Sápmi |

Sámediggeválggaid jienasteaddji gávdná evttohasas válgamášenis, sosiála medias dahje aviisagovas – stuorra evttohaskampánjjat eai dihtto

Dábalaš sámediggeválgaevttohas kampánjere veháš sosiála medias ja aviissaid siidduin, gos jienasteaddji sáhttá evttohasas gávdnat. Yle Sápmi gažadii evttohasain sin válgakampánjjaid birra.

Riitta Lehtola, Anár, Inari
Riitta Lehtola lea oaidnán válgapostemiid ovdamearkka dihte Instagramis, Facebookas ja Twitteris. Govva: Vesa Toppari / Yle

Válgakampánjaremis bohtet vuosttamužžan millii márkanis čuožžu válgareklámagovat dahje tealttát gávppiid ovddabealde, main fállojuvvo nuvttá káfe. Dákkár kampánjeren oidno aŋkke riikkabeaiválggain ja gielddaválggain.

Vaikko sámediggeválggain leat áiddo dál jienasteamen, eai válgareklámat goittotge dihtto sámegilážiin.

Yle Sápmi gažadii evttohasain sin válgakampánjjaid birra. Gažadeapmái vástidedje 36 evttohasas 31. Sii leat Leo Aikio, Anne Nuorgam, Magreta Sara, Veikko Feodoroff, Neeta Jääskö, Ulla-Maarit Magga, Ida-Maria Helander, Pigga Keskitalo, Asko Länsman, Niina Siltala, Irja Seurujärvi-Kari, Jouni Äärelä, Sammol Lukkari, Niko Valkeapää, Karen-Anni Hetta, Kari Kyrö, Kaisa-Mari Jama, Kirsti Kustula, Hanna Guttorm, Pirita Näkkäläjärvi, Marko Tervaniemi, Tauno Ljetoff, Anni Koivisto, Raimo Äärelä, Per-Oula Juuso, Janne Hirvasvuopio, Teija Linnanmäki, Anu Avaskari, Veikko Porsanger, Tuomas Aslak Juuso ja Aslak Pekkala.

Čielggadeapmái eai leat vástidan dahje eat leat fáhten Tanja Sanila, Pentti Morottaja, Matti Aikio, Inka Kangasniemi, iige Juha Alakorva.

Maŋgasat lohket, ahte kampánja ii leat jur ollenge. Jus mannu lágan kampánja lea, dat dahkko eanemustá sosiála medias. Oasis evttohasain leat politihkkársiiddut Facebookas, oassi fas bargá iežas priváhtaprofiilla bokte. Dáid reaidduid bokte sáhttá jienasteaddji gávdnat evttohasas.

Jienasteaddji lohká maid, ahte sosiála medias válggat gal oidnojit. Anárlaš Riitta Lehtola dadjá, ahte son lea fuomášan válgapostemiid nu Facebookas, Instagramis go Twitterisge.

– Jus ii čuovo daid áššiid nu dárkilit, de dallehan kánske livčče buorre oažžut eanet dieđu ja kampánjja, smiehtada Lehtola.

Aviissaid siidduin govat ja teavsttat, ságastallamat ihtán nehttii

Stuorra šilttaid sajis válgareklámat oidnojit beare aviissain duollet dálle. Muhtumat evttohasain leat válljen almmustahttit válgareklámas aviissain. Dain sii leat lokten válgatemaidis ovdán.

Aviissaid siidduin leat maid oidnon juoga veardde evttohasaid čállin teavsttat válgatemáin. Dát čállosat leat maid ihtán sosiála mediai ságastallama bohciidahttit.

Saammal Morottaja
Saammal Morottaja vállje evttohasa ovdamearkka dihte dan vuođul, makkár oainnut sus leat. Govva: Anja Kaarret / Yle

Jienasteaddji galgáge ohcat ieš dieđu evttohasa birra vaikkoba háleštemiin dahje neahtta- ja aviisačállosiid bokte. Moattis válgaevttohasain bukte Yle Sámi gažadeamis ovdan dan, ahte sii lávejit háleštit olbmuiguin ja seammás vehá maid válgabarggu bargat. Dušše okta evttohas lohká, ahte lea ordnen válgadilálašvuođa, mas lea fállán gáfe gussiide.

Makkár ákkain jienasteaddji vállje evttohasas?

Jienasteaddji válljemii váikkuhit maŋggalágan áššit. Riitta Lehtola, Saammâl Morottaja ja Elle-Maaret Näkkäläjärvi mielas earret eará oainnut ja árvvut leat dáin válggain dehálaš rollas evttohasa válljemis.

– Geahččalan jurddašit, ahte makkár oainnut sus leat ja mo son lea ovdanbuktán iežas politihkalaš áššiin, smiehtasta anárlaš Saammâl Morottaja.

Elle-Maaret Näkkäläjärvi
Elle-Maaret Näkkäläjärvi vállje evttohasas ovdamearkka dihtii árvvuid vuođul. Govva: Kirsti Helena Länsman / Yle

Elle-Maaret Näkkäläjärvi fas muitala, ahte vállje evttohasas su árvvuid vuođul. Näkkäläjärvi lohká, ahte son dovdá evttohasain maŋgasiid juo ovdalaččas. Son lea goittotge bargan Yle Sámi válgamášena ja ožžon bohtosiid, maid ii máhttán vuordit.

– Doppe bohte gal dakkár vástádusat; maid in dakkaviđe ieš jurddahallan, ahte sis leat seammalágán oainnut, go mus, lohká Näkkäläjärvi.

– Gal dat lea dehálaš, ahte dat olmmoš vuodjá seammá áššiid go mun ja ovdamearkka dihtii dat ruovdegeainnu ášši leai dakkár, mii váikkuhii, dadjá Riitta Lehtola.

Varrasamosat: Sápmi

Váldoođđasat

Varrasamosat

Muualla Yle.fi:ssä