Sápmi |

Sámediggi čoahkkana guovttebeaivásaš dievasčoahkkimii – geahččit eai beasa parlameantasálii koronadili dihte

Sámediggi mearrida baji 2020–2023 doaibmaprográmmas ja ságastallá ruvke- ja sámediggelágaid ođasmahttimis ja dálkkádatpolitihkka ovddideamis.

Sámedikki ortniiduvvančoahkkin
Sámediggi čoahkkana dán válgabaji goalmmát dievasčoahkkimii. Govva: Sámediggi

Sámediggi čoahkkana odne duorastaga ja ihttin bearjadaga 17.–18.9. čoahkkimii Anára Sajosii. Dán válgabaji goalmmát dievasčoahkkin lágiduvvo belohahkii gáiddusčoahkkimin. Sámedikki lahtut oassálastet guovttebeaivásaš čoahkkimii juogo báikki alde Sajosis dahje gáiddusoktavuođaiguin.

Guovttebeaivásaš čoahkkima áššelisttus leat olu áššit gieđahallan láhkai. Čoahkkin galgá mearridit Sámedikki doaibmaprográmmas badjái 2020–2023. Dievasčoahkkin mearrida maiddái cealkámušas sode-eanangottiid vuođđudeapmái ja sosiála- ja dearvvašvuođafuolahusa ja gádjundoaimma lágideami ođastussii guoski láhkaásaheamis.

Sámediggi nammada maiddái lahtuid Sámi Giellagáldu stivrii ja vállje ođđa nuoraidráđi lahtu earu bivdán lahtu sadjái.

Čoahkkimis čađahuvvojit lassin golbma sáttaságastallama. Stivra lea válmmaštallan Sámedikki čoahkkima sáttaságastallamii sámi dálkkádatpolitihka ovddideami, ruvkelága ođasmahttima ja sámediggelága ođasmahttima.

Koronadili dihte álbmot ja media sáhttet čuovvut čoahkkima dušše live stream -sáddaga bokte čujuhusas www.samediggi.fi/live. Parlameantasálii geahččit eai beasa čuovvut dievasčoahkkima. Sátta dulkojuvvo buot golmma sámegillii ja maiddái suomagillii.

Duorastaga čoahkkin álgá iđđes diibmu 10 ja bearjadaga fas iđit 9 rájes.

Yle Sápmi čuovvu Sámedikki dievasčoahkkima reálaáiggis iežas neahttasiidduin.

Varrasamosat: Sápmi

Váldoođđasat

Varrasamosat

Muualla Yle.fi:ssä