Sápmi |

Sámediggi lágidišgoahtá gullamiid duohtavuođa- ja soabadankomissáraid válljemiin boahtte vahku rájes – gullamiid jođiha Niila Rahko

Koronadili geažil gullamiid lágidit gáiddusin neahta ja telefovnna bokte.

mies syksyisellä polulla, Ivalo
Gullandilálašvuođaid ságajođiheaddjin doaibmá psykiátralaš buohccedivššár Niila Rahko. Govva: Kirsti Länsman / Yle

Sámediggi lágida boahtte vahku rájes gullamiid sápmelaččaide duohtavuođa- ja soabadankomissáraid válljemiin. Koronadili geažil dilálašvuođat lágiduvvojit gáiddusoktavuođaid bokte.

Gullandilálašvuođat lágiduvvojit Zoom-heivehusas sihke davvisáme-, anáraš- ja nuortalašgillii ja maiddái suomagillii. Dilálašvuođain vuhtii váldojuvvojit sihke sámeguovllus ja sámeguovllu olggo bealde ássi sápmelaččat. Maiddái sámenuoraide lágiduvvo iežas gáiddusgullan.

Gullandilálašvuođaid ságajođiheaddjin doaibmá psykiátralaš buohccedivššár Niila Rahko ja čállin Sámedikki mearreáigásaš plánejeaddji Heli Aikio.

Buot gullandilálašvuođat báddejuvvojit ja báttit seailluhuvvojit Sámedikkis guokte vahku dilálašvuođa maŋŋá raporterema doarjjan. Gullandilálašvuođain ráhkaduvvo maiddái muittuhančála ja muittuhančállagiid vuođul čohkkejuvvo raporta. Sámedikki stivra ja dievasčoahkkin geavahit raportta veahkkin ja doarjjan, go válljejit komissáraid.

Buot gáiddusgullamat lágiduvvojit Zoom-heivehusas ja gullamii ferte almmuhit iežas fárrui ovddalgihtii. Lassi dieđuid almmuheamis ja gullándilálašvuhtii searvamis gávnnat dáppe.

Gáiddusgullandilálašvuođaid lassin iežas oainnu komissára válljemiin sáhttá ovdanbuktit Sámediggái maiddái šleađgapoasttain info(at)samediggi.fi dahje reivepoasttain.

Olbmuin lea maiddái vejolašvuohta riŋget boahtte vahkus Sámediggái ja muitalit iežas oaivila komissáraid válljemiin. Anáraš- ja suomagielat telefongullamiin vástida Heli Aikio. Nuortalašgielat telefongullamisges vástida Laura Olsén-Ljetoff ja davvisámegielat telefongullamis Pia Ruotsala-Kangasniemi. Telefonnummáriid telefongullamiidda gávnnat sámedikki neahttasiiddus.

Gáiddusgullamiid áigetávval

  • Gaskavahkku 4.11.2020 dmu 18–20.30 suomagielat gullan
  • Vuossárga 9.11.2020 dmu 18–20.30 davvisámegielat gullan Anára guovllu ássiide
  • Maŋŋebárga 10.11.2020 dmu 18–20.30 davvisámegielat gullan Vuohču guovllu ja sámiid ruovttuguovllu olggobeale ássiide
  • Gaskavahkku 11.11.2020 dmu 18–20.30 anárašgielat gullan
  • Duorastat 12.11.2020 dmu 18–20.30 sámenuoraid gullan
  • Vuossárga 16.11.2020 dmu 18–20.30 davvisámegielat gullan Ohcejoga ja Eanodaga guovllu ássiide
  • Maŋŋebárga 17.11.2020 dmu 18–20.30 nuortalašgielat gullan

Telefonáiggit

  • Vuossárga 2.11.2020 dmu 9–16.00 anárašgielat telefongullan
  • Maŋŋebárga 3.11.2020 dmu 9–16.00 davvisámegielat telefongullan
  • Gaskavahkku 4.11.2020 dmu 9–16.00 nuortalašgielat telefongullan
  • Bearjadat 6.11.2020 dmu 9–16.00 suomagielat telefongullan

Saamelaisten totuus- ja sovintokomission komissaariehdokkaat Marjaana Aikio, Heikki J. Hyvärinen, Irja Jefremoff, Juha Joona, Petteri Länsman, Yrjö Musta, Aslak A. Pieski, Irja Seurujärvi-Kari, Miina Seurujärvi ja Nils-Henrik Valkeapää.
Komissáraevttohasat leat Marjaana Aikio, Heikki J. Hyvärinen, Irja Jefremoff, Juha Joona, Petteri Länsman, Yrjö Musta, Aslak A. Pieski, Irja Seurujärvi-Kari, Miina Seurujärvi ja Nils-Henrik Valkeapää. Govva: Yle

Komissáraevttohasat eai searvva gullamiidda

Boahttevaš vahkkuid gullamat leat oaivvilduvvon dušše álbmogii, komissáraevttohasat eai oassálaste gullándilálašvuođaide.

Sámiid duohtavuođa- ja soabadankommišuvdnii leat evttohuvvon logi olbmo. Komissáraevttohasat leat Marjaana Aikio, Heikki J. Hyvärinen, Juha Joona, Petteri Länsman, Yrjö Musta, Aslak A. Pieski, Irja Seurujärvi-Kari, Miina Seurujärvi ja Nils-Henrik Valkeapää. Nuortalaččaid siidačoahkkimii komissáran evttohit Irja Jefremoff.

Stáhtaráđđi ásaha soabadankommišuvnna lagaš ovttasbarggus Sámedikkiin ja Nuortalaččaid siidačoahkkimiin. Kommišuvnnas galget leat dakkár lahtut, geain lea sierra čehppodat sápmelaččaid diliin, gielas ja kultuvrras.

Duohtavuođa- ja soabadankommišuvnnas galget leat oktiibuot vihtta komissára, main guokte vállje stáhtaráđđi, guokte Sámediggi ja ovtta nuortalaččaid giličoahkkin.

Kommišuvnna doarjjan vuođđuduvvo parlamentáralaš čuovvunjoavku, masa riikkabeaibellodagat, Sámediggi, nuortalaččaid siidačoahkkin sihke luteralaš ja ortodoksalaš girku ožžot evttohit lahtuid. Čuovvunjoavkku ságadoallin doaibmá stáhtaráđi kansliija stáhtačálli.

Varrasamosat: Sápmi

Váldoođđasat

Varrasamosat

Muualla Yle.fi:ssä