Sápmi |

Sámediggi evttoha stáhta sirdit ILO 169 -soahpamuša gieđahallama čuovvovaš riikkabeaiáigodahkii – "Moadde jagi ii šat ollu daga"

Sámediggi mearridii ovttamielalaččat evttohit stáhtii ILO 169 -soahpamuša riikkabeaigieđahallama maŋideami.

Jan Saijets ja Anne Nuorgam Saamelaiskäräjien täysistunnossa
Jan Saijets ja Anne Nuorgam hálaiga čoahkkimis ILO 169 -soahpamuša riikkabeaigieđahallama maŋideami beales. Govva: Kirsti Länsman / Yle

ILO 169 -soahpamuša ratifiseren lea jorran áimmus máŋgalot jagi. Sámedikki jagi maŋimuš dievasčoahkkin maŋŋebárgga Anáris geavahii goit ášši gieđahallamii logi minuhta.

Sámediggi evttoha Suoma stáhtii ILO 169 -soahpamuša ratifiserenevttohusa riikkabeaigieđahallama sirdima čuovvovaš riikkabeaiáigodahkii. Mearrádus lei ovttamielalaš.

Dálá ratifiserenevttohus lea boarásmuvvan

Riikkaidgaskasaš bargoorganisašuvdna ILO álgoálbmogiid guoski soahpamuša ratifiserenášši leamašan Suoma ráđđehusa beavddi alde dan rájes, go dat gessojuvvui eret riikkabeivviid áššelisttus jagi 2015.

Dan maŋŋá stáhtaráđđi lea diŋgon sápmelaččaid vuoigatvuođadilis čielggadeami, mii galggai leat veahkkin ILO-ratifiseremis. Dál goittotge ratifiserenevttohus lea boarásmuvvan ovdamearkka dihte meahciráđđehuslága ođasteami dihte. Maiddái sámediggelága ođasmahttin livččii váikkuhan ratifiserenášši ovdáneapmái.

Go ášši ii ovdánan, vuoigatvuođaministeriija válddii oktavuođa Sámediggái. Evttohusa válmmaštallamii ii leat šat dán ráđđehusbajis áigi ja nuba Sámedikkis lei geavadis guokte molssaeavttu: evttohit soahpamuša riikkabeaigieđahallama sirdima čuovvovaš riikkabeaiáigodahkii dahje ášši eretgeassima dan joatkkaválmmaštallama várás.

"Leat bargan dáinna juo máŋgalot jagi, moadde jagi ii šat ollu daga"

Sámedikki lahttu Anne Nuorgam evttohii dievasčoahkkimii ratifiserenevttohusa riikkabeaigieđahallama maŋideami čuovvovaš válgabadjái.

– Miihan leat bargan dáinna juo máŋgalot jagi. Moadde jagi ii šat dán máŋgalot jagis ollu daga, dajai Nuorgam čoahkkimis.

Nuorgam ákkastalai evttohusas dainna, ahte ovdal ratifiserenášši gieđahallama riikkabeaivvit galggašedje gieđahallat davviriikkalaš sámesoahpamuša.

– Sávan, ahte mii oažžut Suomas goas nu ILO-soahpamuša dohkkehuvvot. Galhan mii leat dan jo nu guhká vuordán.

Heikki Paltto ja Jan Saijets guottiheigga evttohusa.

– Lea hui dehálaš, ahte oažžut soahpamuša ratifiserejuvvot. Dat lea min árbevirolaš ealáhusaide dehálaš. Kánske in hálit, ahte dálá ráđđehus váldá dan gieđahallamii, dajai Saijets.

Dán oanehis ságastallama maŋŋá Sámediggi dohkkehii ovttamielalaččat evttohit ratifiserenášši riikkabeaigieđahallama sirdima čuovvovaš riikkabeaiáigodahkii.

Varrasamosat: Sápmi

Váldoođđasat

Varrasamosat

Muualla Yle.fi:ssä