Sápmi |

Sámediggeválggaid evttohasásaheapmi nohká bearjadaga – Ná ásahat evttohasa

Evttohasásaheami áššebáhpárat galget leat válgalávdegotti doaibmasajis maŋimustá 2.8. diibmu 16.00.

Sámediggeválggat 2019
Govva: Sámediggi

Sámedikki mearreáigásaš áššemeannudeaddji Oula-Antti Labba muitala, maid galgá vuosttažettiin bargat, jos áigu ásahit evttohasa sámediggeválggaide.

– Vuosttamužžan ferte cegget válljensearvvi. Válljensearvái galget gullat unnimustá golbma Suoma sámediggeválggain jietnavuoigadahtton olbmo.

Jietnavuoigadahtton olmmoš sáhttá gullat beare ovtta válljensearvái, dahje su namma sihkkojuvvo muđuid eret buot eará válljenservviin.

– Juohke jietnavuoigadahtton olmmoš oažžu oassálastit dušše ovtta evttohasa ásaheapmái.

Válljensearvvi evttohasohcamuš/vuođđudanáššegirji galgá leat válgalávdegottis Anáris, Sámekulturguovddáš Sajosa doaibmasajis maŋimustá bearjadaga 2.8.2019 diibmu 16:00.

– Dat lea dieđusge dehálaš, ahte dan dasto muitá doaimmahit válgalávdegoddái ovdal mearreáiggi. Sii, geat sáddejit dan válljensearvvi vuođđudanáššegirjji poastta bokte, galget muitit ahte dat galgá leat ovdal mearreáiggi doppe Anára Sajosa doaibmasajis, muittuha Labba.

Evttohasohcamuša dievasmahttin

Vaikko evttohasohcamuš galgá leat doaimmahuvvon dán vahku bearjadaga diibmu 16.00 rádjái, sáhttá válljensearvvi áššeolmmoš dievasmahttit dahje njulget ohcamuša dieđuid disdaga 6.8. diibmu 16:00 rádjai.

Válljensearvvi áššeolmmoš galgá leat eará olmmoš, go evttohas ieš.

– Dat válljenovttastus lea dan evttohasa duohken. Dasa sáhttet gullat unnimustá golbma jietnavuoigadahtton sápmelačča, ja dat válljenovttastus dasto vállje daid olbmuid siste, gii lea dat áššeolmmoš.

Evttohassan ásahuvvon galgá maiddái ieš miehtat dasa, ahte álgá evttohassan, muittuha Labba.

Válgalávdegoddi dahká sámediggeválggain válgagelbbolaš evttohasain de evttohaslogahallama. Dat galgá bargojuvvot 21 beaivvi ovdal go válgadoaimmahus álgá.

– Válgalávdegoddi doallá čoahkkima ja dan čoahkkimis sihkkarastá, ahte dat geat áigot evttohassan, leat válgagelbbolaččat.

Sámediggeválggat doaimmahuvvojit 2.9.–30.9.2019.

Evttohasásaheami skovit gávdnojit dáppe.

Dárkkálmahttojuvvon 29.7.2019 dii. 18.00. Artihkkalis jietnavuoigadahtton ja válgagelbbolaš olbmuin dárkkuhit namalassii Suoma sámediggeválggain jietnavuoigadahtton ja válgagelbbolaš olbmuid.

Varrasamosat: Sápmi

Váldoođđasat

Varrasamosat

Muualla Yle.fi:ssä