Sápmi |

Sámediggi geahččala ordnet dulkoma neahttastreamaide jo geassemánu dievasčoahkkimii – Sámediggeáirras lea válljen muhtin áššiid buohta suomastit neahttastreama dihtii

Olbmot leat váillahan dulkoma, muitala Sámedikki gielladorvočálli Anne Kirste Aikio. Muhtin sámediggeáirasat leat neahttastreama dihtii válljen suomastit muhtin áššiid buohta.

Sámedikki čoahkkin juovlamánus 2017
Govva: Vesa Toppari / Yle

Suoma Sámediggi lea guorahallamin vejolašvuođa ordnet dulkoma neahttastriimaide. Sámediggi lea streamen dievasčoahkkimiid juovlamánu 2014 rájes, muhto dulkon váilu ain.

Sámediggi lea ožžon máhcahaga dulkoma váilumis, muitala gielladorvočálli Anne Kirste Aikio. Sii leatge olles áigge bargamin áššiin.

– Dál go mii leat čielggadan dan dili de orru nu, ahte dat ii hirbmat divrrasin šatta, muhto goittotge dat gáibida bušeahttarievdadusa nu, ahte stivra ferte dan meannudit ja gieđahallat ahte mo mii bargat dieinna áššiin. Teknihka lea maid mannan ovddosguvlui nu dat orru, ahte dat livččii vejolaš ja dulkkat maiddái orrot miehtamin dasa nu, ahte áinnas dat orru vejolašvuohta ollašuvvamin jos dasa dáhttu lea, lohká Aikio.

Anne Kirste Aikio
Sámedikki gielladorvočálli Anne Kirste Aikio muitala, ahte sii leat bargamin dan ovdii, ahte neahttastreamaide boađášii dulkon. Govva: Vesa Toppari / Yle

Outi Paadar ássá Roavvenjárggas ja láve viššalit čuovvut álo go sáhttá sámedikki čoahkkimiid neahta bokte. Su mielas livččii vuogas, jus áddešii buot maid čoahkkimis hállet.

– Dieđus mun lean čuvvon muhtumin maiddái Norgga Sámedikki čoahkkimiid ja doppehan lea dulkon, de dat lea oalle luksus, ahte beassá guldalit olles áigge davvisámegielat dulkoma. Go de guldalan Suoma Sámedikki čoahkkimiid, de iežan mielas gal viehka muddui ádden anáraš-, davvisáme- ja suomagiela gale, muhto muhtimin orru nuortalašgiela bokte, ahte livčče muhtun sániid lean vuogas dulkka bokte gullat.

Outi Paadar
Outi Paadar dadjá, ahte ii livčče nu miella mieđihit, ahte dárbbaša dulkoma. Govva: Jenni Leukumaavaara / Yle

Sámediggeáirras lea válljen muhtin áššiid buohta suomastit neahttastreama dihtii

Maiddái sámediggeáirras Magreta Sara Anáris váillahivčče dulkoma neahttastriimaide. Dálá dilis son ferte vihkehallat makkár gielain doallá sáhkavuoruid.

– Munnje gal lea hui lunddolaš geavahit sámegiela sámedikki čoahkkimis, muhto mun dieđán ahte buot guldaleaddjit eai dehege mun in jovssa buot guldaleaddjiid dehe gehččiid deinna, ahte mun lean muhtimin áibbas dihtomielalaččat válljen dihto áššiid dadjat suomagillii vai mun lean áibbas 100 proseantta sihkkar ahte buot geahččit ipmirdit maid mun logan.

Magreta Sara
Sámediggeáirras Magreta Sara Govva: Vesa Toppari / Yle

Outi Paadar lea fuolas das, maid dat muitala sámeservodaga dilis, ahte sámediggeáirasat válljejit suomastit dievasčoahkkimiin neahttastreama dihtii.

– Sámegielain ii olat nu guhkás, vaikko mii leat nu geahččalan rahčat, buoridit sámegiela dili de dattege politihkkarat vásihit, ahte sii fertejit suomastit vai eambosat áddejit.

Dulkoma geahččalit ordnet neahttastreamai nu johtilit go vejolaš

Sámediggi doallá čuovvovaš dievasčoahkkima geassemánus. Dan ovdal stivrra čoahkkana vel gieđahallat ášši.

– Jos stivrra dan dohkkeha, de dalle mii jáhkkimis sáhttit dan ollašuhttit geassemánu čoahkkimis ja jos mis visot lihkostuvvá nu mo leat plánen de dalle dat livččii vejolaš, ahte dohko guvlui mii goittot dál bargat, muitala gielladorvočálli Anne Kirste Aikio.

Sámediggeáirras Magreta Sara mielas livčče dehálaš dulkot neahttastreamaid.

– Dalle lea vejolaš joksat buot gielain buot gehččiid.

Dulkonrustegat.
Govva: Vesa Toppari / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä