa ja Norgga Sámedikkiid presideanttat leat deaivan Singapores riikka olgoministtára, geainna besse ságastallat Singapore árktalaš beroštumiin.

– Beasaimet ságastallat Singapore árktalaš beroštumiin ja maiddái dakkár stuorit gažaldagain, dego olmmošvuoigatvuođain ja álgoálbmotpolitihkas, lohká Sanila-Aikio.

Sámediggepresideanttain leat leamaš deaivvadeamit maiddái turismahálddahusain, kulturárbbi hálddahusain ja sidjiide lea leamaš kulturprográmma.

"Ferte váldit vuhtii dan álgoálbmoga oainnu"

Go dihto doaibmit bohtet árktalaš guvlui, ferte sin muittuhit das, ahte dat ii leat mihkkege guoros guovlluid, baicce álgoálbmogiid ruovttuguovlu.

– Ovdal go doaimmat álget árktalaš guovllus, de ferte váldit vuhtii dan álgoálbmoga oainnu vai dat besset oassálastit daidda proseassaide ja doaimmaid plánemiidda.

Singapores Sámedikkit leat muittuhastán álgoálbmogiid rivttiin, hállan earret eará árbevirolaš dieđu ja dan suodjaleami birra, luonddusuodjaleamis ja sierralágan luonddugažaldagain. 

Arktinen neuvosto
Govva: Arktalaš ráđđi

– Dalle go deaivvaimet turismma hálddahusain de beasaimet molsot geavadagaid ja jurdagiid turismma birra, mo bargat turismmain suvdilis vugiiguin ja seamma áigge beaktilit.

– Mun jáhkán, ahte dat stuorra gažaldat doppe duogábealde lea dat, ahte gii hálddaša, gii oamasta, mo dat oassálastima sihkkarasttin sierra proseassain vai dat rievttit ollašuvvet, Sanila-Aikio dadjá.

"Oalle olu seammalágan hástalusat"

Sanila-Aikio loahpaha dasa, ahte Singapore ja sámit juogadit maiddái oalle olu seammalágan áššiid, vaikko servodagat leatge earáláganat. Singapore lea stuorra miljongávpot. Buotlágan resurssaid, dego biepmu, ferte buktit olgoriikkain.

– Oalle olu seammalágan hástalusat, mo sihkkarastit eallima ja boahttevuođa. Sámit ja singaporelaččat fertejit doaibmat ovttas stuorit álbmogiiguin ja riikkaiguin.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä