Sápmi |

Sámediggi čielggada sámebearrašiid giellaealáskahttindárbbuid Oulu, Jyväskylä ja Tampere guovlluin

Oulus doaibmá davvisámegielat beaivedikšu, man ordne Oulu gávpot, muhto Tamperes ja Jyväskyläs ii leat fállon sámegielat beaivedikšu. Čielggadeapmi dahkkojuvvo ovttas guovllu sámeservviiguin.

Giellabeassi Máttabiegga Radiokatus Helssegis.
Oaivegávpotguovllus giellabeassi álggii doaimmas mannan jagi loahpabealde Govva: Mari Korpimäki

Sámediggi čielggadišgoahtá leago Oulu, Jyväskylä dahje Tampere guovlluin beroštupmi giellabeasse- dahje giellariekkisdoaimmaide davvisáme-, anáraš- dahje nuortalašgillii. Čielggadeapmi dahkkojuvvo ovttasbarggus Oulu Sámit-servviin ja Sis-Suoma sámesearvi Bárbmuin čielggadanskoviiguin.

Oulus doaibmá davvisámegielat beaivedikšu, man ordne Oulu gávpot. Dan sadjai anáraš- ja nuortalašgillii eai leat doaimmat. Guhkes gaskkaid dihte ii davvisámegielatge dikšu leat vejolaš buot bearrašiide Oulus. Sámegieloahpahusa sáhttá oažžut skuvllas, muhto skuvlaahkásaččaide eai leat eará doaimmat, mat doarjjošedje sámegiela suomagielat birrasis. Tamperes ja Jyväskyläs ii leat fállon sámegielat beaivedikšu.

Giellabeassi lea beaivedikšu, mas mánnái hállojuvvo gitta álggu rájes giellalávgovuogi mielde. Ná mánná sáhttá oahppat giela, vaikko dat ii hállošege ruovttus. Giellariekkis fas lea beaivedikšo- ja skuvlaahkásaš mánáid "giellariššu", mas mánát leat oasi beaivvis moadde geardde vahkus.

Oulu jearahallamii beasat dás ja Sis-Suoma jearahallamii dás.

Varrasamosat: Sápmi

Váldoođđasat

Varrasamosat

Muualla Yle.fi:ssä