Sámediggeválggaid jienaid lohkan álgá dainna, ahte buot poastta mielde boahtán ja válgalávdegotti doaimmahahkii ovdal vuossárgga eahkeda diibmu 18.00 máhcahuvvon máhcahankonfeluhtat rahppojuvvojit.

Jienat, mat bohtet válgalávdegotti doaimmahahkii dan manná go jienaidrehkenastin lea álgán, eai váldojuvvo vuhtii válggas.

Sámediggeválggain lea jienastanriekti vádjit 6 000 olbmos.

Válgalávdegoddi rehkenastá addojuvvon jienaid olles vuossárgga eahkeda ja vuossárgga ja maŋŋebárgga gaskasaš ija.

Válgalávdegotti ságadoalli Janne Näkkäläjärvi dadjá, ahte sámediggeválggaid bohtosis muitalit almmolašvuhtii áramustá maŋŋebárgga. Válgalávdegoddi jáhkká, ahte eahpevirggálaš boađus lea sis dieđus maŋŋebárgga diibmu 10.00 áigge go válgalávdegoddi doallá áššis dieđihandilálašvuođa.

– Mannan háve válgaboađus gearggai vihtta minuhta ovdal dieđihandilálašvuođa nappo vihtta váile ovcci iđđes. Dál dieđihandilálašvuohta lea diibmu 10.00 maŋŋebárgga, dadjá Näkkäläjärvi.

Sámediggeválggaid válgaboađus nannejuvvo golggotmánu 2. beaivve.