Sápmi |

Sámediggeválggain leat dahkkon njeallje njulgengáibádusa

Jos válgabohtosa ii leat vejolaš vuiget, galgá válggaid ordnet ođđasit.

sámediggeválggat 2019, vaaligrafiikka logo ja teksti
Govva: Matti Kurkela / Yle

Suoma sámediggeválggain leat dahkkon mearreáiggi siste njeallje njulgengáibádusa.

Sámediggelága 40 paragráfa mielde jietnavuoigadahtton olmmoš sáhttá dahkat Sámedikki stivrii njulgengáibádusa válggain, jos son oaivvilda, ahte jogo Sámedikki válgalávdegotti mearrádus válgabohtosa nannemis dahje válggaide laktáseaddji eará doaibma leamaš lágaheapme.

Njulgengáibádusa sáhttá dahkat 14 beaivvi siste das, go válggaid boađus lea nannejuvvon. Sámedikki válgalávdegoddi nannii válgabohtosa gaskavahku 2.10., nu ahte áigemearri dievai gaskavahku 16.10.

Stivra galgá gieđahallat gáibádusaid loahppajagi áigge

Sámedikki stivra galgá gieđahallat njulgengáibádusaid hohpolaččat ja vel dán jagi áigge. Sámedikki ságadoalli Tiina Sanila-Aikio dadjá, ahte njulgengáibádusaid gieđahallanáigi ii leat vel dieđus, muhto ulbmil lea gieđahallat daid stivrras nu jođánit go vejolaš.

– Jus njulgengáibádusaid gieđahallan ii lihkosmuva loahppačakčii plánejuvvon stivračoahkkimiin, dalle dan várás lágiduvvo sierra čoahkkin.

Sámedikki ságadoalli Tiina Sanila-Aikio ii kommentere njulgengáibádusaid sisdoalu.

Stivrra mearrádusa sáhttá vel váidit alimus hálddahusriektái.

Jos Sámedikki válgalávdegotti mearrádus dahje eará doaibma leamaš lágaheapme ja dat lea váikkuhan válgabohtosii, galgá bohtosa vuiget. Dákkár dáhpáhusas Suoma stáhtaráđđi sáhttá dárbbu mielde válljet Sámedikki lahtuid ja várrelahtuid njulgejuvvon bohtosa vuođul.

Jos válgabohtosa ii leat vejolaš njulget, galgá válggaid ordnet ođđasit.

Mannan válggain vihtta njulgengáibádusa

Maiddái mannan sámediggeválggain jagi 2015 dahkkojuvvojedje vihtta njulgengáibádusa. Dalle buot váidagat guske alimus hálddahusrievtti mearrádusa váldit Sámedikki dáhtu vuostá 93 ođđa olbmo válgalogahallamii.

Dalle Sámedikki stivra mearridii dohkkehit njulgengáibádusaid ja ordnet ođđa válggaid. Alimus hálddahusriekti goittotge mearridii, ahte ođđa válggat eai boađe, daningo Sámedikki stivrra mearrádus ordnet ođđa válggaid lei dan mielas lágaheapmi.

18.10.2019 dii. 12:37 Áššái lasihuvvon Tiina Sanila-Aikio kommeanta.

Varrasamosat: Sápmi

Váldoođđasat

Varrasamosat

Muualla Yle.fi:ssä