Sápmi |

Sámediggi hálida rahpat sámediggelága nu jođánit go vejolaš – Vikkahit láhkaođastusa Suoma ođđa mearrideaddjiid beavdái

Sámediggelága ođasmahttin lea okta Sámedikki dehálamos ulbmiliin Suoma čuovvovaš ráđđehusa prográmmii, muitala nubbi várreságadoalli Tuomas Aslak Juuso.

Sámediggi 21.06.2016
Sámedikki nubbi várreságadoalli Tuomas Aslak Juuso (gasku) muitala, ahte Sámediggi cegge bargojoavkku válmmaštallat evttohusaid Suoma ođđa ráđđehusprográmmii. Govva: Ville Fofonoff / Yle

Suoma Sámediggi áigu dalán joatkit barggu sámediggelága ođasmahttima ovdii.

Sámediggi hilggui vuossárgga sullii jagi válmmaštallojuvvon sámediggeláhkahápmosa. Sivvan lei earret eará dat, go Sámedikki mielas stáhta ii albmaláhkai ráđđádallan dainna láhkabarggus. Okta eanemus ságastahttán áššiin leamaš sámediggeláhkaevttohusa 3 paragráfii čállojuvvon sirdásanáigi, man dihte ođđa láhka gal livčče boahtán fápmui jo dán jagi bealde, muhto sámediggeválgga jienastanvuoigatvuođa ođđa kriterat easka jagi 2019 válggaid maŋŋá.

Sámediggelága geahččalit fidnet Suoma ođđa ráđđehusa beavdái

Sámediggi ságastalai dievasčoahkkimis vuossárgga áššiin, maid dat evttoha Suoma ođđa mearrideaddjiid beavdái. Suomas leat boahtte giđa riikkabeaiválggat. Ovddit válgajagiid láhkai Sámediggi áigu válmmaštallat iežas evttohusa das, makkár sámeáššiid ráđđehusprográmmas galggašii váldit vuhtii. Okta dain lea sámediggeláhka, muitala Sámedikki nubbi várreságadoalli Tuomas Aslak Juuso.

– Ollesčoahkkima sáttagoddeságastallamis (su. lähetekeskustelu) bođii ovdan, ahte sámediggeláhkaođasmahttin galgá leat okta ulbmil mis Suoma ráđđehusprográmmii.

Sámediggi ásaha bargojoavkku, mii dán čavčča áigge válmmaštallá evttohusa ráđđehusprográmma sisdoallun.

– Bargojoavku galgá ságastallama vuođul hábmet min oainnuid ja ulbmiliid, Juuso muitala.

Láhkabarggu jođihan Hallberg: Doaivvu miel ášši čoavdašuvvá jođánit

Mannan čavčča ceggejuvvon sámediggeláhkadoaibmagotti jođihii vuoigatvuohtadiehtagiid doavttir Pekka Hallberg. Hallberg livčče sávvan, ahte Sámediggi livčče ožžon jagi barggu boađusin ođđa lága, muhto ii jáhke barggu mannat duššás.

Pekka Hallberg, Inari, Sajos, Saamelaiskäräjälaki
Sámediggeláhkadoaibmagotti ságadoallin barggai alimus hálddahusrievtti emerituspresideantan jagiid 1993–2012 doaibman Pekka Hallberg. Govva: Linda Tammela / Yle

– Miihan gávnnaimet áibbas ođđa oainnu dasa, ahte sámediggelágas lea gažaldat namalassii jienastanvuoigatvuođas sámediggeválggas, ii ovdamearkka dihte eanan- dahje ealáhusvuoigatvuođain. Das mii leimmet ovttaoaivilis.

– Mun jáhkán, ahte mii fidniimet áigái dakkár láhkaevttohusa, ahte dan vuođul, detáljjaid hábmema maŋŋá, gávdno čoavddus. Die dat de leat go ášši fas ovddiduvvo, Hallberg jurddaša.

Pekka Halberg muitala, ahte son lea jo logiid jagiid ovddidan sápmelaččaid vuoigatvuođaid ovdamearkka dihte Ovttastuvvan Našuvnnain ja vuođđovuoigatvuođaođastusa oktavuođas. Son sávvá, ahte dáinna bargguin beasašedje viimmat mollii.

– Gal mun sávan, ahte áššái jo viimmat gávdnošii čoavddus. Dát lea hui dehálaš ášši dieđus sápmelaččaide, muhto maiddái guovllu eará ássiid, olles Suoma ja riikkaidgaskasaš ovdáneami ektui. Das ferte gal jo gávdnot jierbmi ja beassat ovddosguvlui, Hallberg oaivvilda.

Varrasamosat: Sápmi

Váldoođđasat

Varrasamosat

Muualla Yle.fi:ssä