Sápmi |

Sámediggi ja Nuoraid Akademiija jotket diehtojuohkima skuvllain – dál fállun boahtá maiddái mobiilaspeallu Seppo

Dihtosis-prošeavtta mihttomearrin lea lasihit galledemiid eandalii Helsset guovllu skuvllain.

Dihtosis metodakoartapáhkka skuvllas
Skuvlanuorat giđđat 2019 Helssegis oahpásmuvvamin Dihtosis-metodakoarttaide. Govva: Nuorten Akatemia

Dihtosis-joatkkaprošeavtta lea jođihišgoahtán borgemánu 5. beaivve Minna Lehtola. Son barggai Dihtosis-prošeavttas juo mannan čavčča ja dálvvi. Lehtola lei áidna ohcci joatkkaprošeavtta bargin. Dihtosis-fidnu bistá boahtte geasi rádjai.

Skuvlagalledeamit álge mannan dálvvi. Dál lea oaivil fidnet moanaid skuvlagalledeaddjiid lasi eandalii oaivegávpotguvlui gos lea dáidda jearalmas, muitala Minna Lehtola Sámedikkis.

– Oaivil lea dahkat 80 galledeami oahppadiimmuin dán skuvlajagis. Diibmá skuvlagalledeaddjit fitne buohkanassii 60 geardde ain mannu skuvllas.

Skuvlagalledeaddjiid ohcan rahpasa dán borgemánus ja sii geat dasa álget, skuvlejuvvojit čakčamánu beallemuttus dán doibmii.

– Jus badjel 18-jahkásaš sámenuoras fal lea mokta dása álgit de ii earágo ohcat, ávžžuha Minna Lehtola.

Skuvla diŋgo sámenuora dahje interaktiivvalaš spealu

Dihtosis-doaimma bokte skuvllat sáhttet diŋgot sámenuora skuvlagalledeaddjin. Jus galledeapmái ii leat vejolašvuohta, de prošeavttas lea ođđa fálaldahkan Seppo-mobiilaspeallu. Diibmá ledje fállun metodakoartapáhkat ja dat manne masá 700 páhka. Maiddái koarttaid sáhttá ain diŋgot.

– Mobiilaspeallu lea ođđalágan interaktiivvalaš oahppanvuohki sámekultuvrras ja eará sámefáttáin. Dat doaibmá skuvlagalledeaddji hagage. Mannan dálvvi vásáhusaid vuođul Mátta-Suomas ja eandalii Helsset guovllus sámekultuvrra dieđuide lea ollu jearalmas, buot eat bastán ollašuhttit, muitala Minna Lehtola.

Davimuš skuvlagalledeapmi dahkkui mannan giđa Soađegilis. Roavvenjárggas leamaš maid skuvlagalledeaddji. Sámeguovllu skuvllaide Dihtosis-prošeavtta ii leat oaivil olahit.

Nuoraid Akademiija leamaš buorre veahkki

Dihtosis-barggu jođiha Sámedikki nuoraidráđđi ja ovttasbargoguoibmin lea Helssegis doaibmi Nuoraid Akademiija. Nuoraidbarggu ruhtada oahpahus- ja kulturministeriija.

– Nuoraid Akademiijas lea juo ovddežis hárjánupmi skuvlagalledandoaimmas. Leat fidnen buori oahpu vaikko oktoge boahttevuođas fuolahit dákkár skuvlagalledemiin, árvala Minna Lehtola.

Dihtosis-prošeavttas borgemánnu manná materiálabargguin ja čakčamánus lea ođđa olbmuide skuvlen Helssegis. Dihtosis-doaibma oidno dasto maiddái Turku girjemárkaniin golggotmánus.

Dihtosis-prošeavtta ovdáneami ja dáhpáhusaid ja skuvlagalledemiid áigedávvala sáhttá čuovvut Sámedikki neahttasiidduin. Áiggedásis bissu maiddái go čuovvu nuoraidráđi fb-siiddu dahje Instagram-konto.

Skuvlagalledanmateriálat almmuhuvvojit Sámedikki ja Nuoraid Akademiija neahttasiidduin, doppe galledemiid ja diehtomateriálaid sáhttá maiddái diŋgot.

Loga skuvlagalledeaddji Máren-Elle Länsman blogga dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä